HİLÂL-İ AHMER MECMÛʻALARI / CİLT 1

Osmanlı Hilâl-i Ahmer Mecmû ‘ ası Sayı 6 180 Cemʻiyât-ı beşeriye, yekdiğere tasallut ve tahakküm için esbâb-ı cebriye ihzâr ederek devir devir yeryüzünü kanlara boyadığı hâlde bir tarafdan dahi insâniyet, bu mesâibi bertaraf etmek için teşebbüsât ve fiʻliyâta girişir. Harbin zuhûruyla berâber âlâm ve mesâib-i harbiyeyi tahfîf maksadıyla teşekkül etmiş olan muʻâvenet cemʻiyetleri, Hilâl ve Salîb-i Ahmer heyʼetleri derhâl faʻâliyete dâhil olurlar. [133] Heyʼet-i mezkûre, muhârebe meydânlarında kanlı yaralar sararak evcâʻ ve ıztırâbât-ı be- şeriyeyi tedâvîye uğraşdıkları hâlde, gerilerde, top ve tüfenk sadâları hâricinde fakat envâʻ-ı mahrû- miyet ve sefâletler içinde sürünen üserâ kâfileleri, ordugâhları, muhâcirîn sürüleri arasında bir hayli bîçâregânın mesâib-i hayâtiyelerini tahfîf çârelerini arar. İşte hatt-ı harbden çıkdıkdan sonra düşman memleketi dâhilinde uzaklara, en tenhâ ve sessiz köşelere nakledilen bir esîr, heyʼet-i mezkûre aʻzâsından herhangi birine tesâdüf eder ise büyük bir te- sellî bulur. Ferdâ-yı esâretinden beri zihninde yer tutan emeli, emîn bir vâsıta ile âilesini mukadderât-ı hayâtiyesinden haberdâr etmek arzusunu icrâya tevessül eder. Kendisini beşûş bir çehre, hizmetine müheyyâ bir tavır ile kabûl eden bu hayırhâh adama karşı ebedî bir minnetdârlık ve hürmet besler. *** Tabʻ-ı insânînin pek rakîk olan bu noktasını takdîr eden heyʼet-i hayriye, kendi esîrlerine ta- karrüb için dâimâ beynelmilel veya bî-taraf hükûmetler Salîb-i Ahmerlerinin muʻâvenet ve delâletine mürâcaʻat ederek onlardan dahi açık bir kalb ile nihâyetsiz muzâheret ve samîmiyet görürler. İşte bu kabîlden olmak üzere Sibirya'ya ilk defa olmak üzere 1915 senesi içerisinde Danimarka Salîb-i Ahmer Heyʼeti aʻzâsından bir zâtın refâkatinde olarak bir Alman Salîb-i Ahmer hemşîresi ge- lerek Krasnoyarsk ordugâhını ziyâret etmiş ve ordugâhtaki Türk zâbitân ve efrâdının cedvelini vatana irsâl etmek üzere almış idi. Bunu müteʻâkib Amerika Hıristiyan Gençleri Cemʻiyeti'nin bir vekîli gelerek müttefiklere âid bazı husûsâtı îfâ ve tehvîn-i ihtiyâcları için muʻâvenet-i mâddiye icrâ etdiği gibi bu meyânda efrâdı- mıza dahi bir hisse-i nakdiye ikrâz etmiş idi. Sibirya'da üserâya en müsmir hidemât ve muʻâvenât icrâ eden heyʼet meyânında kıdem ve faʻâliyetiyle birinci mertebeyi tutan Çin Hükûmeti dâhilinde ve Tiençin şehrinde mukîm Madam Von Hangen'in reîsesi bulunduğu "Sibirya Alman, Avusturya, Macar Esîrleri Muʻâvenet Cemʻiyeti"dir. Bu heyʼet bazen doğrudan doğruya ordugâhlardaki üserâ kıdemlileri ve bazen bizzât esîrler ile ve lüzûm gördüğü takdîrde Danimarka-İsveç meʼmûrîn-i resmiyesi ve Salîb-i Ahmerler vâsıtasıyla muhâbere sûretiyle devâmlı ve sebâtlı bir vazîfe-i insâniyetkârâne îfâ etmişdir. Cemʻiyet-i mezkûreye, unvân-ı resmîsi hâricinde kalan bizlere dahi muʻâvenetlerini teşmîl ey- lemesi için 1916 senesi ibtidâlarında vukûʻ bulan mürâcaʻat ve ricâmız açık bir kalble karşılanarak cevâben yazdıkları bir mektûbda esâsen Hilâl-i Ahmer'imiz ile muʻâmelâtda bulunduklarını ve ora- dan efrâdımızın muʻâvenetine tahsîsen aldıkları mebâliği lüzûma göre taksîme salâhiyetdâr olduk- larını bildirmekle berâber derhâl muʻâvenet-i nakdiye irsâlâtına başlamışlar ve arada takarrür eden mikdârı bilâ-taleb ve muntazaman her on beş günde bir göndermişler idi. Bu cemʻiyet, muʻâmelât-ı adîdesi meyânında esîr zâbitân ve efrâda vâsıta-i muhâbere olmak, memleketlerdeki âileler tarafından gönderilen para vesâir eşyâyı ashâbına irsâl ve teslîm etmek, mem- leketlerinde âilelerinden almak üzere esîrlere bilâ-inkıtâʻ ve muʻayyen mikdârda ikrâzâtda bulunmak, hâl-i esâretde büyük bir ihtiyâc içinde kalan üserâya yazlık, kışlık melbûsât, ayakkabı, tütün, kitâb vesâir irsâl etmek gibi serîʻ ve etrâflı bir hizmet îfâ eyliyordu. Bundan mâʻadâ her ay muntazaman ve elifbâ sırasıyla neşretdiği cedveller ile mahalleri mechûl kalmış ve gâib görünmekde bulunmuş olanlar hakkında maʻlûmât-ı mümkine cemʻ ile alâkadârâna ihbâr ve teblîğ eylemekde idi.