HİLÂL-İ AHMER MECMÛʻALARI / CİLT 1

376 Birinci Sene 19 Zilhicce sene 1340 / 15 Ağustos sene 1338 (1922) Numara 12 Makâlât ve İʻlânât, Neşriyât ve Teşvîkât Komisyonu Kitâbeti'ne Gönderilmelidir. OSMANLI HİLÂL-İ AHMER MECMÛʻASI Derc Edilmeyen Evrâk ve Makâlât İʻâde Edilmez. Ayda Bir Defa Neşrolunur. Senelik abonesi bir liradır. Merciʻi: Yerebatan Câddesi'nde Hilâl-i Ahmer Merkezi. Telefon: İstanbul 1783 Hilâl-i Ahmer'e gönderilecek mektûb, para, eşyâ ve bi'l-cümle teberruʻât, "Dersaadet'de Hilâl-i Ahmer Cemʻiyeti Riyâseti" nâmına irsâl edilmelidir. Mündericât: Halk Nazarında Hilâl-i Ahmer – Hilâl-i Ahmer Havâdisi – İslâm Gazeteleri ve Hilâl-i Ahmer – Hilâl-i Ahmer'in Faʻâliyeti – Rus Esâreti Hâtıraları – Teberruʻât – Fransızca Kısmı – İngilizce Kısmı HALK NAZARINDA HİLÂL-İ AHMER "Halk"dan maksadımız avâm değildir. Burada "halk" kelimesi, avâm ve havâssı ihtivâ eden en geniş ve en demokratik bir maʻnâda müstaʻmeldir. Halk, Hilâl-i Ahmer'in 1911 senesinde ihyâen teessüsünden beri hiçbir devrede geçirmekde olduğu Mütâreke devresindeki kadar Hilâl-i Ahmer'ini benimsememişdir. Bu, pek tabîʻî bir hâlet-i rûhiyeden neşʼet ediyor. Çünkü bu son Mütâreke'de doğrudan doğruya memleketin mukadderâtı mevzûʻ-ı bahis olduğundan halkın memlekete pek çok hizmeti sebk eden Hilâl-i Ahmer müessesesine dahi dört el ile sarılması îcâb etdi. Hilâl-i Ahmer'e alâkadârlık gösteren halk ile dâimî temâsımızdan dolayı biz bu halk alâkadâr- lığının muhtelif ve birçok tezâhürâtını gördük ve görmekdeyiz. Halk nazarında Hilâl-i Ahmer demek memleketin en büyük müessese-i hayriyesi, memleketin hayır yapan, iyilik eden her şeyi demekdir. Binâenaleyh bu müesseseye hizmet etmek herkese farzdır. İşte bu hâlet-i rûhiyeden mülhem olan halk, Hilâl-i Ahmer'e kendi sâhasında, kendi iktidârı dâiresinde arz-ı hizmet etmeği sevimli bir vazîfe bildi ve biliyor. Devâir-i resmiye, Hilâl-i Ahmer'e taʻalluk eden evrâk-ı resmiyeyi sürʻat ile çıkarır, muʻâmelâtı- nı da o sûretle ve kemâl-i sühûletle îfâ ve ikmâl eder. Çünkü bu Hilâl-i Ahmer'e âid bir işdir. Tüccâr ve esnâf, Hilâl-i Ahmer'e satdığı eşyânın fiyâtlarında hâtırı sayılır tenzîlât yaparlar. Çünkü o tenzîlâtdan istifâde edecek Hilâl-i Ahmer'dir. Mavnacılar, vapura yükletdikleri Hilâl-i Ahmer eşyâsını taşırken kırmamağa, tahrîb etmemeğe fevkalâde iʻtinâ ederler. Çünkü bu eşyâ Hilâl-i [266] Ahmer'indir. Hilâl-i Ahmer için "nevbet" ve "sı- ra"larını fedâ ederler. Vapur tâifesi Hilâl-i Ahmer'in eşyâsını emîn bir yere koymağa çalışırlar. Çünkü o denkler hep Hilâl-i Ahmer eşyâsıyla doludur.