HİLÂL-İ AHMER MECMÛʻALARI / CİLT 1

Osmanlı Hilâl-i Ahmer Mecmû ‘ ası Sayı 6 182 SAMANLIDAĞ ŞİBH-İ CEZÎRESİ MUHÂCİRLERİ (Dördüncü numaradan mâbaʻd) Sâhildeki eşyâ meyânında bilhâssa zeytin ile zeytinyağı tenekeleri Yunan zâbitinin nazar-ı dik- katini celb ediyor idi. Yunan zâbiti müşkilât çıkarmasın diye yanına gitdim ve İngiliz mîralâyının bir-iki güne kadar ayrı bir torpido ile bize yetişeceğini söyledim. Bu tarz-ı hareket zarûrî idi. Çünkü Mîralây Spencer'ın nüfûzu, pek çok işlerin sürʻatle netîcelenmesine yardım etmiş idi. Bundan başka, hayvânât mesʼelesinin halli için Gemlik'e kadar gideceğimizi ilâve ve gaybûbetimiz esnâsında Fran- sız jandarmaları ile motorumuzu Armudlu'da bırakacağımızı beyân ve ahâlînin hâzırlanmağa devâm etmesinin teʼmînini ricâ etdik. Diğer tarafdan ayrıca ahâlîyi tatmîn etdikden sonra, aynı gün sâʻat 12'de Gemlik'e müteveccihen hareket ederek iki sâʻat sonra şehr-i mezkûra vâsıl olduk. Yunan işgâli altında her gün bir parça daha sararıp solan Gemlik'i, bu defa tâk-ı zaferlerle süslenmiş olduğu hâlde bulduk. Bunun sebebini sorunca, Bursa'da bulunan Yunan kralının Gemlik'e gelmek ihtimâli olduğu- nu öğrendik. Bu vazʻiyet karşısında yalnız heyʼet-i tahkîkiyenin karaya çıkması münâsib görüldü ve bu sûretle hareket edildi. Karaya çıkan heyʼet-i tahkîkiye aʻzâsından Yüzbaşı Lukas, Mülâzım Bonaccorsi ile Manches- ter Guardian muhâbiri ve zevcesi üç sâʻat sonra Gülnihâl'e avdet ederek Gemlik Yunan kumandanıyla hayvânât mesʼelesinin halli için uzun uzadıya münâkaşa etdiklerini söylediler. Yunan askerî idâresi, Armudlu'dan hicret etmek isteyen ahâlîye iki şey teklîf ediyor idi: Ya kassâblık hayvânâtının sened mukâbilinde terki yâhûd parası hemen teʼdiye edilmek şartıyla bu hayvânâtın fürûht edilmesi. Binek hayvânâtı serbest bırakılmış idi. Bu muʻâmeleyi teʼmîn etmek için üç zâbit ve bir çavuşdan mürekkeb bir Yunan levâzım heyʼeti bizim ile berâber Armudlu'ya gelecek idi. Bu Yunan heyʼeti, hayvânâtı mübâyaʻa etmek için iktizâ eden parayı Bursa Yunan Levâzım İdâresi'nden beklediği için Gülnihâl vapuruna ertesi sabâh gelecek idi. Gemlik'de bu mesʼele hakkında vukûʻ bulan münâkaşa esnâsında Gemlik Yunan erkân-ı harbiye reîsi, Yunan levâzım heyʼetinin Armudlu'dan satın alacağı hayvânların Hilâl-i Ahmer gemisiyle Mudanya'ya kadar getirilmesini de taleb etmiş ise de heyʼet-i tahkîkiye buna şiddetle iʻtirâz ederek Hilâl-i Ahmer bî-taraf olduğundan gemisiyle asker nakliyâtı yapamayacağını ve Hilâl-i Ahmer heyʼeti reîsinin buna katʻiyen muvâfakat etmeyeceğini katʻî bir sûretde beyân ile taleb-i vâkiʻi reddetmişdir. 29 Haziran Cuma günü- Sabâhleyin sâʻat yedide vapura geleceği karârlaşdırılan Yunan levâzım heyʼetinden hâlâ eser yok idi. O gün Yunan kralının Gemlik'e gelmesi muhtemel olduğundan biz bu limanda kalmak niyetinde değil idik. Bunun için Yüzbaşı Lukas, Yunan levâzım heyʼetini aramak maksadıyla bir sandala binerek karaya çıkdı. Bu sandal daha yarı yolda iken sâhilden Yunan levâzım heyʼetini hâmil iki sandalın uzaklaşdığını gördük. Bir müddet sonra bir tarafdan Yunan heyʼeti, diğer tarafdan Yüzbaşı Lukas vapura geldiler. Sâʻat 12'de Gemlik'den hareket etdik. Yunan levâzım heyʼeti, bir mülâzım-ı evvel ile iki mülâ- zım-ı sânîden mürekkeb idi. Artık bu efendiler ile birlikde yenilen öğle yemeğinin ne kadar bürûdetle geçdiğini yazmağa hâcet yokdur. (Mâbaʻdi var.) Müdür-i Mesʼûl: Ali Macid