HİLÂL-İ AHMER MECMÛʻALARI / CİLT 3

Türkiye Hilâl-i Ahmer Mecmû‘ası Sayı 34 1407 MUKTEBESÂT Phos Gazetesinden İstanbul'da Rumca olarak intişâr eden Phos gazetesi muharrirlerinden biri, mübâdeleye tâbiʻ Rumların ahvâl-i sıhhiyelerine nezârete meʼmûr olan ve berây-ı vazîfe Kalikratya'ya gidip bu defa avdet eden Yunan Salîb-i Ahmer Heyʼeti aʻzâsından Doktor Mösyö Garofalidès ile mülâkât etmişdir. Phos gazetesinin geçen 22 Mayıs târîhli nüshasında gördüğümüz bu mülâkâtın mühim kısımlarını ber-vech-i âtî terceme ediyoruz. Doktor diyor ki: "-Evvel be-evvel Hilâl-i Ahmer'in bize karşı gösterdiği hüsn-i kabûlden dolayı en hâr teşek- kürâtımı beyân etmek isterim. İnsânî işlerimizde siyâsiyâtdan uzak olarak kardeş olduğumuzu Hilâl-i Ahmer merkezinde bana söylediler". Muharrir: "-Çatalca'da mübâdeleye tâbiʻ olanları nasıl buldunuz?" Doktor: "-Ahvâl-i sıhhiyeleri iyidir. Takayyüdât-ı sıhhiyeye muhtâcdırlar. Vapurlara irkâb edilecekleri vakit, bunlardan büyük bir kısmı, aşılanmış bulunmalarına rağmen yine aşılanacaklardır. Yolda da doktorlar kendilerine refâkat edecekdir". Muharrir: "-Kalikratya'da mübâdeleye tâbiʻ olanların adedi çok mudur?" Doktor: "-Kalikratya mıntıkasında 4.860 kişi vardır. Pire'den vapurlar gelir gelmez irkâb ameliyesine başlanılacakdır. Bundan sonra Çatalca'dakilerin sevki gecikmeyecekdir". Muharrir: "-Çatalca'dakilerin sevkinden sonra burada kalacak mısınız?" Doktor: "-Hayır! İstanbul'dakilerin mübâdele zamânı henüz taʻayyün etmemişdir. Şimdiki vazîfemiz ile Ankara ve Sivas'a gideceğiz". Amerika'dan Bir Türk Sesi Amerika'nın New York şehrinde intişâr eden Birlik refîk-i [324] muhteremimiz son nüshasında Rumeli'den hicret eden İslâm kardeşlerimizin esnâ-yı hicretde mütesâdif oldukları acı vakʻaları taʻrîf ve tasvîr etdikden sonra şunu ilâve ediyor: "-Ey Türk! Bunu oku, fakat sakın ağlama, o boşdur! Kalbin acıyorsa bak ne yapasın? Ekme- ğinden bir lokma, elbisenden bir kat eski, bir senelik harçlığından birkaç kuruş onlara, o zavallı aç ve çıplak muhâcir kardeş ve kız kardeşlerine ondan ayır ve gönder. Bunu sakın unutma!" Amerika'daki vatandaşımızın bu ulvî hitâbesine teşekkür ve hürmetden başka ilâve edecek bir söz bulunamaz. Söz Refîkimize Teşekkür Kıbrıs'ın Lefkoşa kasabasında intişâr eden muhterem Söz refîkimiz îd-i saʻîd-i Fıtr münâsebe- tiyle "Yetîmler Günü" serlevhasıyla bir makâle neşreylemiş ve bayramın ilk günü Hilâl-i Ahmer için iʻâne toplanmasını tavsiye ve iʻâne iʻtâ edenlerin isimlerini neşretmeyi bir vazîfe bildiğini beyân ve iʻlân etmişdir. Muhterem refikimize bilhâssa teşekkür ederiz. Sinop Refîkimize Teşekkür Muhterem refikimize bayram münâsebetiyle "Hilâl-i Ahmer" unvânlı makâlesinden dolayı te- şekkür eyleriz.