HİLÂL-İ AHMER MECMÛʻALARI / CİLT 5

2162 Dördüncü Sene 23 Zilkaʻde sene 1343 / 15 Haziran sene 1341 (1925) Numara 46 Makâlât ve İʻlânât, Mecmûʻa Müdüriyeti'ne Gönderilmelidir. TÜRKİYE HİLÂL-İ AHMER MECMÛʻASI Derc Edilmeyen Evrâk ve Makâlât İʻâde Edilmez. Her Ayın On Beşinde Neşrolunur. Senelik abonesi bir liradır. Merciʻi: Yerebatan Câddesi'nde Hilâl-i Ahmer Merkezi. Telefon: İstanbul 1783 Mündericât: İctimâʻî Hıfzıssıhha – Mühim Bir Menbaʻ-ı Vâridât – Nightingale Madalyası – İmparotoriçe Shôken Vakfı – Kansere Karşı Vesâyâ – Malarya – Belîğ Rakamlar – Hilâl-i Ahmer Havâdisi – Salîb-i Ahmer Konferansı – Salîb-i Ahmerler Havâdisi – Rockefeller Müessesesi – Semt Teşkîlâtı – Muktebesât (Frengi) – Fransızca Kısmı – İngilizce Kısmı İCTİMÂʻÎ HIFZISSIHHA -21- Frengi Mücâdelesinde Hutût-ı Esâmiye Harb-i Umûmî esnâsında ve Mütâreke'yi müteʻâkib beşeriyeti ve müstakbel nesilleri tehdîd edecek gibi görünen bir hastalık da frengi olmuşdu. Fi'l-hakîka bütün dünyâda bir tarafdan sefâlet, diğer tarafdan sefâhetin tebellür etdiği öyle bir hengâmda fuhşun ve bi'n-netîce emrâz-ı zühreviyenin tekessür etmemesi gayr-ı mümkin idi. Mütemâdî zevk u tarab âlemleri içinde hemen her sınıf halkdan harb kazançları vergisi şeklinde bu âfete yakalananlar görüldü. Mestî-i humâra intizâm eden mestî-i vuslat ne olduklarını pek çabuk unutan bu bedbahtların kanlarına şahıslarından ziyâde nesillerini tehdîd edecek, tehlikeye koyacak bir zehir sokmuş oldu. Hiç umulmayan âile ve çiftlerde tenebbüt eden frengi çiçekleri hassâs ve dûr-endîş etıbbâ mâbeyninde münâkaşâta bile vesîle oldu. Hattâ bu hâle muttaliʻ olan ve rakam hesâbının ne olduğundan bî-behre kalan bazı ukalâ ve üdebâ musâfaha edilen her sekiz elin birini frengilidir diye iddiʻâya bile kalkdılar. İstatistik denilen büyük sanʻatın son asırdaki terakkiyâtından, hakâyıkın tesbîtindeki kudretinden bîgâne idiler. Devr-i sulh ve binâberîn hâl-i tabîʻî kısmen olsun teessüs etdikden sonra harbin husûle getirdiği felâketlerin zâil olacağı bedîhî idi. Bu meyânda nesilleri tehdîd eden, tenâkus-ı nüfûsda en ehemmi- yetli rol oynayan frenginin teʼsîrâtı da yavaş yavaş zâil olacağı hiç şübhesiz ümîd ediliyordu. İşte bugün ne o gayr-ı tabîʻî kazanç devirleri kalmış ne de mütemâdî sefâhet âlemleri devâm etmekde bulunmuşdur. Binâberîn tevessüʻ ve intişârı hemen de fuhuş âlemlerine merbût olan bu hastalık [370] gün geçdikçe azalmış ve hattâ bugün gerek serîriyât ve gerekse hastahânelerde âfet-i ibtidâiye ve tâze frengi çiçeklerini hâmil olan hastaların müşâhedesi bir tesâdüfe bağlı kalmışdır.