HİLÂL-İ AHMER MECMÛʻALARI / CİLT 3

Türkiye Hilâl-i Ahmer Mecmû‘ası Sayı 31 1259 MÜBÂDELE-İ AHÂLÎ Ankara'da Mübâdele, İʻmâr ve İskân Vekâlet-i Celîlesi'yle Hilâl-i Ahmer Merkez-i Umûmîsi murahhasları arasında mübâdele-i ahâlî için yapılan iʼtilâfnâmede tesbît edilen esâsât şunlardır: Mübâdele sûretiyle gelmekde olan muhâcirlerin ahvâl-i sıhhiyelerinin daha yakından ve şümûl- lü bir sûretde taʻkîbi ve muʻâmelâtın külfet-i muhâberât ve merâsimden âzâde olarak teʼmîn-i tedvîri için Samsun, Trakya, İzmir, Adana, Konya, İzmit mıntıka müdüriyetleri merkezlerinde Hilâl-i Ahmer Cemʻiyeti Merkez-i Umûmîsi tarafından birer murahhas bulundurulacakdır. İşbu murahhasların vazîfe ve salâhiyetleri mıntıka hudûdu dâhilindeki vilâyetlerde mevcûd bi'l- umûm Hilâl-i Ahmer şuʻabât ve teʼsîsâtının muhâcirlere aʻzamî muʻâvenet ve yardım etmesini tanzîm etmekden ve muhâcirîn için toplanılacak iʻânâtı mıntıka müdürleriyle bi'l-istişâre ittihâz olunacak mukarrerât veya vekâletden teblîğ olunacak esâsât [224] dâiresinde hüsn-i sarf ve istiʻmâl etdirmek- den ibâret olacakdır. Muhâcirler nâmına toplanmakda ve toplanılacak olan iʻânâtdan Hilâl-i Ahmer'in murahhas-ı mahsûs bulunduracağı sâlifü'z-zikr altı mıntıkada ve ilâveten Ankara vilâyetinde cemʻan 37 vilâyet derc olunacak iʻânâtın mecmûʻu el-yevm burada iskân edilmiş ve edilecek olan muhâcirînin ihtiyâ- cât-ı zarûriyelerine sarf olunacak ve buna mukâbil Mübâdele, İʻmâr ve İskân Vekâletince 1 Mart [1]340 [1924] târîhinden 30 Haziran 1340 [1924] akşâmına kadar olan dört ay zarfında işbu vilâyetler hâsılâtından 40.000 lira tahsîl ve merkez-i umûmî emrine irsâl etdirilecekdir. Vekâlet tahsîlât noksânını ikmâl eylemeği kabûl eder. Murahhas bulunmayacak diğer menâtık- da 37 vilâyetde toplanılacak iʻânâtın nısfı da kemâ fi's-sâbık bu mıntıkalar dâhiline sevk ve iskân edilmiş veya edilecek olan muhâcirlerin ihtiyâcât-ı zarûriyelerinin teʼmînine hasrolunacak ve nısf-ı diğeri mecmûʻu Türkiye hâricindeki teşkîlâta veya ale'l-umûm merkez-i umûmîce lüzûm görülecek muhâcirîn ihtiyâcâtına sarf edilmek üzere şuʻabât-ı âidesince Hilâl-i Ahmer Merkez-i Umûmîsi em- rine gönderilecekdir. Hilâl-i Ahmer Cemʻiyeti'nin murahhas bulunduracağı kâffe-i menâtıkda hâlen mevcûd bi'l- umûm Hilâl-i Ahmer teʼsîsâtından işbu ictimâʻda taʻdîli îcâb etmediği görülenler kemâkân muhâfaza edilecek, gerek bunların ve gerek bu defa takarrür etdirilen teşkîlât ve teʼsîsâtın masârıf ve idâresi kâmilen Hilâl-i Ahmer'e âid olacakdır. Gerek vekâlet ve gerek Hilâl-i Ahmer Cemʻiyeti işbu teşkîlât ve teʼsîsâtda mürûr-ı zamân ile icrâsına lüzûm görecekleri taʻdîlâtı teklîf hakkını muhâfaza ederler. Kamyon ve kamyonetlerle ale'l-umûmmuhâcirîn (muhtâc-ı muʻâvenet) eşyâsı, hastagân, zuʻafâ ve ihtiyârlar, çocuğu irzâʻ eden analar, 12 yaşına kadar çocuklar, Hilâl-i Ahmer'e ve Mübâdele Vekâ- leti'ne âid eşyâ ve erzâk ve levâzım vesâire naklolunabilir. Mıntıkalarda muhâcirlerin ahvâl-i sıhhiyeleriyle daha yakından alâkadâr olmak ve müdâvât-ı sıhhiyelerine derhâl tevessül eylemek üzere levâzım ve eczâyı hâmil seyyâr teşkîlâta lüzûm-ı katʻî hâsıl olmuş ve sâbit ve seyyâr teşkîlât ve teʼsîsâtının mikdâr ve kâbiliyeti zîrde derc olunmuşdur. Selanik'deki iʻâşe teşkîlâtı tezyîd olunacak vapurlarda seyyâr imdâd-ı sıhhî heyʼetlerine bilhâs- sa muhtâc muhâcirînden hastalanacaklara iʻtâ olunmak üzere kâfi mevâd iʻâşe bulundurulacakdır. Muhâcirîne tevzîʻ olunmak üzere evvelce imdâd-ı sıhhî heyʼetlerine tevzîʻ olunan levâzım-ı iksâiye vesâireden el-yevm anbâr mevcûdu olan mikdâr kemâkân muhâcirîne tevzîʻ edileceği gibi 15.000 battâniye, 10.000 muhtelif yelek, 10.000 ceket, 7.000 pantolon, 10.000 don, 10.000 gömlek, 15.000 çorab, 5.000 fanila, 5.000 karavana, kova, 1.000 çarık, 700 mahrûtî çadır, 6 iki direkli çadır ve 120 büyük sandık, 360 kilo ve küçük sandıklar derûnunda 4.320 kilo tuvalet sabunu, 1.000 kilo âdî sabun, 10.000 kutu kibrit, 300 kilo kakao, 132 kutu süd de kemâ fi's-sâbık ve ale'l-usûl muhâcirîn ihtiyâcına tevzîʻ ve iʻtâ olunacakdır.