HİLÂL-İ AHMER MECMÛʻALARI / CİLT 8

Türkiye Hilâl-i Ahmer Mecmû‘ası Sayı 74 3750 SALÎB-İ AHMERLER HAVÂDİSİ Belçika'da Gençlik Salîb-i Ahmer Hafta ve Konferansı Brüksel'de ilk defa Temmuz'un yirmi beşinden otuzuna kadar tertîb edilen Salîb-i Ahmer hafta- sının resm-i küşâdı yirmi dokuz memleketi temsîl eden altmış altı murahhasın huzûruyla 25 Temmuz sabâhı icrâ edilmişdir. Bu münâsebetle Belçika Salîb-i Ahmer Reîsi Mösyö Nolf, cemʻiyet nâmına ve Maʻârif-i Umûmiye Kâtib-i Umûmîsi, Ulûm ve Fünûn Vekâleti nâmına murahhaslara beyân-ı hoş-âmedî etdikden sonra Belçika Salîb-i Ahmer Müdür-i Umûmîsi Mösyö Dransart ittifâk-ı ârâ ile konferans riyâsetine intihâb olunmuşdur. Bundan evvel, 1925 senesinde münʻakid ilk konferans Gençlik Salîb-i Ahmer programının ter- biyevî metodlarla tetâbuk edip etmediğini tedkîk ve ikinci defa Gençlik Salîb-i Ahmerler Mecmûʻa- ları muharrirlerinden teşekkül eden 1926 senesi konferansı da [75] işbu mecmûʻalar mündericâtı hakkında vukûʻ bulan teklîfât-ı ıslâhkârâne ve teceddüd-perverâneyi kabûl etmiş idi. Üçüncü defa inʻikâd eden 25 Temmuz konferansı ise muhtelif memleketler mürebbîleri tarafın- dan tatbîk olunan metodları münâkaşa ve mukâyese etmiş ve bu mürebbîlerin muvaffakiyet ve adem-i muvaffakiyetlerinin taʻyîn ve tahlîl esbâbına ve'l-hâsıl her memleketde Gençlik Salîb-i Ahmeri'nin hayât-ı yevmiyesini tedkîke hasr-ı mesâʻî eylemişdir. Konferansın mâ bihi'l-iştigâli olan mevâd arasında Gençlik Salîb-i Ahmeri'nin umûmî pren- sipleri, mâhiyet-i esâsiyesi, vazîfesi, metodları, taʻkîb etdiği gâye, tedrîsât sistemindeki mevkiʻi, ana Salîb-i Ahmer'i münâsebâtı hiçbir ihtilâfı mûcib olmamışdır. _______________ Japon Çocuk Bakım Sergisi Japonya Salîb-i Ahmeri'nin kendi müzesinde 3 Mayıs'dan 16 Mayıs'a kadar tertîb etdiği bir çocuk bakım sergisini günde asgarî 1.000 kişi ziyâret etmişdir. Vâlide ve çocuk hıfzıssıhhasının basît usûl ve kavâʻidini halka göstermek maksadıyla açılan bu serginin bir kısmında vâlidenin ve çocuğun sıhhatine taʻalluk eden mesâil afişler, mulajlar ve anlama- sı kolay istatistiklerle gösterilmişdir. Çocukluğa tahsîs edilen kısımda ise küçüklerin istihmâm, iğtizâ ve ilbâsında taʻkîb edilecek usûller bebeklerle tasvîr olunmuşdur. Emzik çocuklarının yaşlarına nazaran sıklet-i hakîkiyeleri, terâzîlere ilsâk edilmiş matbûʻ va- rakalarda gösterilmişdir. Bu varakalarda vâlidelerin bebeklerini vezn etdirmeleri ayrıca tavsiye olun- makdadır. Sergi devâm etdiği müddet zarfında çocuk hıfzıssıhhası hakkında umûmî konferanslar verilmiş ve ayrıca bir çocuk muʻâyene merkezi açılmışdır. _______________