HİLÂL-İ AHMER MECMÛʻALARI / CİLT 5

Türkiye Hilâl-i Ahmer Mecmû‘ası Sayı 49 2405 TÜRKİYE HİLÂL-İ AHMER CEMʻİYETİ MERKEZ-İ UMÛMÎSİ TARAFINDAN [1]341 [1925] SENESİ HİLÂL-İ AHMER MECLİS-İ UMÛMÎSİ'NE TAKDiM EDİLEN [1]339-[1]340 [1923-1924] İKİ SENELİK DEVREYE ÂİD RAPOR [1]341 [1925] Senesi Meclis-i Umûmîsi Heyʼet-i Muhteremesi'ne, [1]339 [1923] senesi Kânûn-ı Evvel'inde alelâde ictimâʻını akdeyleyen meclis-i âlîleri, Harb-i Umûmî mütârekesinden iʻtibâren istiklâl muhârebâtının zaferle tetevvüc etdiği zamâna kadar güzerân olan ve Hilâl-i Ahmer'in gûnâgûn tazyîkât ve müşkilât altında bulunmasına rağmen târîhçe-i hayât [159] ve mesâʻîsinde pek parlak hidemâtı ihtivâ eden dört senelik devreye mütedâir merkez-i umûmî- nizin takdîm etdiği raporu büyük bir alâka ve iʻtinâ ile tedkîk ve mezkûr raporda arz u îzâh olunan icrâât ve buna müteferriʻ hesâbâtı tasvîb ve tasdîk buyurmuşdu. Yekdiğerini taʻkîb eden muhârebât ve bunların netîce-i tabîʻiyesi olan mesâibin cemʻiyetimizin uhdesine tevcîh etdiği hidemât ve faʻâliyetin hamûle-i mesʼûliyeti altında uzun müddet kalmış olan merkez-i umûmîniz, meclis-i âlîlerinin ictimâʻ-ı ahîri esnâsında aʻmâl-i mesâʻîsinin mazhar-ı tasvîb olması ve hesâbât-ı umûmiyesinin kabûl ve tasdîk edilmesiyle tebriye etdikden sonra artık senele- rin tedâhülüne meydân bırakmayarak nizâmnâmenin ahkâm-ı mahsûsasına tebaʻan her sene zamân-ı muʻayyeninde meclis-i umûmîyi ictimâʻa daʻvetle senelik icrââtının hesâbını vermek ve hengâm-ı sulhda cemʻiyete teveccüh eden hidemât-ı insâniyet-perverânenin sûret-i îfâsına müteʻallik yeni is- tikâmet vecheleri almak husûsundaki samîmî arzusuna rağmen bu defa da huzûr-ı âlîlerine iki senelik bir devre-i mesâʻînin hamûlesiyle çıkmak mecbûriyetinde kalmışdır. Maʻlûm-ı âlîleri olduğu üzere nizâmnâme-i esâsîmizin meclis-i umûmînin sûret-i teşekkülüne mütedâir mevâddında meclisce iştirâk husûsunda İstanbul vilâyetinde mukayyed aʻzâ-yı âmileye vilâyât-ı sâire aʻzâ-yı âmilesinden fazla bir hak bahşetmekde olan ahkâmı meclis-i âlîlerince kâʻide-i müsâvât ile kâbil-i teʼlîf görülmeyerek her vilâyet merkezinin mukayyed aʻzâ-yı âmilesi adedi nisbetinde meclis-i umûmîde hakk-ı temsîle mâ- lik olması esâsı kabûl edilmiş ve mevâdd-ı mezkûrenin bu sûretle taʻdîline karâr verilmişdi. Taʻdîlât-ı vâkıʻanın 25 Şubat [1]340 [1924] târîhinde karîn-i tasvîb-i âlî olduğu Dâhiliye Vekâlet-i Celîlesi'nden teblîğ buyurulması üzerine meclis-i âlîlerinin ictimâʻa daʻveti için muktezî istihzârâta başlanarak bi'l- umûm merkezlerimize yeni esâslar dâiresinde murahhaslarını intihâb eylemeleri teblîğ kılınmışdır. Ber-vech-i maʻrûz esbâb-ı zarûriyeden tevellüd eden teehhürün meclis-i âlîlerince dahi maʻzûr görüleceğini ümîd eyleriz. [1]339 [1923] senesi ibtidâsından [1]340 [1924] senesi gâyesine kadar geçen iki sene zarfında cemʻiyetimizin îfâ etdiği hidemâtın merkez-i umûmînize tahmîl etdiği mesâʻî, evvelâ meclis-i âlîleri- nin geçen ictimâʻda ittihâz eylediği mukarrerâtın tatbîki, sâniyen mübadeleye tâbiʻ vatandâşlarımızın muhâfaza-i sıhhat ve teʼmîn-i ihtiyâc ve istirâhatleri için mahrec ve mevridlerinde müessesât-ı imdâ- diye teşkîli ve yine bu maksad için Mübâdele Vekâleti'ne ve muhtelif makâmat-ı resmiyeye hastahâne malzemesiyle edviye ve melbûsât ve vesâit-i sıhhiye ve nakliye iʻtâsı, sâlisen memleketimizin bazı mahallerinde hâdis olan hareket-i arz, harîk, seylâb ve heyelân, kaht gibi âfâtın tahrîbâtına uğrayan binlerce felâketzedenin imdâdına koşmak, râbiʻan Hilâl-i Ahmer'in Beynelmilel Salîb-i Ahmerler âi- lesi arasındaki nüfûz ve mevkiʻini takviye ve iʻlâya hâdim olan konferansların tahmîl eylediği vezâifi îfâya sarf-ı gayret etmek, hâmisen Balkan Harbi'nden beri mütevâliyen devâm edegelmekde olan faʻâliyetin netîce-i tabîʻiyesi olarak cemʻiyetin vazʻiyet-i mâliyesinde hâsıl olan zaʻfı izâle ve kuvâ-yı mâddiye ve maʻneviyemizi tezyîd ü tarsine maʻtûf tedâbîr ittihâzı gibi başlıca fasıllara inkisâm eder.