HİLÂL-İ AHMER MECMÛʻALARI / CİLT 1

Osmanlı Hilâl-i Ahmer Mecmû ‘ ası Sayı 6 181 Cemʻiyet-i mezkûre ve bâ-husûs reîsesi Madam Von Hangen, Türkleri de diğer müttefikler- den ayırmaksızın aynı şerâit dâhilinde dâire-i himâyesinde bulundurduğu gibi mükerreren efrâdımıza mahsûsan posta paketleri dâhilinde elbise ve çamaşır ve ayakkabı irsâl eylemiş idi. (Mâbaʻdi var.) [134] HİLÂL-İ AHMER'İN FAʻÂLİYETİ (Beşinci numaradan mâbaʻd] Emrâz-ı Sâriyeye Karşı Mücâdele: Lekeli Hummâ 1915 senesinde lekeli hummâ memleketde şiddetle icrâ-yı hükmediyor idi. Bu hastalık en ziyâ- de Konya vilâyetinde tahrîbât icrâ ediyor idi. Hilâl-i Ahmer lekeli hummâya karşı mücâdele etmek üzere o taraflara bir heyʼet-i sıhhiye gönderdi. Konya'ya giden heyʼet, mahallinde tedkîkâtda bulundukdan sonra nefs-i Konya kasabasında le- keli hummâlılara mahsûs bir hastahâne küşâd etmekle berâber civâr kasabalara da hekîm iʻzâm etmiş ve hastalığın hüküm-fermâ olduğu yerlere eşyâ ve çamaşır temizlemeğe mahsûs tebhîr makineleri ve fukarâya tevzîʻ etmek üzere yeni ve temiz çamaşır göndermiş idi. Fakat hastalığın tahakkuk etmesine ve vefeyâtın artmasına rağmen hastahânemize mürâcaʻat edenlerin adedi çok değil idi. Tahrîr edilmek korkusuyla halkın lekeli hummâ musâblarını dâire-i âidesine bildirmekden ictinâb etdiği icrâ edilen tahkîkâtdan anlaşıldı. Heyʼetimiz, evlerde taharriyât icrâ etmek ve bulduğu hastaları hastahâneye nakletmek ıztırârında kaldı. Bundan başka, şehrin fakîr hastalarını meccânen muʻâyene etmek üzere ayrı bir muʻâyenehâne dahi küşâd edildi. Heyʼetimiz Konya'yı üç ay süren mütemâdî mesâʻîden ve lekeli hummânın tamâmıyla itfâsın- dan sonra terk etmişdir. Bu heyʼetden başka, Kafkasya ve Süveyş Kanalı cebhelerindeki heyʼetlerimiz ile bizzât mer- kez-i umûmîmiz heyʼeti dahi bu âfete karşı mücâdele etdiler. Fakîr ahâlîye çamaşır, sabun, muzâdd-ı taʻaffün eczâ ve ilâc gibi malzeme meccânen tevzîʻ olunmuş idi. Ordu Sıhhiye Dâiresi'ne iʻâreten verdiğimiz on altı aded seyyâr tebhîr makinesi pek çok işe ya- radı. Hilâl-i Ahmer, ordu sıhhiyesine aynı maksad ile açmış olduğu hammâmlarda sarf edilmek üzere mikdâr-ı kâfi odun dahi vermiş idi. Cemʻiyetimiz, Selimiye Kışlası kumandanının talebi üzerine oraya da sirâyet etmiş olan hasta- lığın önünü almak ve muhtâcîne tevzîʻ edilmek üzere birkaç bin parça çamaşır verdi. Lekeli hummâ musâblarının tecrîd ve tedâvîlerine tahsîs edilmiş olan Zeyneb Kâmil Hastahâ- nesi'ne masârıfına medâr olmak üzere Hilâl-i Ahmer tarafından 4.800 lira iʻtâ edildi. Komitelerimiz ve tâlî komitelerimiz, bu zemînde âtıl kalmayarak hastalığı itfâ etmek için elle- rindeki vesâit ile çalışmışlardır. İzmir şuʻbemizin saʻy ü gayreti dahi bi'l-cümle sitâyişin fevkinde idi. [135] Lekeli hummâ mücâdelesiyle meşgûl olan etıbbâmız, bitlerin istîlâsından muhâfaza edil- mek için bir takım gömlekler giyiyorlar idi. Bu takayyüdâta rağmen Hilâl-i Ahmer bu mücâdelede en fedâkâr etıbbâsından üç ve hastabakıcılarından iki uzuv gâib etmişdir. (Mâbaʻdi var.) _______________