HİLÂL-İ AHMER MECMÛʻALARI / CİLT 1

Osmanlı Hilâl-i Ahmer Mecmû ‘ ası Sayı 9 281 [205] Fatih ve Üsküdar Dispanserleri Geçen Nisan'da Hilâl-i Ahmer'in Fatih Dispanseri'nde 1.618 ve Üsküdar Dispanseri'nde 1.096 hasta muʻâyene ve ilâcları meccânen iʻtâ kılınmışdır. _______________ Muvâsalat Ankara Hilâl-i Ahmer Murahhaslığı Muhâsebecisi Osman Âsaf Bey meʼzûnen Dersaadet'e geldi. _______________ Taʻyîn Merkez-i Umûmî Tahrîrât Kalemi'ne meʼmûr ve Evrâk Kalemi Muʻâvini Arif Süleyman Bey'in 12 Kânûn-ı Evvel 1337 [Aralık 1921] târîhli Mâliye Komisyonu mukarrerâtına tevfîkan meʼmûriyeti tasdîk edildi. _______________ TALTÎFÂT Teberruʻât-ı nakdiyesine binâen iffetlü devletlü Saliha Sultân hazretlerine alâmet-i mahsûsasız gümüş Hilâl-i Ahmer madalyası, Viyana'da ve Cenevre'de Hilâl-i Ahmer Cemʻiyeti'ni temsîl sûretiy- le mesbûk olan hidemât ve mesâʻîsine binâen Cenevre Başşehbenderi Cemil Selman Bey'le Hilâl-i Ahmer'e büyük mikdârda iʻâne cemʻi ve bizzât malzeme ve iʻâne iʻtâsı sûretiyle mühim muʻâvenetde bulunmuş olan Hilâl-i Ahmer Merkez-i Umûmîsi aʻzâsından Eczâcı Edhem Pertev Bey'e alâmet-i mahsûsalı gümüş Hilâl-i Ahmer madalyası, teberruʻât-ı nakdiyelerine binâen Çamlıca İnâs Sultânîsi nâmına alâmet-i mahsûsasız gümüş Hilâl-i Ahmer madalyası, Serʻasker-i esbak merhûm Rıza Paşa haremi Adviye Hanımefendi ile mahdûmu Şükrü Paşa ve Ziya Bey'e, ağnâm tüccârından Kalkande- lenli Monlâ Celâleddin Bey'e, Müze-i Askerî Meydânı'ndaki Hilâl-i Ahmer müsâmeresinde sebk eden mesâʻî ve hidemâtına binâen Müze-i Askerî Umûr-ı Fenniye ve Târîhiye Meʼmûru Sermed Bey'e, Londra'da derc-i iʻânât husûsunda îfâ eylediği hidemâta binâen Londra Dârülfünûnu Elsine-i Şarkiye Şuʻbesi Türkçe muʻallimlerinden Ali Rıza Bey'e ve teberruʻât-ı nakdiyesine binâen Kabzımâl Halil Efendi Onbaşı'ya alâmet-i mahsûsasız tunç Hilâl-i Ahmer madalyaları iʻtâ edilmişdir. Hilâl-i Ahmer, bütün bu zevât-ı muhteremeye arz-ı tebrîkât eder. _______________ SAMANLIDAĞ ŞİBH-İ CEZÎRESİ MUHÂCİRLERİ (Altıncı numaradan mâbaʻd) Sâʻat ikide Armudlu önüne geldik. Zeytin harmanlarını biraz daha büyümüş ve eşyâ kümelerini biraz daha kabarmış bulduk. Yalı, mikdârı yüzleri geçen kassâblık ve binek hayvânâtıyla da dolmuş idi. Bütün bu eşyânın yani zeytinlerin, eşyâ denklerinin ve hayvânların etrâfında bir sürü halk kayna-