HİLÂL-İ AHMER MECMÛʻALARI / CİLT 5

2110 Dördüncü Sene 21 Şevvâl sene 1343 / 15 Mayıs sene 1341 (1925) Numara 45 Makâlât ve İʻlânât, Mecmûʻa Müdüriyeti'ne Gönderilmelidir. TÜRKİYE HİLÂL-İ AHMER MECMÛʻASI Derc Edilmeyen Evrâk ve Makâlât İʻâde Edilmez. Her Ayın On Beşinde Neşrolunur. Senelik abonesi bir liradır. Merciʻi: Yerebatan Câddesi'nde Hilâl-i Ahmer Merkezi. Telefon: İstanbul 1783 Mündericât: İctimâʻî Hıfzıssıhha – Gençlik Salîb-i Ahmeri – Samaritenler Cemʻiyeti – Telsiz Telefon ve Salîb-i Ahmer – Hilâl-i Ahmer Havâdisi – Salîb-i Ahmer Havâdisi – Hilâl-i Ahmer Semt Teşkîlâtı – Fransızca Kısmı – İngilizce Kısmı İCTİMÂʻÎ HIFZISSIHHA -20- Kuduz İnsân ve hayvânâtda müşterek olan sârî bir hastalık da kuduzdur. Mîlâddan dört asır evvel bile maʻlûm ve münteşir olan kuduz esbâbı, vikâye ve tedâvîsi maʻlûm oluncaya kadar dünyâda yüz bin- lerce musâb ve tahrîbât yapmış ve oldukça mühim bir âfet hükmüne geçmişdir. Mîlâddan sonra hastalığın ısırılmak netîcesi husûle geldiği anlaşılmış ve çâre olarak bir zamân- lar ısırılan yeri tamâmen kesip çıkarmak ve bir zamânlar da dağlamak usûlleri tavsiye ve tatbîk edil- mişdir. Hastalığın esbâb ve tahaffuz çâreleri ancak on dokuzuncu asırda anlaşılarak tatbîk edilmeğe başlanmış ve bundan sonra dâülkelb müesseseleri ihdâs edilerek yapılan aşı sâyesinde beşeriyet bu belâdan kurtulmuşdur. Hayvânâtın bir kısmında münteşir olan hastalık diğer bir kısmını muʻâf kılmakdadır. Kuduz en ziyâde köpeklerde münteşir olduğundan eskiden beri dâülkelb nâmıyla tevsîmine sebeb olmuşdur. Kurd, koyun, deve, at, sığır, keçi, domuz, kedi gibi hayvânâtda da görülür. Hattâ Türk edebiyât-ı tıbbiyesinde tuyûrdan horoslarda görüldüğü de mezkûrdur. Avrupa'dan şarka doğru gidildikçe kuduzun artdığı müşâhede edilir. İngiltere gerek vazʻiyet-i coğrafiyesi iktizâsı ve gerekse aldığı şiddetli tedbîrler sâyesinde bu âfetden kolayca masûn kalmışdır. El-yevm Britanya adalarına hâricden köpek idhâli kânûnen memnûʻ olduğundan kuduz virüsü bu