HİLÂL-İ AHMER MECMÛʻALARI / CİLT 1

Osmanlı Hilâl-i Ahmer Mecmû ‘ ası Sayı 7 209 Beynelmilel Salîb-i Ahmer Cemʻiyeti ve İslâm Muhâcirleri Cenevre'de Rusya'ya yardım etmek için inʻikâd eden konferansa Osmanlı Hilâl-i Ahmer mu- rahhası sıfatıyla iştirâk eden Cenevre Osmanlı Başşehbenderi Cemil Selman Bey, muhâcirîn-i İslâmi- ye'nin felâket-i ahvâli ve muhtâc-ı muʻâvenet bulundukları hakkında konferansa bir muhtıra takdîm ederek Beynelmilel Salîb-i Ahmer Heyʼetince bu bîçâregânın [152] tehvîn-i hâllerine medâr olacak teşebbüsâta tevessül edilmesini ricâ etmişdir. Beynelmilel Salîb-i Ahmer Heyʼeti, Cenevre şehben- derimizin muhtırasını nazar-ı iʻtibâra almış ve İstanbul'daki murahhası Mösyö Burnier'nin Hilâl-i Ahmer Cemʻiyeti ile teʼsîs-i temâs ederek İstanbul'daki muhâcirlerin adedi ve tarz-ı taʻayyüşleri hak- kında maʻlûmât almasını ve mesʼeleyi Hilâl-i Ahmer ile müzâkere eylemesini tensîb etmişdir. Beynelmilel Salîb-i Ahmer'in 8 Şubat 1922 târîhli mektûbundan bu mesʼeleye taʻalluku olan âtîdeki cümleleri terceme ve iktibâs ediyoruz: "-İslâm muhâcirlerinin de imdâdına koşmağı pek ziyâde arzu eden Beynelmilel Salîb-i Ahmer Cemʻiyeti, bu zavallılara edilecek muʻâvenetin nevʻ ve vüsʻati hakkında hâiz-i maʻlûmât olmamakla berâber Hilâl-i Ahmer Cemʻiyeti ile müştereken mesʼeleyi tedkîk eylemesini ve beynelmilel komiteyi bu muhâcirlerin adedinden, vazʻiyetlerinden, hicretin esbâbından, hâl-i hâzırdaki hakîkî ihtiyâcların- dan ve kendilerine ibzâl edilecek vesâit-i imdâdiyeden haberdâr eylemesini, Dersaadet'deki murah- has-ı mahsûsu Mösyö Burnier'den ricâ eder. Beynelmilel Salîb-i Ahmer Komitesi, diğer tarafdan da Anadolu murahhası Doktor Roehri- ch'e İslâm harb âfetzedegânına îsâl edilmek üzere memâlik-i İslâmiye'de toplanılmış olan iʻânâtın mikdâr-ı hakîkîsi hakkında Ankara Hükûmet-i Milliyesi nezdinde tahkîkât yapmasını telgrafla teblîğ etdi". Bu aralık Hilâl-i Ahmer Cemʻiyeti erkânı ile Beynelmilel Salîb-i Ahmer Komitesi'nin İstanbul Murahhası Mösyö Burnier, bu mesʼele ile iştigâl etmekdedirler. Asinara Adası Mevkûfîni Sibirya'dan avdet ederken Yunanîler tarafından tevkîf ve Pire'ye sevk olunarak bilâhare vukûʻ bulan teşebbüsât ve İtalya Hükûmeti'yle hâsıl olan iʼtilâf üzerine İtalya'nın Asinara adasına naklolu- nan sâbık Osmanlı üserâsının cezîre-i mezkûrede bulundukları muhît ve şerâit-i hayâtiyenin bir hâl-i sefâletden başka bir şey olmadığı mütevâliyen vâkiʻ olan mürâcaʻâtdan anlaşılmışdır. Hilâl-i Ahmer, yedi seneden beri vatan-cüdâ bulunmuş ve envâʻ-ı meşâkk u sergüzeştlere dûçâr olmuş bu bîçârelerin ya münâsib diğer bir mahalle nakil veya vatanlarına iʻâde edilmeleri için Hâri- ciye Nezâreti nezdinde teşebbüsât-ı lâzımede bulundu. _______________ Doktor Roehrich'in Hilâl-i Ahmer'e Teşekkürü Türkiye Büyük Millet Meclisi Hükûmeti'nin talebi üzerine Anadolu'da Yunan üserâsına edilen muʻâmeleyi teftîşe meʼmûr edilen Beynelmilel Salîb-i Ahmer Murahhası Doktor Roehrich, vazîfesini ikmâl ederek İstanbul'a avdet ve burada da birkaç gün kaldıkdan sonra memleketine azîmet etdi. Doktor Roehrich pâyitahtımızdan müfârakat eylemezden evvel, Hilâl-i Ahmer'e tercemesi ber-vech-i zîr derc olunan mektûbu gönderdi: