HİLÂL-İ AHMER MECMÛʻALARI / CİLT 1

Osmanlı Hilâl-i Ahmer Mecmû ‘ ası Sayı 12 379 Söke Muhâcirlerine 400 Çuval Un Gönderildi. Söke ve civârı muhâcirîn-i İslâmiyesi, Milas ve civârına iskân edildikleri cihetle Hilâl-i Ahmer bu âfetzedelerin ihtiyâcâtına medâr olmak üzere Milas'ın iskelesi olan Güllük'e 400 çuval un gönderdi. _______________ Taʻyîn Ahîren Ankara'ya gitmiş olan merkez-i umûmî aʻzâsından Göz Tabîbi Müderris Esad Paşa'nın diğer murahhasların hâiz olduğu salâhiyetle Ankara Hilâl-i Ahmer Heyʼet-i Murahhasası meyânına idhâli Hilâl-i Ahmer Merkez-i Umûmîsi'nin 7 Temmuz sene [1]338 [1922] târîhli ictimâʻında karâr- laşdırılmışdır. Hastabakıcılık İmtihânı Bir defaya mahsûs olmak üzere Hilâl-i Ahmer hastabakıcılık şehâdetnâmesi ahzı için mürâcaʻat eden tâlibâtın Ağustos'un on altıncı Çarşamba günü kable'z-zevâl sâʻat onda Kadırga Hastahânesi'n- de Hilâl-i Ahmer Fen Komisyonu aʻzâsından müteşekkil bir heyʼet-i mümeyyize huzûrunda icrâ-yı imtihânları Hilâl-i Ahmer Merkez-i Umûmîsi'nin 9 Ağustos sene [1]338 [1922] târîhli ictimâʻında takarrür eylemişdir. Ceyhan Hilâl-i Ahmer Şuʻbesi'nin Teşekkülü 29 Temmuz sene [1]338 [1922] târîhinde Adana vilâyetine mülhak Ceyhan kasabasında İslâm Gençler Birliği'nde birlik heyʼet-i idâresi belediye heyʼeti, meʼmûrîn, eşrâf ve Müdâfaʻa-i Hukûk Cemʻiyeti aʻzâları ile ahâlîden mürekkeb bir ictimâʻ vukûʻ bulmuş ve bu ictimâʻa Kâimmakâm Tev- fik Demiralp Bey riyâset eylemişdir. Maksad-ı ictimâʻ şimdiye kadar her nasılsa teşekkül edemeyen Ceyhan Hilâl-i Ahmer Şuʻbe- si'ni vücûda getirmek olduğu hakkında söze başlayan kâimmakâm beyin Hilâl-i Ahmer Cemʻiyeti'nin maksad ve gâyesini ve îfâ eylemekde olduğu hidemât-ı vatan-perverâneyi bir lisân-ı sitâyişle tezkâr eylemesi üzerine reʼy-i hafî ile sekiz kişilik bir şuʻbe heyʼeti intihâbına ibtidâr edilmiş ve netîce-i intihâbâtda ber-vech-i âtî zevât ihrâz-ı ekseriyet eylemişlerdir. Müftü Halil Efendi, Ahmed Muhtar Efendi, Abbas Hilmi Efendi, Çakaldereli Hasan Ağa ve Fabrikatör Hakkı Efendi, Muʻallim Osman Fikri Efendi, Payaslı Mehmed Efendi, Ellialtızâde Halil Ağa. Hilâl-i Ahmer, Ceyhan Heyʼeti aʻzâsına muvaffakiyetler temennî eder. _______________ Hilâl-i Ahmer Radyum Arıyor. Radyumun tabâbetde ne kadar çok istiʻmâl edildiği maʻlûmdur. Hilâl-i Ahmer, hidemât-ı tıb- biyesini bu kıymetdâr vâsıtadan dahi müstefîd etmek üzere Çekoslovakya'da bulunan bu "maʻden-i girân-bahâ"dan elli miligramlık bir mikdârın tedârüküne delâlet eylemesini şehrimizdeki Çekoslovak Sefâreti'nden ricâ etdi. _______________