HİLÂL-İ AHMER MECMÛʻALARI / CİLT 1

Osmanlı Hilâl-i Ahmer Mecmû ‘ ası Sayı 13 425 "-Düşmanın terk ve tahliye etdiği kasaba ve köylerde îkâʻ etdiği fecâyiʻ dolayısıyla büyük sefâlet ve zarûret içinde kalan ahâlîye halkımız tarafından gerek nakden ve gerek aynen yapılacak teberruʻât için her tarafda teşkîlâtı mevcûd Hilâl-i Ahmer'in tavassutu ve derc edilecek nükûd ve eşyânın doğruca Ankara'da Hilâl-i Ahmer Merkezi'ne gönderilmesi heyʼet-i vekîlenin 6 Eylül sene [1]338 [1922] târîhli ictimâʻında tensîb edilmiş olmağla İstanbul halkının da bu emr-i hayra ve muʻâ- venete iştirâki esbâbının teʼmîni daha iyi takdîr edileceği tabîʻîdir. Hilâl-i Ahmer Cemʻiyeti Merkez-i Umûmîsi bu cihete mahsûs olarak verilecek iʻânâtı kabûle âmâde olup İstanbul ahâlîsinin bu iyiliğe kemâl-i tehâlükle iştirâk etmesine muntazar bulunmakdadır. _______________ Dârülfünûn Fener Alâyı ve Hilâl-i Ahmer Millî ordunun İzmir'i tahlîsi münâsebetiyle Dârülfünûn tarafından tertîb olunan fener alâyı Fa- tih, Şehzadebaşı, Bayezid, Divanyolu tarîkıyla hareket ederken Sultân Mahmud Türbesi'nden Nu- rıosmaniye'ye saparak Hilâl-i Ahmer Merkez-i Umûmîsi önünden [12] geçdiği sırada Hilâl-i Ahmer'e karşı da emsâlsiz tezâhürâtda bulunu[l]muşdur. Dârülfünûnlular "Yaşasın Hilâl-i Ahmer'imiz!" ni- dâlarını ayyûka çıkardılar. Muhterem halkın bu tezâhürât-ı âlî-cenâbânelerine pencerelerde bulunan Hilâl-i Ahmer erkân ve meʼmûrîni alkışlar ve şükrânlar ile mukâbele eylediler. Hilâl-i Ahmer'e karşı pek derîn hissiyât ile merbût bulunan Dârülfünûn gençlerinin bu tezâhürât-ı vatan-perverânelerinden dolayı cemʻiyetimiz nâmına kendilerine beyân-ı takdîrât ve takdîm-i teşekkürât eyleriz. _______________ Doktor Hikmet Bey Hilâl-i Ahmer Cemʻiyeti Kâtib-i Umûmîsi Doktor Hikmet Bey, Hilâl-i Ahmer'e âid bazı husûsât için İzmit tarîkıyla Ankara'ya müteveccihen hareket eylemişlerdir. Hikmet Bey İzmir tarîkıyla avdet edecekdir. _______________ İmdâd-ı Sıhhî Heyʼetleri Yunanlıların ricʻat ederken Anadolu'muzun birçok kasabalarını ve köylerini ihrâk ve ahâlî-i İslâmiye'ye karşı envâʻ-ı mezâlim ve fecâyiʻ irtikâb eyledikleri tahakkuk etmiş ve bu kasabalarla köylerde bîçâre ve sefîl kalan ahâlîye imdâd ve muʻâvenetde bulunmak üzere Ankara Hilâl-i Ahmer Heyʼet-i Murahhasasınca derhâl Afyonkarahisar ve havâlîsine Salih Bey'in riyâseti altında bir im- dâd-ı sıhhî heyʼeti gönderilmişdir. Heyʼet berâberinde birçok çamaşır, elbise, yiyecek ve ihtiyâcât-ı mübreme ve sıhhiye levâzımı götürmekdedir. Biri Balıkesir'e, Bursa'ya ve havâlîsine, diğeri İzmir ve Manisa civârına âid olmak üzere diğer iki imdâd-ı sıhhî heyʼeti daha derdest-i teşkîl ve iʻzâmdır. Bu heyʼetler mezâlimzedelere en ziyâde çamaşır, elbise ve levâzım-ı sıhhiye tevzîʻ edeceklerdir.