HİLÂL-İ AHMER MECMÛʻALARI / CİLT 1

Osmanlı Hilâl-i Ahmer Mecmû ‘ ası Sayı 7 206 Ahmer, yalnız Türklere bakmadı; sebeb ve gâye-i teşekkülü vechile bilâ-tefrîk-ı dîn ve tâbiʻiyet her- kese ve hattâ düşmanlarımıza bile muʻâvenet etdi. Ben bir Türk olduğum için bu kadar civân-merd ve insânî bir cemʻiyetimiz olduğundan dolayı, her dürlü tevâzuʻu [149] bırakarak iftihâr ediyorum. Yapdığınız iyiliklere ve insâniyete karşı Büyük Millet Meclisi de ayrıca müteşekkirdir'. Alkışlarla karşılanan bu beyânât üzerine aʻzâdan Aynîzâde Hasan Tahsin Beyefendi mukâbele-i şükrânkârânede bulunmuş ve Hilâl-i Ahmer'in on iki seneden beri müstemirren çalışan bir uzvu sıfa- tıyla fahrî muhâsebeci Bank-ı Osmanî direktörlerinden Keresteciyan Efendi dahi makâma münâsib bir sûretde ızhâr-ı hissiyât ederek ayrıca alkışlanmış ve Doktor Celâl Muhtar Bey'in Keresteciyan Efendi'nin mezâyâ-yı zâtiye ve ictimâʻiyesinden parlak bir lisân-ı sitâyişle bahsetmesi üzerine celse şedîd alkışlar arasında nihâyet bulmuşdur". _______________ Trablusgarb Hilâl-i Ahmer Cemʻiyeti'nin Bir Mektûbu Hilâl-i Ahmer'e pek kıymetli muʻâvenetleri sebk etmiş olan Trablusgarb Hilâl-i Ahmer İʻâne Cemʻiyeti, cemʻiyetimize âtîdeki müessir mektûbu gönderdi: "-Osmanlı Hilâl-i Ahmer Cemʻiyet-i Muhteremesi Riyâset-i Celîlesi'ne maʻrûz-ı çâkerânemdir. Banca di Roma vâsıtasıyla takdîm ve irsâl kılınan elli bin İtalyan frangının vusûlüne dâir tanzîm buyurulan iki kıtʻa makbûz ilmühaberinin leffiyle şeref-vârid olan Kânûn-ı Evvel 1337 [Aralık 1921] ve 11 Kânûn-ı Sânî [1]338 [Ocak 1922] târîhli ve 340/943 ve 28/30 numaralı iki kıtʻa emirnâme-i âlî-i âsafânelerinde beyân buyurulan iltifât-ı maʻâlî-gâyât-ı hüsrevâne, matbûʻât-ı mahalliye vâsıta- sıyla müteberriʻîn ahâlîye iʻlân edildi ve heyʼet-i âcizânemizce de mûcib-i fahr u şükrân oldu. Hilâl-i Ahmer'in istihdâf etdiği insânî ve şefkatkâr hidemât-ı mukaddesenin dünyevî ve uhrevî ecr u mesû- bâtından hisseyâb olabilmek vecîbesine hâdim olmakdan ibâret olan arzunun kemâ yelîku îfâ oluna- maması meydânda iken irsâline bezl-i âtıfet buyurulan Hilâl-i Ahmer Mecmûʻası 'nda dahi cemʻiyet-i hakîrânemiz hakkındaki fıkarât-ı iltifâtkârâne derc etdirilmesi liyâkatimizin fevkinde bir âtıfetden ibâret görülmekle asâleten ve müteberriʻîn nâmına vekâleten arz-ı şükrân ve mahmidetle berâber ahîren cemʻ edilen on iki bin İtalyan frangı dahi cemʻiyet-i muhteremeleri veznesine takdîm edil- mek üzere bu kere fî 2 Cemâziyelâhir 1340 ve fî 30 Kânûn-ı Sânî 1922 târîhinde Banca di Roma'nın Trablusgarb şuʻbesine bi't-teslîm târîh-i mezkûrda telgraf poliçesi keşîde etdirilmiş olduğundan kabz etdirilerek vusûl ilmühaberinin irsâle müsâʻade buyurulması istirhâmıyla takdîm-i ihtirâmât eyleriz. Her hâlde emr u fermân hazret-i veliyyü'l-emrindir. Fî 5 Cemâziyelâhir 1340 / Fî 2 Şubat 1922 Kâtib: Ali Galib, Muhâsebeci: Mehmed Arif, Reîs-i Sânî: İsmi okunamıyor, Trablusgarb Hilâl-i Ahmer İʻâne Cemʻiyeti Reîsi: Muhammed Hasan el-Fakih, Sandık Emîni: Muhammed bin Zikri" Bâlâdaki mektûbun hâvî olduğu müessir ve samîmî cümlelerden pek ziyâde mütehassis olan Hilâl-i Ahmer Cemʻiyeti, Trablusgarb Hilâl-i Ahmer İʻâne Cemʻiyeti vâsıtasıyla yardımımıza gelen bi'l-cümle Trablus müteberriʻîn-i kirâmına alenen tekrâr teşekkür etmek fırsatına nâil olduğundan dolayı bahtiyârdır. Hilâl-i Ahmer, Trablusluların tevâlî-i teveccühüne dâimâ müftekir ve muhtâc ol- duğunu ayrıca arz ve kaydetmeği de bir vecîbe addeder. _______________