HİLÂL-İ AHMER MECMÛʻALARI / CİLT 5

2246 Beşinci Sene 24 Muharrem sene 1344 / 15 Ağustos sene 1341 (1925) Numara 48 Makâlât ve İʻlânât, Mecmûʻa Müdüriyeti'ne Gönderilmelidir. TÜRKİYE HİLÂL-İ AHMER MECMÛʻASI Derc Edilmeyen Evrâk ve Makâlât İʻâde Edilmez. Her Ayın On Beşinde Neşrolunur. Senelik abonesi bir liradır. Merciʻi: Yerebatan Câddesi'nde Hilâl-i Ahmer Merkezi. Telefon: İstanbul 1783 Mündericât: [1]341 [1925] Senesi Meclis-i Umûmî Müzâkerâtı – Hilâl-i Ahmer Çay Ziyâfeti Münâsebetiyle – Hilâl-i Ahmer Havâdisi – Salîb-i Ahmerler Havâdisi – Fransızca Kısmı – İngilizce Kısmı [1]341 [1925] SENESİ MECLİS-İ UMÛMÎSİ Hilâl-i Ahmer Cemʻiyeti'nin senelik meclis-i umûmîsi Temmuz'un on yedinci günü ikiyi çâryek geçe Dârülfünûn Konferans Salonu'nda ilk ictimâʻını akdetmişdir. İctimâʻda İstanbul, Beyoğlu, Üsküdar Heyʼet-i Merkeziyeleri aʻzâsıyla Anadolu ve Trakya'nın muhtelif mevâkiʻinden müntehab yüz elliyi mütecâviz aʻzâ hâzır bulunmuşdur. Meclis-i umûmîyi, Hilâl-i Ahmer Merkez-i Umûmîsi Reîs-i Sânîsi Müderris Doktor Âkil Muh- tar Bey açmış ve meclisin küşâdı münâsebetiyle âtîdeki nutku îrâd etmişdir: Reîs Âkil Muhtar Bey: "-Hanımefendiler, Efendiler, 1341 [1925] senesi Hilâl-i Ahmer Heyʼet-i Umûmiyesi bugün yeni nizâmnâmeye, daha doğrusu taʻdîl olunan mevâdd-ı nizâmiyeye tevfîkan burada ictimâʻ ediyor. Heyʼet-i merkeziyemiz, burada bulunan aʻzâ-yı kirâma beyân-ı hoş-âmedî etmeğe beni tevkîl etdi. Gâyetle mühim bir takım mesâil müzâkere ve hallolunacakdır. Fakat evvel emirde aʻzâ-yı kirâmın esâmîsi okunacakdır, efendim. Mevcûd ve nâ-mevcûd olanlar belli olsun, sonra da bir reîs, iki reîs-i sânî intihâb edeceğiz". (Aʻzânın isimlerini hâvî cedvel kırâat ve mevcûd bulunmayanların isimleri hizâsına işâret edildi.) Operatör Emin Bey: "-Efendim, bendeniz Cebel-i Bereket'den intihâb edilmiş idim. Burdur'dan da murahhas intihâb edildim. Hâlbuki iki mahal murahhaslığının bir şahısda ictimâʻına nizâmnâme- miz müsâʻid değildir. Yalnız Cebel-i Bereket murahhası olarak bulunacağım. Burdur'a da başkasını tevkîl edeceğim ve kendilerine telgrafla arz-ı keyfiyet edeceğim". Reîs: "-O hâlde efendim, şimdi rüesânın intihâbına geçiyoruz. Maʻlûm-ı âlîniz reʼy-i hafî ile bir reîs, iki reîs-i sânî intihâb olunacak". [2] (Reîs ve reîs-i sânî intihâbı yapıldı. Ârâ baʻde't-tasnîf netîce ber-vech-i zîr heyʼet-i umûmi- yeye arz olundu.)