HİLÂL-İ AHMER MECMÛʻALARI / CİLT 1

Osmanlı Hilâl-i Ahmer Mecmû ‘ ası Sayı 7 212 derʻuhde etmiş iken 9 Şubat'dan beri bu rakamı üç bine iblâğ etdi ve yarından iʻtibâren dört bine çıka- racakdır. Komite bu emr-i hayra tahsîs edilmek üzere evvelce beş yüz [155] İngiliz ve bu defa da altı bin beş yüz Osmanlı lirasını Hilâl-i Ahmer Veznesi'ne teslîm etdi. Madam Doughty Willy Aşhânesi bu hesâbdan hâricdir. Hilâl-i Ahmer bu komiteyi teşkîl eden zevât-ı kirâma muhâcirîn nâmına alenen arz-ı şükrân eyler. *** Şubat ayında Hilâl-i Ahmer ve İngiliz komitesi, bu kışladaki muhâcirlere 22.634 kilo ekmek tevzîʻ etdiler. _______________ İstanbul Türk Mültecîleri İçin Débats gazetesinin 28 Şubat târîhli nüshasından terceme edildi: "-İstanbul'da harb felâket-dîdesi olarak kısm-ı aʻzamı pek büyük bir sefâlet ve mahrûmiyet için- de yaşayan maʻsûm 65.000 Türk mültecîsi vardır. Bu binlerce aç ve perîşân insânın nidâ-yı istimdâd ve mürâcaʻatına karşı Fransız Salîb-i Ahmeri lâkayd ve bî-his kalamazdı. Salîb-i Ahmer'imiz nazar-ı rikkat ve merhametine arz edilen bu büyük sefâlete dahi îsâl-i muʻâvenet için îcâb eden teşebbüsde bulundu. Fransa'nın mekârim-perverlikdeki şöhret-i şâyiʻası Salîb-i Ahmer Cemʻiyetince derʻuhde olu- nan mesâʻî-i mübeccele-i şefkat-güsterînin adem-i ihmâlini âmir bulunduğundan bu bedbaht mültecî- lerin tehvîn-i âlâm ü ıstırâbâtı için ibzâl edilecek rahm ü âtıfetde Salîb-i Ahmer yalnız kalmayacakdır. Bu mühim gâyenin teʼmîni mebâliğ-i mühimme sarfını istilzâm edecekdir. Reîs-i vükelânın dahi mazhar-ı tasvîbi olan teşebbüs-i vâkiʻin Şark'da Fransa münâsebât-ı maʻ- neviye ve mâddiyesini teʼyîde medâr olacağını reîs-i müşârunileyh ümîd etmekdedir. Fransız Salîb-i Ahmeri Fransa reîsicumhûrunun refîka-i muhteremeleri Madam Milleraud'nun riyâseti altında bulunan Fransız Madamları Komitesi'nin dahi himâye ve muzâheretini teʼmîn etmiş- dir. Bu komite reîs-i vükelânın zevcesi Madam Poincaré, Madam Foch, Madam Lyautey, Madam Pellé, Kontes Haussonville Galli, Ernest Carnot, Madam Pau, Kontes de Galard, Marquise de Mon- tebello ve Madam Bompard'dan müteşekkildir. Fransız Salîb-i Ahmeri kendisine rehber olan hissiyâtın ulviyetine ve tesâdüf etdiği teşvîkâta istinâden bu necîb ve yüksek vazîfenin îfâsına mübâderet etmiş ve küşâd edilen defter-i iʻâneye daha şimdiden mühim meblağlar derc edilmişdir: Osmanlı Bankası 50.000 frank, Paris ve Hollanda Bankası 25.000 frank vesâire. Salîb-i Ahmer Cemʻiyeti, bu iʻâneleri daha birçok iʻânâtın taʻkîb edeceğine ve bu sûretle şu emr-i hayrın hayyiz-ârâ-yı husûl olması için lüzûmu olan mebâliğin teʼmîn edileceğine tamâmen mutmaindir.