HİLÂL-İ AHMER MECMÛʻALARI / CİLT 5

Türkiye Hilâl-i Ahmer Mecmû‘ası Sayı 44 2050 3-Gerek İtalya mektebleri arasında ve gerek ecnebî mektebleriyle imkân müsâʻid olduğu derece- de fazla revâbıt teʼsîs etmek sûretiyle çocukların taʻallüm ve istifâde-i mütekâbilelerine hizmet etmek ve aynı zamânda vekâyiʻ ve şüûnât-ı medeniyeye ve memleketin mekteb-i hayâtına âid maʻlûmât ve ihbârâtı mektûbla tasvîr etmek, memleket fotoğrafîleri, mekteb filmleri, [298] el işleri, hedâyâ teʻâtîsi ve îcâbı takdîrinde muʻâvenet-i nakdiye irsâli 4-Çocuklar arasında tesânüd duygusunu inkişâf etdirmek ve onlarda memleketin bir kıtʻasından diğerine ve bir milletden âhar millete âlî-cenâbâne hareket etmek arzusunu uyandırmak ve büyük Salîb-i Ahmer'in teceddüd ve ihyâkâr mesâʻîsine gençliği ihzâr ederek halk hıfzıssıhha tedrîsâtı hak- kında yapacağı teşvîkâtın mühim bir kısmını etfâle tevdîʻ etmek. (Mâbaʻdi var.) GENÇLİK SALÎB-İ AHMERİ'NDEN BİR MEKTÛB NUMÛNESİ Cemâhîr-i Müttefika'da Ohio Hükûmeti dâhilinde Toledo şehri Gençlik Salîb-i Ahmeri'nden Belçika Gençlik Salîb-i Ahmeri'ne gönderilen âtîdeki mektûbu memleketinin diğer milletlerle ce- reyân eden münâsebâtını şâkirdlerine anlatmak husûsunda bir muʻallimin yapabileceği şeylere güzel bir numûne olduğu için kârilerimize takdîm ediyoruz: "-Toledo, Maumee nehrinin iki sâhili üzerine mebnî bir şehirdir. Şehrin iki kısmı arasındaki irtibât ve münâsebât müteʻaddid köprülerle teʼmîn edilmişdir. Bunlardan biri bir mil tûlünde bulunan Fassett Sokağı köprüsüdür ki, mektebimizden birkaç yüz metre buʻd mesâfededir. Fikren bu köprü üzerinde bulunduğumuzu farz ederek öğrendiğimiz coğrafyayı âtîdeki satırlarda okuyabilirsiniz. Göllerde seyreden cesîm vapurlardan birinin nehrin rıhtımına halatlarla merbût bulunduğunu görüyoruz. Buğday nakleden bu cüsseli, iri vapur 600 kadem tûle mâlikdir. Bu vapur, Duluth limanına civâr olan cesîm tarlalarda nâz ve edâ ile sallanan buğday ve keteni yükleyerek göllerden gelmişdir. Buğdayın Port Arthur limanından Kanada'ya gelmiş olması muh- temel olduğu gibi Toledo değirmenlerine veya Belçika'ya veyâhûd Avrupa'nın değirmen fabrikaları bulunan diğer büyük merâkizine sevk edilmesi de vârid-i hâtırdır. Vapurdan buğdayı çıkarmak için cesîm bir kule içinde bir makine vardır. Bu makine beheri on iki buçuk kilo olan 250.000 kile buğdayı aʻzamî iki buçuk günde boşaltır. Toledo'ya ihrâc edilen veyâhûd şehrimizden geçip giden bu buğdayın manzarası bizi dünyâda buğday müstahsili ve buğday müstehliki olan memleketleri ayrı ayrı tedkîke sevk ve daʻvet ediyor. Toledo civârında zerʻ edilen pancarlardan istihsâl olunan şeker için Maumee nehrinin sağ sâ- hilinde ve biraz ileride bir şeker fabrikası görülür. Bu fabrikaya vagonlar, kamyonlar dolusu pancar ihrâc edilir. Fabrikanın feyz ve ikbâli tamâmen cihân pancar istihsâlâtına tâbiʻ bulunduğundan yedi- ğimiz şekerleme ve kurâbiye, gatoların fiyâtına aksâm-ı sâire-i cihânın pancar tarlaları ve memâlik-i hârre şekerkamışı zerʻiyâtının mühim teʼsîri olduğunu bilmeğe mecbûruz. Şeker fabrikası yakınında kâinâtın evânî-i züccâciye ihtiyâcâtını idâre eden Edward Ford Câm İʻmâlâthânesi vardır.