HİLÂL-İ AHMER MECMÛʻALARI / CİLT 1

Osmanlı Hilâl-i Ahmer Mecmû ‘ ası Sayı 7 205 Türkiye Büyük Millet Meclisi, Hilâl-i Ahmer'e Teşekkür Eder. Türkiye Büyük Millet Meclisi, Hâriciye Vekîli Yusuf Kemal Beyefendi'nin ağzıyla Hilâl-i Ah- mer Cemʻiyeti'ne teşekkür etmek istedi. Türkiye hukûkunu müdâfaʻa etmek maksadıyla Avrupa'ya giden Yusuf Kemal Beyefendi, İstanbul'da birkaç gün kalmasından istifâde ederek Büyük Millet Mec- lisi'nin teşekkürâtını Hilâl-i Ahmer'e iblâğ etmeğe dahi meʼmûr edildiklerini söylediler ve 22 Şubat 1338 [1922] târîhine musâdif Perşembe günü sâʻat on birde bu vazîfeyi îfâ [148] etmek üzere Hilâl-i Ahmer Merkezi'ne gelerek ictimâʻ hâlinde bulunan merkez-i umûmî celsesinde hâzır bulundular. Hilâl-i Ahmer Merkez-i Umûmîsi'nin bu celseyi müzâkerâtını hâkî olan zabıtnâmenin teşek- kürât-ı mesrûdeye taʻalluk eden kısmını aynen derc ediyoruz: "-Büyük Millet Meclisi Umûr-ı Hâriciye Vekîli Yusuf Kemal Beyefendi, Hilâl-i Ahmer Mer- kezi'nde bugün sâʻat on birde akdedilen merkez-i umûmî celsesinde bizzât hâzır bulunmuş ve Hilâl-i Ahmer'in Anadolu'da bu son harb esnâsında îfâ eylediği hidemât-ı insâniyeye karşı teşekkür etmek istemişdir. Celsenin küşâdını müteʻâkib söz, Hilâl-i Ahmer Reîs-i Fahrîsi Müderris Besim Ömer Paşa haz- retlerine verilmiş ve müşârunileyh ber-vech-i âtî nutku îrâd eylemişdir: '-Hilâl-i Ahmer Cemʻiyeti'nin beynelmilel merʻî ve cârî kavâʻid ve kavânîne tevfîkan vazîfe-i insâniyesini îfâya muvaffakiyeti, bilâ-tefrîk-ı cins ve mezheb bütün mecrûhîn ve marzâya, üserâ- ya ve muhâcirîne ibzâl ve îfâ-yı hizmet ve muʻâvenet eylemesi, müstemirren alâkadârânın sahâbet ü himâyesine mazhar edilmesi sâyesinde olabilmişdir. Cemʻiyetimiz, bugün celsemizi teşrîfleriyle mübâhî olduğumuz Büyük Millet Meclisi Hâriciye Vekîli Yusuf Kemal Beyefendi vesâtatıyla bütün bu sühûletlere karşı takdîm-i teşekkürât eder'. Bunu müteʻâkib Reîs-i Sânî Doktor Âkil Muhtar Beyefendi Hilâl-i Ahmer nizâmnâme ve kavâʻidinin bu son harbde bütün Anadolu'da mevkiʻ-i tatbîke konulmuş olmasından dolayı ayrıca beyân-ı minnetdârî eylemişlerdir. Bu aralık Yusuf Kemal Beyefendi söz alarak demişdir ki: '-Teşekkür etmek bize düşer. Daʻvâ-yı millîmiz cümlemi- zin maʻlûmudur. Milletin hudûd-ı milliyesi dâhilinde istiklâl ve hürriyetini istihsâl uğrunda bize herhangi bir sûretle muʻâvenet etmiş olanların cümlesini takdîr ederiz. Vatan yolunda, mukaddes gâyenin istihsâli uğrunda hayâtını îcâbında büsbütün fedâ etmek sûretiyle sarf-ı mesâʻî eden ve bu yolda yaralanan, kendi değilse bile âilesi zarûret ve mahrûmiyete uğrayan kimselerin gerek zâtlarına ve gerek efrâd-ı âilelerine ve'l-hâsıl bu yolda sarf-ı mesâʻî edenlerin hep- sine karşı Hilâl-i Ahmer'in gösterdiği hareket o kadar âlî ve o kadar insâniyet-perverâne şeylerdir ki, bunların karşısında mil- let, kalb ve vicdân-ı insâniyet, lisân ve makâl ile teşekkürden âciz ve ancak vâlihâne temâşâ ile iktifâya mecbûrdur. Hilâl-i Türkiye Büyük Millet Meclisi teşekkürâtını Hilâl-i Ahmer Cemʻiyeti'ne îsâl eden meclis-i mezkûr Hâriciye Vekîli Yusuf Kemal Beyefendi Yossouf Kémal Bey Ministre des affaires Etrangères de la Grande Assemblée Nationale de Turquie, chargé de transmettre les remerciement de cette Assemblée au Croissant-Rouge Ottoman