HİLÂL-İ AHMER MECMÛʻALARI / CİLT 1

36 Birinci Sene 13 Safer sene 1340 / 15 Teşrîn-i Evvel sene 1337 (1921) Numara 2 Makâlât ve İʻlânât, Neşriyât ve Teşvîkât Komisyonu Kitâbeti'ne Gönderilmelidir. OSMANLI HİLÂL-İ AHMER MECMÛʻASI Derc Edilmeyen Evrâk ve Makâlât İʻâde Edilmez. Ayda Bir Defa Neşrolunur. Senelik abonesi bir liradır. Merciʻi: Mahmudiye Câddesi'nde Hilâl-i Ahmer Merkezi. Telefon: İstanbul 1783 [25] Bu nüsha Eylül vekâyiʻini hâvîdir. _______________ Mündericât: Hilâl-i Ahmer Havâdisi – Salîb-i Ahmerler Havâdisi – Samanlıdağ Şibh-i Cezîresi Muhâcirleri – Hilâl-i Ahmer'in Faʻâliyeti – Taltîfât – Teberruʻât – Meccânen Muʻâyene ve Tedâvî Eden Dispanserler HİLÂL-İ AHMER HAVÂDİSİ Viladivostok'dan Gelen Esîrlerimizin Bakıyye-i Mâcerâsı Haimai-Maru vapuruyla Viladivostok'dan gelen 1.004 Osmanlı esîrinin 396 neferden ibâret olan Hilâl-i Ahmer meʼmûrları ile alîl ve zaʻîf olanları ve kadın ve çocukları tahliye etdirilmiş ve geri kalan 608 esîrin de kurtarılması için Beynelmilel Salîb-i Ahmer nezdinde teşebbüsâtda bulunulmuş idi. Bu kere Cenevre'de üserâ işleriyle meşgûl olan meşhûr Doktor Nansen'in Beynelmilel Salîb-i Ahmer'in Dersaadet murahhası Mösyö Burnier'ye çekdiği bir telgrafnâmede bâkî kalan esîrlerin el- yevm bî-taraf bir memleket hâlinde bulunan İtalya'ya nakilleri husûsunun İtalya Hükûmeti'ne teklîf edildiğini ve hükûmet-i müşârunileyhânın üserâ-yı mezkûrenin ibâte ve iʻâşe masârıfı olmak üzere ayda yedi yüz bin İtalyan lirası (İtalyan frangı) istediğini bildirdi. Cemʻiyetimize teblîğ edilen bu telgrafnâmenin bir sûreti makâm-ı âidine takdîm edildi. Makâm-ı müşârunileyhden vârid olan cevâbda Hükûmet-i Osmaniye müzâyaka-i mâliyeden dolayı ayda yedi yüz bin İtalyan lirası verecek bir hâlde bulunmadığından üserâ-yı mezkûrenin el-yevm devletlerce bî-taraf addolunan İstanbul'a nakledilmeleri ve îcâb eder ise, bu esîrleri taht-ı nezâretde bulundurmak üzere bir iʼtilâf heyʼeti intihâb ve taʻyîn edilebileceği teklîf ediliyor. Mösyö Nansen, Mösyö Bur- nier vâsıtasıyla teklîf-i vâkiʻden haberdâr edildi. Bu teklîfi müteʻâkib Hükûmet-i Osmaniye ile İtalya Hükûmeti arasında vukûʻ [26] bulan iʼtilâf üzerine İtalya Hükûmeti vapurdaki üserânın İtalya'nın La Sinyora limanına nakillerine müsâʻade etdiğini ve bu husûsda Atina Hükûmeti nezdinde teşebbüsâtda bulunulduğunu Beynelmilel Salîb-i Ahmer Merkezi'nin Dersaadet mümessilliğine telgraf ile teblîğ eylemiş ve Mösyö Burnier, bu telgrafın bir sûretini Hilâl-i Ahmer Merkezi'ne getirmek lütfunda bu- lunmuşdur.