HİLÂL-İ AHMER MECMÛʻALARI / CİLT 9

3909 Yedinci Sene 21 Receb sene 1346 / 15 Kânûn-ı Sânî 1928 Numara 77 Makâlât ve İʻlânât, Mecmûʻa Müdüriyeti'ne Gönderilmelidir. TÜRKİYE HİLÂL-İ AHMER MECMÛʻASI Derc Edilmeyen Evrâk ve Makâlât İʻâde Edilmez. Her Ayın On Beşinde Neşrolunur. Senelik abonesi bir liradır. Merciʻi: Yerebatan Câddesi'nde Hilâl-i Ahmer Merkezi. Telefon: İstanbul 2653 Mündericât: Kimyâ Harbi – Hayât ve Ölüm Nedir? – Gebe Kadınlara Yardım – Sebzeler – Hilâl-i Ahmer Havâdisi – Salîb-i Ahmer Havâdisi – Fransızca Kısmı – İngilizce Kısmı İʻtizâr.- Mündericâtımızın kesretine mebnî "İctimâʻî Hıfzıssıhha" makâlemizle "İnsânlar ve Meskenlere Musallat Olan Tufeylî Hayvânlar"ın mâbaʻdi bu nüshaya vazʻ edilememişdir. KİMYÂ HARBİ Bir milletin harb hengâmında muhnik gazlar istiʻmâl edebilmesi keyfiyeti kırk seneye yakın bir zamândan beri gerek hükûmetleri ve gerek efkâr-ı umûmiye-i medeniyeyi şiddetle işgâl eden mesâil-i mühimmedendir. Fi'l-hakîka Cihân Harbi'nde zehirli gazların ilk defa harb silâhı olarak istiʻmâlinden sonra bu müdhiş ihtirâʻın beşeriyet için ne büyük bir tehlike ve felâket teşkîl etdiği büsbütün meydâna çıkmışdır. Mütâreke'nin akdini müteʻâkib fennin seneden seneye mazhar olduğu terakkiyât ve inkişâfâtıy- la yeniden birçok muhnik gazların keşif ve ihtirâʻ edildiği maʻlûmdur. Her türlü vesâit-i himâyeye mâlik olmasına rağmen hattâ ordu mensûbînine ve bilhâssa maʻsûm halka bu korkunç ve vahşî harb silâhının yapacağı fenâlık bütün cihân efkâr-ı umûmiyesince daha şimdiden telâş ve heyecân ile derpîş edilmekdedir. Fâciʻât-ı harbiyeyi bir kat daha tezyîd eden bu gibi ihtirâʻâtın menʻ-i istiʻmâli veya hiç olmazsa mazarrâtı emrinde Beynelmilel Salîb-i Ahmer konferansları ve Cenevre Salîb-i Ahmer Merkez Komi- tesi, Hilâl ve Salîb-i Ahmer Cemʻiyetleri, ve'l-hâsıl şekl-i timsâli "harbde şefkat" (inter arma caritas) olan bi'l-cümle teşkîlât taharrî-i vesâite bütün mevcûdiyetleriyle sarf-ı mesâʻî etmekden hiçbir zamân hâlî kalmamış ve kalmayacaklardır. Ahîren Cenevre Beynelmilel Salîb-i Ahmer Merkezi kimyâ harbine karşı sivil ahâlînin himâ- yesini teʼmîn edecek tedâbîri tedkîk ve taharrî husûsunda vazîfe-i reh-nümâyı îfâ etmek maksad-ı