HİLÂL-İ AHMER MECMÛʻALARI / CİLT 1

Osmanlı Hilâl-i Ahmer Mecmû ‘ ası Sayı 10 310 Yunanistan Cenevre'de ve Lahey'de Münʻakid Beynelmilel Konferanslar Mukarrerâtına Nasıl Riʻâyet Ediyor? Geçen nüshamızda Yunanistan'ın Cenevre ve Lahey konferansları mukarrerâtına ne sûretle riʻâyet etdiğini ve Hilâl-i Ahmer tarafından Beynelmilel Salîb-i Ahmer Cemʻiyeti'ne gönderilen bir telgrafnâmenin Syra adasında Yunanlılar tarafından dûçâr-ı tevkîf olunduğunu ve Hilâl-i Ahmer'in bu bâbda Eastern Telgraf Şirketi'nin Beyoğlu şuʻbesi nezdinde teşebbüsâtda bulunduğunu yazmış idik. Eastern Telgraf Şirketi'nin Beyoğlu şuʻbesi, Hilâl-i Ahmer'e yazdığı 12 Mayıs târîhli mektûbda diyor ki: "-İcrâ kılınan tahkîkât-ı tâmmeden sonra 8 Nisan 1922 târîhli ve 1078 numaralı telgrafnâme- nizin mahalline irsâl edildiği tahakkuk etdi. Bu telgrafnâme hakkında yeniden tahkîkâtda bulunmak iktidârımızın hâricindedir. Çekilen bütün telgrafların mürsilleri zarar u ziyânına olarak mürselün ileyhlere gönderildiğini ve bu telgrafların Yunanistan'da sansüre tâbiʻ olduklarını elbette bilirsiniz". Mesʼele şirketin bu mektûbuyla daha ziyâde tavazzuh etdi. Telgrafnâmemiz Syra'da Yunanîler tarafından tevkîf edilmişdir. Hilâl-i Ahmer bu telgrafnâme ile Beynelmilel Salîb-i Ahmer Komite- si'nden, Yunanistan tarafından bir seneden beri bir dürlü gönderilemeyen Osmanlı esîrleri esâmî ve künye cedvellerini istiyor idi. Fakat Osmanlı esîrlerini izʻâc ve imhâ etmekden başka bir gâye taʻkîb etmeyen Yunanistan, bu telgrafnâmeyi geçirtmek istemedi. Yunanistan'ın Cenevre ve Lahey Mukâvelenâmelerine adem-i riʻâyetine dâir iki yeni vakʻa kay- dediyoruz: 1-Hilâl-i Ahmer, Asinara'da bulunan üserâ-yı Osmaniye'yi aldırmak için Ümid vapurunu tahsîs eylediğini İʼtilâf Devletlerinin İstanbul Fevkalâde komiserlerine bildirerek vapurun Yunan donanma- sı tarafından dûçâr-ı taʻarruz olmaması için Yunan Fevkalâde Komiserliği nezdinde tavassut eyleme- lerini ricâ etdi. İʼtilâf fevkalâde komiserleri, Hilâl-i Ahmer'in bu ricâsı üzerine Ümid vapurunun Os- manlı ve İʼtilâf bayrakları altında seyâhat edeceğini Yunan Komiserliği'ne bildirmişler ve Yunanîler tarafından tevkîf edilmemesi için îcâb edenlere maʻlûmât verilmesini ricâ eylemişlerdir. Cereyân-ı hâl bu merkezde iken Asinara'dan avdet eden Ümid vapuru 31 Mayıs - 1 Haziran gecesinde Marmara denizinde Aigli Yunan torpidosu tarafından tevkîf edilmişdir. Bu tevkifin tafsîlâtı, mecmûʻanın baş- makâlesinde mündericdir. 2-Yunanistan'da bulunan üserâ-yı Osmaniye'nin ahvâlini teftîşe meʼmûr edilen Mösyö Schatz- mann'ın raporunda Yunanistan'ın muhtelif garnizonlarında tutulmakda olan pek çok sivil, kadın, ih- tiyâr ve çocuk Türklere harb esîrlerine yapılan [222] muʻâmelenin aynı yapılmakda olduğu mukay- yeddir. Bu muʻâmele, Lahey Konferansı mukarrerât ve ahkâmına tamâmıyla mugâyirdir. Zâten Mösyö Schatzmann bu ciheti açıkdan açığa kayıd ve ızhâr ediyordu. Beynelmilel ahkâm ve mukarrerât-ı mevzûʻaya olan bu riʻâyetsizliklerin tevâlîsini gördükden sonra artık bu kabîl mukâvelelerin ne hük- mü olabileceğini sormağı bile zâid addetmek doğru değil midir? _______________