HİLÂL-İ AHMER MECMÛʻALARI / CİLT 1

Osmanlı Hilâl-i Ahmer Mecmû ‘ ası Sayı 11 353 olanlara sormalı! Hilâl-i Ahmer, iʻânelerini mecrûh, hasta ve garîb olmayanlardan istiyor. Bu büyük merhamete bir gün muhtâc olmamış olanlar Hilâl-i Ahmer için kâfi derecede fedakârlık edemezler. Zîrâ hiçbir fedakârlık bu büyük merhametin pahâsı olamaz. Hilâl-i Ahmer Türklerin şu dakîkada Anadolu'nun her köşesinde ve İstanbul'un gözümüze görünmeyen ücrâ yerlerinde kaç bin ıztırâb, başını onun göğsüne dayamış, ağır ağır diniyor ve bu memleketde ıztırâbdan daha çok ne vardır? Bu ıztırâb memleketinde, merhamet Hilâl-i Ahmer'de bir müessese gibi cânlı duruyor. O, hepimizin müşterek merhametidir. Hepimizin kalbi onun göğsünde çarpıyor. Mücâhedemizin bizi sevindirdiği her 'ân'ın birkaç bin ıztırâba bedel olduğunu düşünelim ve çalışalım ki, müşterek merhametin âğûşu bütün muztaribleri kucaklayacak kadar genişlesin". _______________ Yunanistan Cenevre'de ve Lahey'de Münʻakid Beynelmilel Konferanslar Mukarrerâtına Nasıl Riʻâyet Ediyor? Yunanistan'ın Cenevre ve Lahey konferanslarının mukarrerâtına hiç riʻâyet etmediğini geçen iki nüshamızda vesâik ile isbât etdik. Yunanistan, inâdının en müzʻic kısmını iki seneden beri memle- ketinde [253] bulunan Türk esîrlerinin muvazzah adreslerini göndermemekle gösteriyor. Türkiye Büyük Millet Meclisi Müdâfaʻa Vekâleti, 24 Haziran târîhli telgrafnâmesiyle taleb olunan bu muvazzah adresler gönderilmez ise, baʻdemâ ne Yunan Hükûmeti'ne ne de Yunan Salîb-i Ahmeri'ne Yunan üserâsı hakkında hiç maʻlûmât veremeyeceğini bildirdi. Hilâl-i Ahmer, Beynelmi- lel Salîb-i Ahmer'in İstanbul delegesi Mösyö Burnier'ye Müdâfaʻa Vekâleti'nin bu telgrafnâmesinden bâhis işʻârâtda bulunarak bu mühim mesʼele hakkında Beynelmilel Salîb-i Ahmer Cemʻiyeti'nin na- zar-ı dikkatini celb eylemesini ricâ etdi. Mevzûʻ-ı bahis adresler, îzâhât-ı lâzımeden ârî olarak bundan üç ay evvel gelmiş ise de muvaz- zah üserâ adreslerinin ikmâl edilmesi için iki buçuk ay evvel İstanbul târikıyla Atina'ya gitmiş olan Mösyö Schlemmer'e bu bâbda bi'l-cümle îzâhât-ı lâzımeyi muhtevî matbûʻ cedveller verilmiş ve bu cedvellerin Yunan Salîb-i Ahmerince imlâ etdirilmesi ricâ edilmiş idi. İşte aradan iki buçuk ay daha geçdiği hâlde hâlâ Yunan Hükûmeti cevâb vermiyor! _______________ Trakya Paşaeli Cemʻiyeti'nin Beynelmilel Salîb-i Ahmer'e Mürâcaʻatı 28 Teşrîn-i Evvel 1921 ve 6 Şubat 1922 târîhli mektûblarıyla Trakya Paşaeli Cemʻiyeti Beynel- milel Salîb-i Ahmer Cemʻiyeti'ne mürâcaʻat ederek Trakya ve Paşaeli havâlîsindeki unsur-ı İslâm'ın Yunanîler tarafından gördüğü mezâlim ve iʻtisâfât hakkında tahkîkât yapmak üzere oraya bir heyʼet-i tahkîkiye iʻzâm edilmesini ricâ etmiş idi. Bu defa Trakya Paşaeli Cemʻiyeti bu mesʼele hakkında Hilâl-i Ahmer'e dahi mürâcaʻat ederek tavassutunu ricâ etdi. Hilâl-i Ahmer, Trakya Paşaeli Cemʻiyeti'nin arzusunu teʼyîd ederek keyfiyeti 6 Temmuz 1922 târîhli telgrafı ile Beynelmilel Salîb-i Ahmer'e bildirdi. _______________