HİLÂL-İ AHMER MECMÛʻALARI / CİLT 9

4246 Yedinci Sene 25 Zilhicce sene 1346 / 15 Haziran 1928 Numara 82 Makâlât ve İʻlânât, Mecmûʻa Müdüriyeti'ne Gönderilmelidir. TÜRKİYE HİLÂL-İ AHMER MECMÛʻASI Derc Edilmeyen Evrâk ve Makâlât İʻâde Edilmez. Her Ayın On Beşinde Neşrolunur. Senelik abonesi bir liradır. Merciʻi: Yerebatan Câddesi'nde Hilâl-i Ahmer Merkezi. Telefon: İstanbul 2653 Mündericât: İctimâʻî Hıfzıssıhha – Hilâl-i Ahmer Meʼmûrîn Nizâmnâmesi – Henry Dunant'a Âid Bir Vesîka-i Târîhiye – Hayât ve Ölüm Nedir? Niçin İhtiyârlıyoruz? – Tütün İçenlere – Hilâl-i Ahmer Havâdisi – Salîb-i Ahmer Havâdisi – Fransızca Kısmı – İngilizce Kısmı Büyük Gâzî'nin İstanbul'u Teşrîfleri Cemʻiyetimizin hâmî-i muʻazzamı Reîsicumhûr Gâzî Mustafa Kemal hazretleri Haziran'ın be- şinci günü İstanbul'u teşrîf etdiler. Gâzî hazretleri geçen sene olduğu gibi bu sene de halkın azîm tezâhürleriyle istikbâl olundu. Türkiye Hilâl-i Ahmer Mecmûʻası İstanbul'un azîz ve muhterem misâfiri büyük halâskâra bu vesîle ile de en hâr taʻzîmâtını takdîm eder. [474] İCTİMÂʻÎ HIFZISSIHHA -53- Salgın Hastalıklar ve Tarz-ı Sirâyetleri Vüstâî birçok hastalıkların beşeriyete savlet ederek dünyâda milyonlarca kitle ve nüfûsu mahv etdiklerini târîhde okumayan kalmamış gibidir. Ecdâdımızın bu gibi düşman ve salgınlar ile ne dere- ce ve nasıl mücâdele ve mübâreze etdikleri hakkındaki bugünkü maʻlû[mâ]tımız el-ân pek sathî ve nâ-kâfidir. Ancak şu husûsu katʻî sûretde biliyoruz ki, onlar kendilerine hücûm eden bu gibi düşman- lara karşı müdâfaʻa tertîbâtı ve muhârebe techîzâtı ile mücehhez değildiler. Gerçi akılları erebildiği ve fikirleri düşünebildiği kadar bir kısım hastalıkların esbâb ve tarz-ı savleti hakkında bazen hakîkate biraz tevâfuk eder şekilde bast-ı makâl etmişlerdir. Fakat çok kere hurâfât çerçevesi içerisinde kal- mışlar, hattâ târîh-i tıbbî ve sıhhîlerine hastalık esbâb ve tekevvünü hakkında cin ve peri sultalarını bile kaydetmişlerdir.