HİLÂL-İ AHMER MECMÛʻALARI / CİLT 1

Osmanlı Hilâl-i Ahmer Mecmû ‘ ası Sayı 6 174 Doktor Roehrich'in tercümânı Mösyö Mery ile Kayseri'deki Yunan Üserâ Garnizonu'nu ziyâret etdikden sonra Ankara'ya vâsıl olduğu Hilâl-i Ahmer'e vârid olan haberlerden anlaşılıyor. Anadolu Ajansı, Doktor Roehrich'in Ankara'da çıkan Hâkimiyet-i Milliye gazetesi muhâbirine verdiği bazı maʻlûmâtı İstanbul gazetelerine bildirdi. Ajansın bu mühim teblîğini biz de aynen nak- lediyoruz: "-Ankara, 1 Şubat [13]38 [1922], Anadolu Ajansı Salîb-i Ahmer Murahhası Doktor Roehrich'in Kayseri'deki teftîşâtı netîcesi hakkında Hâkimi- yet-i Milliye muhâbirine verdiği maʻlûmât ber-vech-i zirdir: Kayseri Üserâ Garnizonu'nda birçok Yunan esîri var. Bu adamlar müreffeh denecek bir hayât geçiriyorlardı. Salîb-i Ahmer Murahhası Doktor Roehrich, bir heyʼet-i sıhhiye ile berâber bu esîrleri birer birer muʻâyene etdi. Bir kere, esîrler arasında intânî hiçbir hastalık mevcûd değildir. İçlerinden cürûh-ı harbiyeyi müteʻâkib aʻzâsından sakat ve maʻlûl kalan on dört kişi tefrîk edilmişdir. Yalnız bir kişi fakrü'd-deme mübtelâdır ve bu da evvelce geçirmiş olduğu bir hastalığın netîcesinden inbiʻâs eylemişdir. Üserânın iʻâşe ve ilbâsı fevkalâde iyidir. Doktor Roehrich, üserâya verilen ağdiyenin mikdâr ve cinsini tedkîk eylemiş ve bu şerâit altında üserâ meyânında bir hastalık zuhûr etmemesinin pek tabîʻî olduğunu söylemişdir. Hattâ Salîb-i Ahmer murahhası bunların böyle miskîn miskîn oturmalarından ziyâde yollarda ve tarlalarda [127] çalışdırılmalarını tavsiye eylemişdir. Garnizon âdetâ bir sanator- yum hâlindedir. Üserâ karargâhının birinde bir küçük hastahâne var ki, bu husûsda âdetâ bir model telâkkî edilebilir. Yunan zâbitlerinin içlerinden bazıları muʻtâd olan yalancılıklarını ızhârdan çekin- mediler. Fakat bizzât kendi imzâları altında aldıkları maʻâş ve erzâk senedât ve kuyûdâtı gösterilince heyʼet tarafından bu iftirânın mâhiyeti çabuk anlaşıldı. Maʻamâfih bunu söyleyenler ancak iki kişiye inhisâr etmiş ve arkadâşlarının düzgün ifâdeleri karşısında kendileri mahcûb kalmışlardır. Üserânın hastahânelerde Türk hastalarıyla berâber bulunmaları ve aynı yemekden yemeleri ve bilhâssa zâbitâna karşı gösterilen nezâket, heyʼetin pek büyük takdîrâtına mazhar olmuşdur. Kayseri Belediye Heyʼeti misâfirlerini ihtirâmla iʻzâz eylemişdir. Doktor Roehrich, Türk misâfir-perverliğini bizzât nefsinde tecrübe etmişdir. Beynelmilel Salîb-i Ahmer kânûnu ve nizâmâtı mûcebince Yunan esîr doktorları mübâdele sûretiyle ve Mersin tarîkıyla memleketlerine iʻâde edilmişdir". *** Ankara'dan alınan bir telgrafnâmeye göre Doktor Roehrich Mersin tarîkıyla avdet etmişdir. _______________ Mısır Hilâl-i Ahmeri'nin Anadolu'ya Muʻâveneti Mısır Hilâl-i Ahmer Cemʻiyeti şimdiye kadar Hilâl-i Ahmer vâsıtasıyla Anadolu muhâcirlerine gönderdiği on bin İngiliz lirasından gayrı bu defa yine aynı vâsıta ile beş bin yüz kırk İngiliz lirası gönderdi. Azîz hemşîremiz olan Mısır Hilâl-i Ahmeri ile teberruʻâtda bulunan zevât-ı kirâma, şükrân ve minnetdârlığımızı takdîme müsâraʻat ederiz.