HİLÂL-İ AHMER MECMÛʻALARI / CİLT 4

1872 Dördüncü Sene 19Cemâziyelâhir sene 1343 / 15Kânûn-ı Sânî sene 1341 (1925) Numara 41 Makâlât ve İʻlânât, Mecmûʻa Müdüriyeti'ne Gönderilmelidir. TÜRKİYE HİLÂL-İ AHMER MECMÛʻASI Derc Edilmeyen Evrâk ve Makâlât İʻâde Edilmez. Her Ayın On Beşinde Neşrolunur. Senelik abonesi bir liradır. Merciʻi: Yerebatan Câddesi'nde Hilâl-i Ahmer Merkezi. Telefon: İstanbul 1783 Mündericât: Teksîr-i Aʻzâ Mesʼelesi – İctimâʻî Hıfzıssıhha – Amerika'da Salîb-i Ahmer Propaganda Vâsıtaları – Hilâl-i Ahmer Havâdisi – Salîb-i Ahmerler Havâdisi – Kitâbiyât – Muktebesât – Detroit Hilâl-i Ahmer Cemʻiyeti İʻâne Listesi – Teberruʻât – Fransızca Kısmı – İngilizce Kısmı TEKSÎR-İ AʻZÂ MESʼELESİ Aʻzâsının ehemmiyet-i adediyesine istinâd etmeyen herhangi bir Hilâl veya Salîb-i Ahmer Cemʻiyeti'nin âtîsi muzlim olduğuna hükmedilebilir ve hiçbir Salîb-i Ahmer yalnız hâricden gelecek teberruʻât ve iʻânât ile müessesâtı masârıfını idâre ve idâmeye muvaffak olamaz. Vâkıʻâ, Hilâl-i Ahmer Cemʻiyeti harb, âfât ve mesâib gibi ahvâl-i fevkalâde zuhûrunda istim- dâdkâr hitâblarıyla hissiyât-ı kalbiyesini tehyîc etdiği halkın hazîne-i semâhatinden ve mezâyâ-yı mevhûbesinden pek çok istifâde etmekde olduğu kemâl-i minnet ü şükrân ile görülmekde ise de hâl-i tabîʻî ve huzûr u âsûdegî avdet etdikden sonra bu gibi mürâcaʻâtın netâyic-i fiʻliyesi pek mahdûd ve âdetâ ehemmiyetsiz bir dereceye tenezzül eder. Buna binâendir ki, âidâtını muntazaman teʼdiye eder kâfi aʻzâya mâlik bulunmayan cemʻiyât-ı mümâsile, bi'z-zarûr mahv u zevâle mahkûmdur. Fi'l-hakîka, birçok Salîb-i Ahmerlerde ve ez-cümle Cemâhîr-i Müttefika-i Amerika'nın şuʻa- bât-ı muhtelife faʻâliyetinde manzûr-ı çeşm-i takdîrimiz olan âsâr-ı muʻazzama-i terakkî ve inkişâf, tesâdüfî teberruʻât ve iʻânâtdan ziyâde, şübhesiz üç-dört milyon aʻzâsının muntazaman teʼdiye etdikleri âidât-ı seneviye sâyesinde vücûd bulmuşdur. Kezâ Çekoslovak Salîb-i Ahmeri çizdiği vâsiʻ ve muʻazzam programını üç yüz bine bâliğ olan aʻzâsının iştirâk-i mesâʻîsiyle kuvveden fiʻle çıkarmışdır. Bu îzâhâtımızla, bir Salîb-i Ahmer'in bir müessese-i milliye hâlinde taʻazzî ve tecellî edebilme- si için mutlakâ halkın bir ekseriyet-i kâhiresini kendisine celb ve mefkûre-i cemʻiyeti memleketin her tarafına neşr u taʻmîm etmek sûretleriyle şuʻûr-ı millî ve umûmî nâmını vereceğimiz hâlet-i rûhiyeyi yaratması lâzım geleceği kanâʻatini arz etmek istiyoruz.