HİLÂL-İ AHMER MECMÛʻALARI / CİLT 4

Türkiye Hilâl-i Ahmer Mecmû‘ası Sayı 39 1736 b-Lede'l-muʻâyene tâmmü's-sıhha, boy ve sıklet ve teşkîlâtça elverişli bulunmak, c-Ehl-i iffet ve hüsn-i ahlâk ashâbından bulunduğu inde't-tahkîk tebeyyün etmek, d-Türkçe okuyup yazmak bilmek, (Tahsîl-i tâlî görmüş olanlar tercîh edilir.) [86] e-Sinnen yirmiden ve otuz beşden efzûn olmamak, f-Müteehhil olmamak, g-On ikinci mâddede beyân olunan ahkâmı îfâ edeceğine dâir kefâlet-i mâliye iʻtâ eylemek lâzımdır. Mâdde 17- Hastabakıcı Mektebi'ne nehârî tâlibât dahi kabûl olunur. Nehârî tâlibât, mektebce ibâte ve iʻâşe ve ilbâs olunmadıkları gibi tahsîsât dahi almazlar. Haklarında on altıncı mâddede mu- harrer şerâit-i kabûlden f ve g fıkraları cârî olmaz. Alacakları şehâdetnâmelerin kıymet-i fenniyesi leylî tâlibâtın şehâdetnâmeleri ile müsâvîdir. Ancak ikmâl-i tahsîlden sonra Hilâl-i Ahmer'e karşı hiçbir kayıd ile mükellef değildir. HİLÂL-İ AHMER HAVÂDİSİ Cumhûriyet İdâremizin Yıldönümü Münâsebetiyle "-Reîsicumhûr ve Hilâl-i Ahmer hâmî-i müfahhamı Gâzî-i aʻzam Mustafa Kemal Paşa hazret- lerine, İlk cumhûriyet sene-i devriyesi münâsebetiyle Hilâl-i Ahmer Merkez-i Umûmîsi zât-ı sâmîleri- ne en hâr tebrîkâtını taʻzîmât ile arz eder. Hilâl-i Ahmer Reîs-i Sânîsi Âkil Muhtar" _______________ "-İstanbul Hilâl-i Ahmer Reîs-i Sânîsi Âkil Muhtar Bey'e, Cumhûriyetin iʻlânı sene-i devriyesini tebrîk münâsebetiyle ızhâr olunan hissiyâta teşekkür ederim, efendim. Reîsicumhûr Gâzî Mustafa Kemal" _______________ "-Ankara Büyük Millet Meclisi Riyâset-i Celîlesi'ne, İlk cumhûriyet sene-i devriyesi münâsebetiyle Hilâl-i Ahmer Merkez-i Umûmîsi en hâr tebrîkâtını arz eder. Hilâl-i Ahmer Reîs-i Sânîsi Âkil Muhtar" _______________