HİLÂL-İ AHMER MECMÛʻALARI / CİLT 3

1188 Üçüncü Sene 9 Receb sene 1342 / 15 Şubat sene 1340 (1924) Numara 30 Makâlât ve İʻlânât, Mecmûʻa Müdüriyeti'ne Gönderilmelidir. TÜRKİYE HİLÂL-İ AHMER MECMÛʻASI Derc Edilmeyen Evrâk ve Makâlât İʻâde Edilmez. Her Ayın On Beşinde Neşrolunur. Senelik abonesi bir liradır. Merciʻi: Yerebatan Câddesi'nde Hilâl-i Ahmer Merkezi. Telefon: İstanbul 1783 Hilâl-i Ahmer'e gönderilecek mektûb, para, eşyâ ve bi'l-cümle teberruʻât, "Dersaadet'de Hilâl-i Ahmer Cemʻiyeti Riyâseti" nâmına irsâl edilmelidir. Mündericât: Gâzî Mustafa Kemal Paşa'nın Beyânnâmesi – İctimâʻî Hıfzıssıhha – Hilâl-i Ahmer Meclis-i Umûmîsi – Arâzî-i Milliyede Ecnebî Salîb-i Ahmerler Faʻâliyeti – Hilâl ve Salîb-i Ahmerler Cemʻiyetlerinde İlk İmdâd Teşkîlâtı – Hilâl-i Ahmer Havâdisi – Mübâdele Faʻâliyeti – Salîb-i Ahmerler Havâdisi – Fransızca Kısmı – İngilizce Kısmı _______________ GÂZÎ MUSTAFA KEMAL PAŞA HAZRETLERİNİN ÂLEM-İ İSLÂM'A HİTÂBESİ "-Türk milleti Allah'ın inâyetine güvenerek hayâtını kurtarmağa, yaşamak hakkına mâlik oldu- ğunu dünyâya göstermeğe azmetdiği gün, biliyorsunuz ki bütün vesâitden mahrûm, yalnız îmân ve aşk-ı istiklâl kuvvetine mâlik idi. Türkler bu sâyede istihsâl etdikleri zaferle mücâhedelerini tetvîc ederlerken âlem-i İslâm'ın pek ulvî bir alâka ile mütehassis olduklarını şükrânla görmüş ve bunu dâimâ minnetle yâd etmekde bulunmuşdur. İşte bu alâkaya istinâden şimdi de bütün dîn kardeşlerimizden yine kendi kardeşleri için şefkat ve merhamet ricâ ve tavassutda bulunuyorum. Türk milleti zafere kavuşdu. Fakat el-yevm muʻazzam bir iş karşısındadır: Yunan esâreti altındaki dîndâşlarımızın mübâdelesi ve Türk toprağında iskânları… Bu kardeş- lerimiz bugün Yunan zulmü altında inliyor. Bütün gün muhtelif mahallerden gelen feryâdnâmeler her müslümân kalbini rikkate getirecek, her müslümânı ağlatacak derecede acıklıdır. Bunların bir an evvel kurtarılmaları artık her şeyden evvel bir vecîbe-i dîniye olmuşdur.