HİLÂL-İ AHMER MECMÛʻALARI / CİLT 4

Türkiye Hilâl-i Ahmer Mecmû‘ası Sayı 40 1810 HİLÂL-İ AHMER HAVÂDİSİ Hilâl-i Ahmer Merkez-i Umûmî Aʻzâlığı Sadrıaʻzam Tevfik Paşa ile Hâmid ve Kilisli Doktor Rifat Beylerden inhilâl eden merkez-i umûmî aʻzâlığına Doktor Galib Hakkı ve Vakit Gazetesi Sâhib ve Sermuharriri Asım ve sâbık Hicaz Sıhhiye İdâresi Muhâsebecisi Nuri Beyler intihâb edilmişlerdir. _______________ Doktor Celâl Muhtar Bey Ahîren merkez-i umûmî aʻzâlığından istiʻfâ etmiş olan Doktor Celâl Muhtar Bey'e istiʻfâsında ısrâr etmemesi için merkez-i umûmî nâmına vukûʻ bulan mürâcaʻat üzerine mûmâileyh istiʻfâsını geri almışdır. _______________ Afyonkarahisar Zelzelesi Afyonkarahisarı'nda vukûʻ bulan zelzeleden müteessir olan muhtâcîne tevzîʻ edilmek üzere mahallî Hilâl-i Ahmer merkezine beş yüz liralık bir muʻâvenet îfâsına merkez-i umûmîce meʼzûniyet verilmişdir. _______________ Cava Müslümânları İʻânesi Reîsicumhûr Gâzî Mustafa Kemal Paşa hazretleri delâletiyle Hilâl-i Ahmer nâmına gönderilen 1.160 İngiliz lirasının makbûzu reîs-i müşârunileyh hazretleri bi'l-imzâ ayrıca Cava Müslümânlarına gönderilmek üzere imzâ-yı âlîleriyle müveşşah bir kıtʻa fotoğrafîlerini Ankara'dan avdet eden mer- kez-i umûmî murahhaslarına tevdîʻ etmişlerdir. _______________ Yalova'daki Muhâcirlere Yardım Yalova'da Safran karyesinde 750 nüfûs muhâcirin pek muhtâc-ı muʻâvenet bir hâlde bulun- dukları cemʻiyetimizce istihbâr edilmesi üzerine mahalline etıbbâmızdan Doktor Bahaeddin Bey'in riyâseti altında bir heyʼet iʻzâm edilerek 50 çuval un ve mikdâr-ı kâfi kinin tevzîʻ edilmişdir. _______________ Muhâcirlere Muʻâvenet Muhtelit Mübâdele Komisyonu Reîsi Mösyö de Lara cenâbları iki yüz elli dolar teberruʻ bu- yurmuşlardır. _______________