HİLÂL-İ AHMER MECMÛʻALARI / CİLT 1

Osmanlı Hilâl-i Ahmer Mecmû ‘ ası Sayı 13 426 Hilâl-i Ahmer ve Salîb-i Ahmerler Heyʼet-i İttihâdiyesi Harb-i Umûmî'yi müteʻâkib Düvel-i Müttefika Salîb-i Ahmerleri'nin iştirâkiyle Beynelmilel Salîb-i Ahmer Komitesi hâricinde bir Salîb-i Ahmerler Heyʼet-i İttihâdiyesi vücûda getirilmiş idi. Bi- dâyetde bu iki teşkîlâtın yekdiğerinden ayrı olarak faʻâliyetde bulunacakları zannedilmiş ise de bilâ- hare her ikisinin teşrîk-i mesâʻîsinden insâniyet için daha ziyâde fâide hâsıl olacağı teemmül olunarak bu iki heyʼetin sıkı bir râbıta ile birbirine merbût olmaları karârlaşdırıldı. Beynelmilel Salîb-i Ahmer Komitesi kemâ fi's-sâbık vazîfesinde devâm ile bi'l-cümle millî Salîb-i Ahmerlerin merciʻi olacak ve Salîb-i Ahmerler Heyʼet-i İttihâdiyesi ise sulh zamânındaki mesâil ve vezâif ile meselâ emrâz-ı sâriye ve verem mücâdeleleri gibi husûslar ile iştigâl edecek. Bidâyet-i teşekkülünde yalnız Düvel-i Müttefika Salîb-i Ahmerlerinin dâhil olduğu bu heyʼete bilâhare vukûʻ bulan daʻvet üzerine diğer bi'l-umûm Salîb-i Ahmerler dahi peyderpey iştirâk etdiler. Bunlar meyânında Hilâl-i Ahmer'in de Heyʼet-i İttihâdiye'ye dühûlü için Heyʼet-i İttihâdiye Riyâ- seti'nden bir daʻvetnâme geldi. Bu daʻveti ve Hilâl-i Ahmer'in mezkûr Heyʼet-i İttihâdiye'ye dühû- lü ile derʻuhde edeceği vezâifi tedkîk etmek üzere merkez-i umûmîce Tahsin ve Haydar Beylerden mürekkeb bir komisyon teşkîl edildi. Bu komisyon netîce-i tedkîkâtını mübeyyin raporunu merkez-i umûmînin fî 1 Eylül târîhli ictimâʻında kırâat etdi. Merkez-i umûmîde cereyân eden müzâkere netî- cesinde Heyʼet-i İttihâdiye'ye dâhil olmak için behemehâl kongrenin karârını istihsâl etmek îcâb ede- ceği anlaşıldı ve bu husûs Heyʼet-i İttihâdiye'ye cevâben bildirildi. [13] Hâriciye Nezâreti'nde Bir Komisyon 1921 senesinde Cenevre'de inʻikâd eden Beynelmilel Onuncu Salîb-i Ahmer Konferansı mukar- rerât ve temenniyâtını tedkîk ve tesbît etmek için akdi mütesavver siyâsî kongrede Osmanlı Heyʼet-i Murahhasası'nın taʻkîb edeceği hatt-ı hareket ile ne gibi esâsâtı müdâfaʻa edeceği ve harb zamânında Cenevre Mukâvelenâmesi'ne vâkiʻ olan tecâvüzât iʻtibârıyla da memleketimiz nokta-i nazarından ne gibi şikâyâtda bulunulabileceğini karârlaşdırmak ve bu bâbda bir taʻlîmâtnâme ihzâr eylemek üze- re Hâriciye, Harbiye Nezâretleriyle cemʻiyetimiz murahhaslarından mürekkeb bir komisyon teşkîli Hâriciye Nezâreti tarafından teklîf edilmiş idi. Mezkûr komisyona Hilâl-i Ahmer nâmına iştirâk et- mek üzere merkez-i umûmî aʻzâsından Müderris Doktor Besim Ömer Paşa ile Müderris Doktor Âkil Muhtar Bey intihâb ve taʻyîn edildiler. Bu komisyon ilk ictimâʻını Eylül'ün on altıncı Cumartesi günü baʻde'z-zevâl sâʻat dörtde Hâriciye Nezâreti'nde Müsteşâr Şevki Bey'in taht-ı riyâsetinde akdeyledi. Bu ictimâʻa Hâriciye Nezâreti'nden Müsteşâr Şevki, Hrant ve Nusret Beyler, Harbiye Nezâ- reti'nden Mîralây Süleyman Şevket Bey, cemʻiyetimizden Besim Ömer Paşa ile Âkil Muhtar Bey iştirâk etdiler. Bu muhterem komisyonun mesâʻîsinde muvaffak olmasını temennî ederiz. _______________ Ziyâretçi Hastabakıcılık Teşkîlâtı Harb-i Umûmî esnâsında Amerika ordularıyla birlikde Amerika Salîb-i Ahmeri'nin de birçok teşkîlâtı ve mensûbîni gerek bizzât Amerika ordusuna gerek müttefikîn ordularına mensûb askerleri tedâvî etmek üzere Avrupa'ya kadar gelmişlerdi. Harb hitâm bulduğu hâlde bu heyʼetlerden birçoğu memleketlerine avdet etmemişler ve arâzî-i müstevliye ahâlîsine muʻâvenet etmek üzere Belçikalılara ve Fransızlara arz-ı hizmet eylemişlerdi. Bu teşkîlât arasında mesâʻîsinden Amerika'nın her tarafında