HİLÂL-İ AHMER MECMÛʻALARI / CİLT 1

Osmanlı Hilâl-i Ahmer Mecmû ‘ ası Sayı 9 280 İsveç Salîb-i Ahmer Cemʻiyeti Reîsi Prens Carl hazretleri tarafından İsveç Hükûmeti'nin Der- saadet sefiri Mösyö Wallenberg vâsıtasıyla Hilâl-i Ahmer'e eser-i muʻâvenet olmak üzere 2.000 İsveç kronu (757 Osmanlı lirası) teberruʻ edilmişdir. Hilâl-i Ahmer bu necîb kavmin necîb müessesesine takdîm-i teşekkürât eder. _______________ Teberruʻ 10 Mayıs 1338 [1922] târîhine musâdif geçen Çarşamba günü, Tütüncüzâde Dâmâdı Emin Bey ile refîka-i muhteremesi Davudpaşa Kışlası'ndaki muhâcirlerimizi ziyâret ve bunlardan en ziyâde muhtâc olanlara üçer metreden ibâret 360 muhtelif kumaş parçası tevzîʻ etmişlerdir. Hilâl-i Ahmer Aşhâneleri Müfettiş-i Umûmîsi Doktor Galib Hakkı Bey bu muhterem müteberriʻlere muhâcirîn nâmına takdîm-i teşekkürât etmişdir. Hilâl-i Ahmer Mecmûʻâsı da bu teşekkürâta maʻa'l-mesâr iştirâk eyler. _______________ Afyonkarahisarı'ndaki Hilâl-i Ahmer Eşyâsı Yunanlılar, Afyonkarahisarı'nı ilk işgâlleri esnâsında orada buldukları Hilâl-i Ahmer'e âid bir takım eşyâya vazʻ-ı yed etmişler idi. Hilâl-i Ahmer Cemʻiyeti, bu eşyânın istirdâdını teʼmîn mak- sadıyla Beynelmilel Salîb-i Ahmer Cemʻiyeti'ne mürâcaʻat etdi ve müessese-i müşârunileyhâ son işʻârâtında bu mesʼele ile de iştigâl eylemekde olduğunu cemʻiyetimize bildirdi. _______________ Anadolu'daki Yunan Üserâsı İçin Anadolu'daki Yunan üserâsına îsâl edilmek üzere Yunanistan'dan gelen ve birçok eşyâ-yı zâti- yeyi hâvî olan 75 çuval Hilâl-i Ahmerce teslîm edilmişdir. _______________ Rus Salîb-i Ahmer Cemʻiyeti'nin Türkiye Murahhaslığı Şark-ı Karîb Rus Salîb-i Ahmer Cemʻiyeti tarafından Hilâl-i Ahmer'e vârid olan bir mektûbda, Rus Salîb-i Ahmer Cemʻiyeti'nin Türkiye murahhaslığı heyʼeti zevât-ı âtiyeden mürekkeb olduğu bildirilmekdedir: Rus Senato aʻzâsından Mösyö G. Glinka reîs, Profesör J. Alexinski umûr-ı sıhhiye müdürü, Prens Amatouni umûr-ı mâliye ve iʻâşe müdürü, Mösyö Tatistcheff kâtib-i umûmî. Hilâl-i Ahmer, mûmâileyhimi tebrîk ederek işlerinde muvaffak olmalarını temennî eder. _______________