HİLÂL-İ AHMER MECMÛʻALARI / CİLT 1

Osmanlı Hilâl-i Ahmer Mecmû ‘ ası Sayı 11 350 çıkdık. Sivastopol'den Akmescid'e kadar olan mesâfe 67 verst olduğundan o gün akşam üstü Akmes- cid'e geldik. Vusûlümüzden bir müddet sonra iki Tatar gelerek ertesi Salı günü sâʻat onda Kırım Tatar Komitesi ictimâʻ edeceğinden hâzırlanmamızı ricâ etdiler. Ertesi günü Kırım Kooperatif Şirketi Mer- kezi'nde ictimâʻ [250] eden altı zâtdan mürekkeb bir heyʼete mülâkî olduk. Heyʼet-i mezkûre, Kırım Merkez Tatar Komitesi teşkîline Bolşevik Hükûmeti tarafından müsâʻade edilmediğini ve ancak her kazâda Muʻâvenet-i Mütekâbile Cemʻiyeti nâmıyla birer cemʻiyet-i hayriye mevcûd olduğunu beyân ve bu cemʻiyetlerin aynı zamânda kooperatif şirketlerini temsîl etdiklerini ilâve etdi. Hilâl-i Ahmer Merkezi'nden bu heyʼete hitâben tevdîʻ buyurulan tahrîrâtı takdîm eyledik ise de heyʼet-i mezkûre almağa cesâret edemeyip baʻde'l-kırâʼe hükûmete vermemizi ricâ etdi. Bu hâle nazaran Akmescid'de müsbet bir iş görülemeyeceği anlaşıldığından vedâʻ etmek üzere iken cumhûriyet reîsinin bizi otelde ziyâret edeceğini telefon ile bildirmeleri üzerine derhâl otele avdet etdik. KırımAçlar Cemʻiyeti reîsi olan Cumhûriyet Reîsi Gaven Yoldaş râhatsız olduğundan müşâru- nileyh nâmına muʻâvini Şivedof Yoldaş ile Kırım Merkez Komitesi aʻzâsından Bekir Sıdkı Çobanzâ- de, Ticâret-i Hâriciye Vekîli Selim Mehmedof, Zirâʻat Nezâreti Müsteşârı Süleyman İdrisof, Akmes- cid Tatar Cemʻiyet-i Hayriyesi Reîsi Celil Hattatof, KırımArâzî Komiseri Ömer İbrahimof Yoldaşlar geldiler. Resm-i hoş âmedîyi îfâ etdikden ve Tatarların her zamân Türklere merbût olduklarını ve un göndermek sûretiyle Tatarların tahattur edilmiş olmalarından dolayı büyük bir memnûniyet hissede- rek bu bâbda takdîm-i teşekkür etdiklerini beyân eyledikden sonra açların iʻâşesi husûsu münhasıran hükûmete taʻalluk etdiğinden Kırım'da mikdârı cüzʼî olan Rusları tefrîk etmek ise cereyân-ı hâle nazaran muvâfık olamayacağından bahisle getirilen unların sûret-i tevzîʻi hakkında karâr verilmek üzere keyfiyetin ertesi Çarşamba günü hükûmet konağında Başvekîl Seyyid Galiyef Yoldaş muvâce- hesinde müzâkere edilmesine karâr verildi. Heyʼet, otelde ve lokantada hiçbir masraf ihtiyâr edilmeksizin istirâhatimizin teʼmîn olunaca- ğını ve bir sâʻat sonra Rusların İslâm çocuklarına ne yolda muʻâvenet etmekde olduklarını görmek üzere İʻâşe Reîsi Muʻâvini Şivedof Yoldaş ile İslâm eytâmhânelerine gideceğimizi beyân eylediler. Vedâʻ etdik. Mustafa Subhi ve Rifat Bey nâmlarına teʼsîs olunan ve sokaklarda ölmekde iken topla- nan yetîmlerin idâresine tahsîs edilmiş olan çocuk bâğçelerini ziyâret etdik. İttihâz edilen karâr mûcebince 7 Haziran 1338 (1922) târîhine musâdif Çarşamba günü sâʻat birde Başvekîl Galiyef Yoldaş'ın makâmında ve müşârunileyhin riyâsetinde, otelde ziyâretimize ge- len zevât ile tanımadığımız diğer bazı zevâtdan mürekkeb on beş kişilik bir heyʼet muvâcehesinde bulunduk. Getirdiğimiz unların sûret-i tevzîʻi mesʼelesi aralarında hayli münâkaşâtı mûcib oldu. Şi- vedof Yoldaş'ın unlar iʻâşe tarafından alınıp yavaş yavaş sarf edilmesi hakkındaki ısrârına rağmen İstanbul Tatar Cemʻiyeti'nin tevzîʻ pusulası bazı taʻdîlâtla kabûl olunarak hükûmet vâsıtasıyla ehline tevzîʻ ve mahallî Tatar cemʻiyetleri tarafından da sûret-i tevzîʻinin kontrol edilmesine karâr verildi. Osmanlı Hilâl-i Ahmer Riyâseti cânibinden tastîr buyurulan tahrîrât ile İstanbul Tatar Cemʻiyeti ta- rafından Hilâl-i Ahmer'e takdîm edilen tevzîʻ cedveli, bir hâtıra-i mahsûsa olarak hıfz edilmek üzere Başvekâlet tarafından ahz olundu. Bu celsede ittihâz edilen mukarrerât tesbît edilerek mazbatası ih- zâr edildikden sonra ertesi gün bize verileceği beyân edildi. Mazbatanın tanzîmi teehhur etdiğinden beyân-ı maʻzeret zımnında Başvekîl Seyyid Galiyef Yoldaş otelde bizi ziyârete geldi. 9 Haziran Cuma günü mazbatayı müstashiben Sivastopol'e avdet ve Cumartesi günü Bulgaria vapuruna râkiben Dersaadet'e avdet etdik". Hilâl-i Ahmer, İlhami ve Hasan Hüsnü Beylere îfâ-yı vazîfede gösterdikleri gayretden dolayı teşekkür eder.