HİLÂL-İ AHMER MECMÛʻALARI / CİLT 4

1530 Üçüncü Sene 13 Muharrem sene 1343 / 15 Ağustos sene 1340 (1924) Numara 36 Makâlât ve İʻlânât, Mecmûʻa Müdüriyeti'ne Gönderilmelidir. TÜRKİYE HİLÂL-İ AHMER MECMÛʻASI Derc Edilmeyen Evrâk ve Makâlât İʻâde Edilmez. Her Ayın On Beşinde Neşrolunur. Senelik abonesi bir liradır. Merciʻi: Yerebatan Câddesi'nde Hilâl-i Ahmer Merkezi. Telefon: İstanbul 1783 Mündericât: İctimâʻî Hıfzıssıhha – Malarya Mücâdelesi ve Kinin Fikdânı – Hilâl-i Ahmer Havâdisi – Salîb-i Ahmerler Havâdisi – Muktebesât – Fen ve İzdivâc – Teberruʻât – Fransızca Kısmı, İngilizce Kısmı İCTİMÂʻi HIFZISSIHHA -11- Nüfûs Siyâseti Epey zamândan beri hemen her milletde vird-i zebân olan "tekessür-i nüfûs" daʻvâsı son se- nelerde âlem ve mülkün geçirdiği tahavvül ve inkılâb üzerine "nüfûs siyâseti" şekline girivermişdir. El-yevm efrâdının refâh u saʻâdete nâiliyetini düşünen ve bunu bir umde ittihâz eden her hükûmet ve milletin düstûru nüfûs-servet siyâseti üzerine müesses olduğu düşünülürse, bu esâsât hakkında birkaç kelime yazmanın fâideden hâlî olmadığı anlaşılır. Nüfûs siyâseti sâdece nüfûsun çoğalması ve kalabalığından ibâret değildir. Nitekim kesâfet-i nüfûsa mâlik nice hükûmet ve kabîlelerin hâl-i hâzırda ne hâlde oldukları mechûl olmadığı gibi istik- bâllerinin ne olacağı da muhtâc-ı îzâh olmasa gerekdir. Nüfûs daʻvâsının teʼsîrâtı mahsûs olabilmek için her ferdin sıhhat-i tâmmede şuʻûrlu ve mefkû- re sâhibi olması lâzımdır. Bu cihetle ferdî terbiyeye icrâ-yı teʼsîr edecek maʻârif-i ibtidâiye teessüs etmeden bu daʻvâ netâyicinden ümîdvâr olmak beyhûde olur. Nüfûs siyâsetinde kemiyetin derece-i teʼsîri inkâr edilememekle berâber keyfiyetin de ne ka- dar hâkim olacağını düşünmek iktizâ eder. Bilhâssa ferdî benliğe temâs eden keyfiyet mesʼelesi son zamânda uzun uzadıya münâkaşâtı mûcib olarak daha ehemmiyetli bir şekil almışdır. Almanya'da son aylar zarfında inhifâz ve ihtilâl rûhu musâbları ile humk ve belâhet muttasıfî- ninde zürriyetlerinin katʻî çârelerine tevessül edilmesi ve bu husûsun tıbb-ı adlî nokta-i nazarının hak kazanarak karâr tahtına alınması keyfiyet-i husûsunun nüfûs daʻvâsında oldukça ehemmiyete alındığını isbât edecek bir delîl sayılabilir. Fi'l-hakîka bu kabîl eşhâsın teşkîl etdiği âile ve ensâlden cemʻiyet-i beşeriyenin istifâde edemediğinden başka çok defa mazarrat bile gördüğü yapılan istatis- tiklerden anlaşılmışdır.