HİLÂL-İ AHMER MECMÛʻALARI / CİLT 1

Osmanlı Hilâl-i Ahmer Mecmû ‘ ası Sayı 7 213 Salîb-i Ahmer'in İstanbul'da teşebbüs etdiği mesâʻî-i hayır-perverâne oldukça parlak ve mü- kemmel olmalıdır. Çok arzu ederiz ki, bütün bu iyiliklerin tâb ü feri Şark'da Fransız nüfûz-ı kadîme- sini ihyâ ve idâme edebilsin". _______________ [156] Fransız Hilâl-i Ahmeri ve Muhâcirlerimiz Fransız Hilâl-i Ahmeri İstanbul Murahhası Mösyö de la Boulinière, riyâset etdiği heyʼet-i muʻâ- vine aʻzâsının bir kısmıyla şehrimize gelerek îfâ-yı vazîfeye mübâşeret etmişdir. Fransız heyʼeti, şim- dilik Selimiye Kışlası'nda bulunan 1.800 muhâcirin iʻâşesini derʻuhde etmişdir. Hilâl-i Ahmer, muhâcirler nâmına arz-ı teşekkür eder. _______________ Karagöz Gazetesinin Bir Îcadı Zarâfet ve nükte-perdâzlığıyla temeyyüz etmiş olan ve eski zamândan beri şehrimizde intişâr etmekde olan Karagöz gazetesi tütün vesâir mükeyyifât istiʻmâl edenlerin birer günlük imsâk be- dellerini Anadolu yetîmleri nâmına Hilâl-i Ahmer'e tevdîʻ eylemelerini tavsiye ediyor. Karagöz 'ün vesâyâ-yı müfîdesi semeresiz kalmamışdır. Mecmûʻamızın teberruʻât faslında "Bir Günlük Tütün İm- sâkı Bedeli" serlevhasıyla açılan kısımda bu imsâkı icrâ edenlerin esâmîsi mündericdir. Hilâl-i Ahmer bu teberruʻâta vâsıta olan Karagöz gazetesine ve müteberriʻîn-i kirâma arz-ı şükr ü minnetdârî eder. *** Hilâl-i Ahmer Mecmûʻası on beşinci sene-i intişâriyesine giren Karagöz gazetesini tebrîk ve kendisine hizmet-i neşriyesinde kemâl-i muvaffakiyet temennî eder. _______________ Baron Oşida'nın Teberruʻu Japonya Devleti'nin Dersaadet Fevkalâde Komiseri Baron S. Oşida cenâbları Hilâl-i Ahmer'e 150 Osmanlı lirası iʻâne vermek lütfunda bulundular. Hilâl-i Ahmer, Baron Oşida cenâblarına teşekkürât-ı samîmiyesini takdîm etmekle kesb-i fahr eyler. _______________ Peşte Sergisindeki Hilâl-i Ahmer Masnûʻâtı Hilâl-i Ahmer Cemʻiyeti Kadınlar Merkezi, Harb-i Umûmî esnâsında Peşte şehrinde açılmış olan Şark Masnûʻâtı Sergisi'ne berây-ı teşhîr Hilâl-i Ahmer Dârüssınâʻası masnûʻâtından bin parçayı mütecâviz eşyâ göndermiş idi.