HİLÂL-İ AHMER MECMÛʻALARI / CİLT 3

Türkiye Hilâl-i Ahmer Mecmû‘ası Sayı 30 1213 İsviçre Salîb-i Ahmer Cemʻiyeti Samariten (ilk imdâd ve muʻâvenet) teşkîlâtının memlekete teʼmîn etdiği menfaʻat ve bâ-husûs seferberlik esnâsında Samariten şehâdetnâmesini hâiz zevâtdan edilen istifâde Hilâl-i Ahmer Merkez-i Umûmîsi aʻzâsından Reîs-i Fahrî Müderris Doktor Besim Ömer Paşa hazretlerinin nazar-ı dikkatini celb etdiğinden Müderris Doktor Smarck'ın Almanya'da vazʻ eylediği esâsâta tevfîkan 1918 târîhinde Taʻlîm ve Terbiye Cemʻiyeti binâsında Samariten ders- leri küşâd edilmiş ve üç ay devâm eden tedrîsâtı müteʻâkib sıhhiye-i askeriye reîsi ile Hilâl-i Ahmer Cemʻiyeti aʻzâsından bazı zevât huzûrunda icrâ edilen imtihânda isbât-ı ehliyet edenlere şehâdetnâ- me iʻtâ edilmişdi. Besim Ömer Paşa hazretlerinin maksadı ilk imdâd ve muʻâvenet (Samariten) esâsâtının taʻmî- mi ve bilhâssa mekteblerde tedrîsi ile sıhhat-i umûmiyeye ve harb zamânında sıhhiye-i askeriyeye bir hizmet ve muʻâvenet teʼmîn etmek olduğu hâlde bazı esbâb ve ilcâât dolayısıyla teşebbüs-i vâkiʻ maʻalesef inkişâf edemeyerek nihâyet akâmete mahkûm kalmışdır. Hâl-i tabîʻî avdet etmiş olduğundan Samariten teşkîlâtının bizde de ehemmiyeti takdîr edilerek ihyâ edildiğini ümîd eylemekdeyiz. Besim Ömer Paşa hazretlerinin işbu teşebbüsünü nazar-ı takdîr ve ehemmiyete alan Hilâl-i Ah- mer Hanımlar Merkezi, bilâhare dârüssınâʻaları menfaʻatine neşretdikleri İlk İmdâd 2 nâmında küçük ve fakat kıymetdâr bir eseri bu münâsebetle kârilerimizin [195] enzâr-ı istifâdesine arz etmek isteriz. Bir ceyb takvîmi kıtʻasında kırk beş, elli sahîfelik bu risâlenin mukaddimesinde: "İmdâd ve muʻâvenete vâkıf olmayanlar bu mebhasdan istifâde ederler. Vukûfu olanlar ise tekrâr mütâlaʻa ile öğrenmiş oldukları şeyleri unutmazlar" deniliyor. Eser gâyet sâde bir lisânla yazıldığı ve vekâyiʻ-i kazâiye eşkâl-i lâzımesiyle tesbît edildiği ci- hetle her âile reîs ve erkânına, mekteb müdür ve muʻallimlerine, zâbıta meʼmûrlarına, hattâ fabrika amelesine ve bir kelime ile umûm halka İlk İmdâd 'ın mütâlaʻası şâyân-ı tavsiyedir. _______________ HİLÂL-İ AHMER HAVÂDİSİ Muhâcirlerimiz için İstanbul Tüccârına Mürâcaʻat Rumeli'den memleketimize gelmekde olan mübâdeleye tâbiʻ yüz binlerce vatandâşımızın teh- vîn-i ihtiyâcâtına Hilâl-i Ahmer'in masrûf olan mesâʻî ve hidemâtı maʻlûmdur. Memleketin her ta- rafında maksad-ı mukaddes uğruna cemʻ edilmeğe başlanılan iʻânât peyderpey cemʻiyetimize gön- derilmekde ve harekât-ı milliyenin bidâyetinden zaferlerle tetevvücüne kadar İstanbul'un muhterem vatan-perver ahâlîsinin ve bilhâssa muʻteberân tüccârının ibrâz eylediği âsâr-ı semâhat ve muʻâvene- tin bu bîçâre vatandâşlarımıza karşı da teşmîl ü ibzâline intizâr edilmekde olduğundan Hilâl-i Ahmer Cemʻiyeti ahîren İstanbul Ticâret Odası Riyâseti'ne mürâcaʻat ederek Ticâret Odası heyʼet-i muh- teremesince bir cemʻ-i iʻâne komitesi intihâb ve teşkîl edilmesini ricâ etmiş idi. Mürâcaʻat-ı vâkıʻa üzerine Ticâret Odası ahîren Türk tüccârından mürekkeb bir heyʼet teşkîline karâr vermişdir. Bu heyʼet Balcı İbrahim, Sabuncuzâde Şakir, Şinasi, Mustafa, Muhyiddinzâde Haydar, Hacı Receb, Ziya Monlâ, Rifat Kâmil, Sezai Ömer, Sârım, Şevki, Hacızâde Mesud, Alizâde Midhat Macid Beylerle Hilâl-i Ahmer murahhaslarından mürekkebdir. _______________ 2 İlk İmdâd (Tabîb Yetişinceye Kadar), Ahmed İhsan Matbaʻası, fiyâtı 10 kuruş.