HİLÂL-İ AHMER MECMÛʻALARI / CİLT 3

Türkiye Hilâl-i Ahmer Mecmû‘ası Sayı 33 1348 Süt çocuğunun lisânı yokdur. Onun ifâde-i vechiyesinden, harekâtından mülhem arzu ve emel- lerini okuyan bir vâlide hakîkî vazîfesini ancak îfâ edebilir. Her ağladıkça acıkdığına hükmederek ağzına memesini sokan bir vâlide (şefkati bahâne) çok geçmeden yavrusunu gâib edeceğine şübhe etmemelidir. Binâberîn memleketimizde süt çocukları zâyiʻâtını kabartan turuk-ı hazmiye hastalıkları birinci derecede ehemmiyete alınacak esbâbdan maʻdûddur. Bu husûs için evvel emirde süt damlaları (matbûhları) ve ziyâretçi hastabakıcılar teşkîlâtını teʼsîs ve idâme etmek ve bilhâssa hakîkî etfâl mü- tehassısları yetişdirmek lâzımdır. Maʻamâfîh kemâl-i şükrân ile söylemek isteriz ki, ülkemizde irzâʻ-ı sınâʻî Avrupa'da olduğu kadar taʻammüm etmemişdir. Hele Anadolu'daki vâlidelerimizin yavrularını emzirmek iştiyâkları bugünkü neslimizin idâmesi husûsunda mühim bir âmil olduğuna kâniʻ olduğu- muzdan bu husûs için her fırsatda teşvîkkâr olmağı teʼmîn etmeliyiz. Süt çocuklarının neşv ü nemâsı hengâmında her türlü öğütleri veren ve bîgâne vâlidelere bu husûsda rehber olan "nasîhat ocakları"nın ehemmiyeti de son senelerde tebellür eden teşkîlâtdan maʻ- dûddur. Buraya mürâcaʻat ile her vâlideye çocuğu için îcâb eden nesâyih ve îcâbât-ı sıhhiye verilir ve ara sıra kontrol edilmek üzere ocağa getirilmesi de alışdırılarak pek çok istifâde edilmişdir. Anadolu'da bazı usret-i vilâde vekâyiʻinde hiçbir müdâhale-i cerrâhiye yapılmaksızın vâlide ve yavrunun telef oldukları düşünülürse memleketimiz için vilâde mütehassısları (lavta) yetiştirmek gâyesinin de şimdiden ehemmiyete alınması derkâr olacağı bedîhîdir. Maʻamâfîh Avrupa'da son zamânlarda ehemmiyete alınan ve adedleri oldukça mühim bir yekû- ne bâliğ olmağa başlayan etfâl-i metrûkenin himâyesi mesʼelesi de nüfûs siyâseti nokta-i nazarından ihmâl edilecek bir keyfiyet değildir. Bu cihetle Himâye-i Etfâl Cemʻiyeti şuʻabâtını teksîr ve gâyele- rini tesmîr husûsâtı da nazar-ı dikkatden dûr tutulmamalıdır. El-hâsıl memleketimizde kilometrelerce gidildiği hâlde tek bir ağaç, hayvân hattâ insâna rast gelinemediği nazar-ı insâfa alınırsa ve nüfûs siyâsetinin iʻmâr, medeniyet ve servet nokta-i nazarın- dan ehemmiyeti derpîş edilirse her doğan çocuğun ziyâʻından vikâyesi esbâbını taharrî, teʼmîn ve teşvîk etmenin cümlemize borç olduğuna îmân ve bu husûsdaki sıhhî-ictimâʻî tedâbîri bir an evvel ciddî bir sûretde tatbîke şitâbân olmalıyız. _______________ [285] HİLÂL-İ AHMER HAVÂDİSİ Reîsicumhûr Hazretlerini Tebrîk Hilâl-i Ahmer Cemʻiyeti Merkez-i Umûmîsi tarafından Türkiye Reîsicumhûru ve cemʻiyetin hâmîsi Gâzî Mustafa Kemal Paşa hazretlerine îd-i saʻîd-i Fıtr münâsebetiyle çekilen telgrafnâme ile müşârunileyh hazretlerinin cevâbları: "-Reîsicumhûr Gâzî Paşa Hazretlerine, Hilâl-i Ahmer Merkez-i Umûmîsi hâmî-i muʻazzamına îd-i saʻîd-i Fıtr'ı tebrîk eyler". _______________ "-İstanbul'da Hilâl-i Ahmer Merkez-i Umûmîsi'ne, Tebrîkâtınıza teşekkür ve bi'l-mukâbele tebrîk ederim, efendim". _______________