HİLÂL-İ AHMER MECMÛʻALARI / CİLT 8

Türkiye Hilâl-i Ahmer Mecmû‘ası Sayı 69 3418 lavta ve fennî ebe yetiştirmek, vilâdethâneler açarak doğumu fennî bir hâle getirmek, anneleri çocuk bakımı husûsunda hâzırlamak, irzâʻ-ı tabîʻîyi teşvîk, çocuk bakıcı nörsler yetiştirmek, meccânî çocuk muʻâyene merkezleri açmak ilh. gibi tedâbîrden ibâretdir. İNSÂNLARAVE MESKENLERE MUSALLAT OLAN TUFEYLÎ HAYVÂNLAR -1- Tahtakurusu Pek nâdiren tehlikeli tohum-ı emrâzı nakle vâsıta olan tahtakurusu veya nâm-ı diğerle tahta biti basît bir tufeylî numûnesidir. Hummâ-yı râciʻayı nakilde tahtakurularına faʻâl bir rol atfedenler bulunduğu gibi Fransa Fünûn Akademisi aʻzâsından bir zât da tahta bitinin telkîhiyle mevti dâʻî bir şîrpençe zuhûr etmesi vekâyiʻ-i nâdireden olmak üzere kaydedilmekdedir. Lung, cüzâmlı bir şahsı ısırmış tahta bitinde cüzâm basiline tesâdüf etdiğini haber veriyor. Maʻamâfîh insân kanı emen haşerâtın bu gibi vekâyiʻ-i maraziyeye vâsıta-i sirâyet olmasında bir fevkalâdelik görülemez ve sârî hastalık mikroblarının intişârına tahta biti bir tehlike dahi teşkîl edemez. Tahtakurusu, çokluk hareketi sevmez, gayr-ı seyyâr ve binâenaleyh bütün hayâtında doğduğu yatakdan ayrılmayan bir hayvândır. Tahtakurularının misâfir olduğu yatağın sâhibi değişmedikçe tehlikeli tohum-ı emrâzın intişâ- rı bile mevzûʻ-ı bahis olamaz ise de otel veya hastahâne yataklarında bu tehlike derpîş edilebilir. Maʻamâfîh şimdiye kadar bu gibi bir sirâyet vakʻasına tesâdüf edilmemişdir. Vebâ basilinin tahtakurusunda uzunca müddet mukâvemet etdiği her ne kadar Menyel ve Pako taraflarından müşâhede edilmiş ise de Thomson'un ve diğer iki tabîbin başka başka yapdıkları tecrü- beler dâimâ menfî netîceler vermişdir. Veremin tahtakuruları vâsıtasıyla intikâl edebileceği hakkında diğer bir tabîbin beyânâtı muh- tâc-ı teeyyüddür. Son derece iğrenç ve herkes için mûcib-i endîşe ve azâb olan bu tufeylînin tecâvüzüne karşı müdâfaʻa vâsıtalarımız henüz pek noksândır. Bazı hâne ve apartmanlarda tahtakurularının [345] verdiği râhatsızlık işkence derecelerine vâsıl olduğu öteden beri maʻlûmdur. Memâlik-i ecnebiyede böyle bir tahtakurusu istîlâsında müsteʼcirlerin fesh-i îcâr maksadıyla mehâkime mürâcaʻatla lehlerinde istihsâl-i hükm etdikleri de vâkiʻdir. Tahta biti hilkaten batî ve gayr-ı seyyâr bir tufeylî-i leylî olup aslâ kendiliğinden uzak mesâfe- lere gidemez. Bu tufeylî bir göç arabasıyla âhar mahalle nakledilmedikçe yuvasını terk etmez ve nakledildiği eşyâdan da ayrılmaz. Tahtakurusu hiçbir zamân sokağın bir tarafından diğer cihetine veya bir evden câddenin mukâbil cihetindeki eve geçmez.