HİLÂL-İ AHMER MECMÛʻALARI / CİLT 5

1944 Dördüncü Sene 21 Receb sene 1343 / 15 Şubat sene 1341 (1925) Numara 42 Makâlât ve İʻlânât, Mecmûʻa Müdüriyeti'ne Gönderilmelidir. TÜRKİYE HİLÂL-İ AHMER MECMÛʻASI Derc Edilmeyen Evrâk ve Makâlât İʻâde Edilmez. Her Ayın On Beşinde Neşrolunur. Senelik abonesi bir liradır. Merciʻi: Yerebatan Câddesi'nde Hilâl-i Ahmer Merkezi. Telefon: İstanbul 1783 Mündericât: Mekâtibde Sıtma Tedrîsâtı – Salîb ve Hilâl-i Ahmer Menşeʼleri – İctimâʻî Hıfzıssıhha – Salîb-i Ahmer ve Nakl-i Dem Ameliyâtı – Esperanto ve Salîb-i Ahmer – Hilâl-i Ahmer Havâdisi – Salîb-i Ahmerler Havâdisi – Teberruʻât – Fransızca Kısmı – İngilizce Kısmı MEKÂTİBDE SITMA TEDRÎSÂTI Maʻârif-i Umûmiye vekîl-i muhteremi beyefendiye, Amerika'nın her sene tezâyüd eden nüfûsuna ve akıllara hayret verecek servetine atf-ı nazar edildiği takdîrde esbâb u avâmilini tecessüse şitâbân olmamak elde değildir. Bu esbâb arasında en basît ve ehemmiyetsiz gibi görünen ve fakat netîceten en mühim bir âmil hükmüne geçen şeyler mevcûddur. Ez-ân cümle sıtma denilen âfet-i ictimâʻiye ile mücâdeleyi senelerden beri tatbîk edegelen Cemâhîr-i Müttefika bilhâssa son yirmi seneden beri bu hastalık ile her ferdi alâka etdirecek şekiller teʼsîs etmişdir. Rüşdî, iʻdâdî, lise derecesinde olan bi'l-umûm mekâtib-i umûmiyede husûsî mâhiyetde sıtma dersleri ve tatbîkâtı okundurarak yetişen ve yetişecek her ferde bu illetin esâsâtı, tahaffuz ve vikâye usûllerini öğretdirmiş ve neslin en muhrib bir belâ-yı ictimâʻîden kurtulmasına gayret etmişdir. Bu dersler hıfzıssıhha-i ictimâʻî mütehassısları tarafından sırasıyla her mektebde taʻlîm etdirili- yor ve tatbîkâtı da mevsimin münâsib günlerinde ve ekseriyâ ilkbahârda açık havâda her yetişen genç nesle bizzât yapdırılıyor. Farazâ mütehassıs muʻallim talebesini alarak kıra çıkıyor. Orada su birikintilerinde, tarlalarda, havuz ve kuyularda sivrisinek yumurtaları, sürfeleri olup olmadığını araştırıyor. Bataklık ve râkid su satıhlarında görebilecekleri hevâmm u haşerât aksâmını tefrîk u temyîze gayret ediyor. Uçuşan sivri- sinekler arasında anofel denilen haşerenin mevcûd olup olmadığı araşdırılıyor. [218] Bazı mıntıkalar halkının kısm-ı azîmi sıtmadan titreyen, solan, dalak sâhibi olan ve her bir köşesinde sivrisinek vızıltısından geçilmeyen memleketimizde bu husûsâtın ne kadar kıymetdâr olabileceğini düşünerek ve bütün mekâtib-i umûmiye ve husûsiye programlarına idhâlini temennî ederek bu suâlli-cevâblı dersleri aynen terceme ederek ber-vech-i âtî neşrediyoruz.