HİLÂL-İ AHMER MECMÛʻALARI / CİLT 1

Osmanlı Hilâl-i Ahmer Mecmû ‘ ası Sayı 3 71 [52] Viladivostok Üserâsının Mâcerâsı Geçen nüshamızda Viladivostok'dan Haimai-Maru vapuruyla gelen Osmanlı üserâsının Anado- lu-Yunan Harbi'nin nihâyetine kadar İtalya'da ikâme edilmeleri hakkında Bâbıâli ile İtalya Hükûmeti arasında müzâkerât cereyân etdiğini yazmış idik. İstihbârâtımıza nazaran Haimai-Maru vapuru üserâ- yı mezkûreyi Teşrîn-i Evvel'in on sekizinde [18 Ekim] Sardinya adasının Asinara limanına ihrâc et- mişdir. Üserâ bu limanda Hükûmet-i Osmaniye hesâbına iʻâşe, ilbâs ve ibâte edilecekdir. Hilâl-i Ahmer Cemʻiyeti nâmına bu müşkil mesʼelenin hüsn-i sûretle hallinde saʻy ü gayreti sebk eden Japonya'nın Dersaadet Sefâreti erkânına ve Beynelmilel Salîb-i Ahmer Cemʻiyeti İstanbul Mümessili Mösyö Burnier cenâblarına ve Cenevre Beynelmilel Salîb-i Ahmer Merkezi'ne takdîm-i şükr ü minneti vecîbeden addederiz. _______________ Ecnebî Salîb-i Ahmerler ve Gümrük Resmi Ecnebî Salîb-i Ahmerler tarafından memâlik-i ecnebiyeden celb eden eşyânın gümrük resmin- den sûret-i muʻâfiyeti hakkında Dâhiliye Nezâreti tarafından vukûʻ bulan istîzâha, Hilâl-i Ahmer Merkez-i Umûmîsince îzâhât-ı âtiyenin iʻtâsına müsâraʻat edildi: "-Bu gibi cemʻiyâtın Hilâl-i Ahmer ile dâimî sûretde müştereken çalışmalarını teʼmîn etmek ve bu ciheti her fırsatda taht-ı murâkabede bulundurmak ve aynı zamânda menâfiʻ-i hazîneyi dahi halelden vikâye eylemek maksadıyla kendilerine âid eşyânın gümrüğe vusûlünde sûret ve mahall-i sarf ve istiʻmâli hakkında cemʻiyetimizce tahkîkât icrâsından sonra eşyâ-yı mezkûrenin Hilâl-i Ah- mer gâyesine hâdim bir şekilde istiʻmâl olunacağı tahakkuk eylediği takdîrde her Salîb-i Ahmer'in gümrüğe vereceği beyânnâme zîrinin Hilâl-i Ahmer Merkez-i Umûmîsi'ne irâe ve tasdîk etdirilmesi eslem tarafdır". Bu gibi ahvâlde şimdiye kadar hep bu sûretle hareket edilerek menâfiʻ-i hazînenin sıyânetine çalışıldı. _______________ Yunanistan'daki Osmanlı Esîrlerinin Hâl-i Perîşânîsi Yunanistan'daki Osmanlı esîrlerinin taraf taraf sû-i muʻâmeleye hedef olduklarını haber alan Osmanlı Hilâl-i Ahmer Cemʻiyeti geçen 20 Teşrîn-i Evvel'de [20 Ekim] Cenevre'deki Beynelmilel Salîb-i Ahmer Cemʻiyeti'ne telgraf ile mürâcaʻat ederek bu yakışıksız muʻâmeleye nihâyet verilmesi için îcâb edenler nezdinde teşebbüsât-ı lâzımede bulunulmasını ricâ etdi. Aradan iki gün mürûrundan sonra mezkûr telgrafın meâl-i muhtasarını îzâh ve tevsîʻ maksadıyla mevzûʻ-ı bahis sû-i muʻâmeleye âid tafsîlâtı hâvî 13 mâddelik müdellel bir rapor dahi tanzîm ederek cemʻiyet-i müşârunileyhâya irsâl ile bu mühim mesʼele hakkında tekrâr nazar-ı dikkatini celb eyledi.