HİLÂL-İ AHMER MECMÛʻALARI / CİLT 7

Türkiye Hilâl-i Ahmer Mecmû‘ası Sayı 62 3022 ÂFÂT VE MESÂİB-İ UMÛMİYEYE KARŞI HİLÂL VE SALÎB-İ AHMER MUʻÂVENET TEŞKÎLÂTI (Geçen nüshadan mâbaʻd) İlk Muʻâvenât İttihâd Edilecek Tedâbîr-i İbtidâiye Felâkete maʻrûz olan mahallerde Salîb-i Ahmer İmdâd ve Muʻâvenât Teşkîlâtı'na âid istihzârât-ı umûmiye arz etdiğimiz tarzda tertîb edilecek olursa bi'z-zarûre her felâketi taʻkîb eden herc ü mercin ve intizâmsızlığın vehâmeti bertaraf veya hiç olmazsa taʻdîl edilmiş olur. Bir de muʻâvenet komitesiyle teşekkül eden komisyonlar derʻuhde etdikleri vezâifi kemâl-i dikkatle îfâya müsâraʻat etmelidirler. Hilâl veya Salîb-i Ahmer merkez veya şuʻbe reîsinin ilk vazîfesi bu komisyonların derhâl icrââta geçmesini ve komisyonlar mesâʻîsinin bi-hakkın îfâsını teʼmîn etdik- den sonra o mahallin en büyük meʼmûr-ı mülkîsi nezdine azimetle imdâd ve muʻâvenete âid icrââta teşebbüs edildiğini ihbâr etmekdir. [49] Verilecek maʻlûmât pek az dahi olsa merkez-i umûmînin behemahâl telgrafla veya suver-i sâire ile bilâ-ifâte-i vakt felâketden haberdâr edilmesi ehemmiyetle telâkkî edilmelidir. İʻtâ edilecek ilk maʻlûmâtdan sonra felâketin vüsʻat ve şümûlüne, ölenlerin, mecrûhların, gâib- lerin, meskenden mahrûm kalanların, yıkılan ve ciddî sûretde dûçâr-ı hasâr olan hânelerin mikdârına ve en ziyâde muktezî muʻâvenetin cins ü nevʻine dâir îzâhât-ı sarîha ve mütemmime verilecekdir. *** Bir Merkez-i İdâre İntihâbı Muhtelif komisyonların ayrı ayrı îfâ-yı vazîfe edebilmelerine müsâʻid bir veya birden fazla binâlarda müsâraʻaten bir merkez-i idâre teʼsîs edilecekdir. Ekseriyâ bu husûsda bir mekteb binâsı tercîh olunmakdadır. Âfetzede halkın faʻâliyetine muktezî mebânî ile câmiʻ ve kiliseler merkez-i idâre ittihâz olunmamalıdır. *** Fişler Felâketden müteessir olan muhtâc-ı muʻâvenet âilelerin vazʻiyetleri ve her âilenin ihtiyâcât-ı mühimmesi ber-vech-i âtî bir cedvel şeklinde tesbît edilecekdir: - Âilenin İsmi - Pederin İsim ve Mahlası - Vâlidenin İsim ve Mahlası - Çocukların İsimleri - Felâketden Evvel Oturdukları Mahal - Değişmiş ise Hâl-i Hâzırdaki Adresi