HİLÂL-İ AHMER MECMÛʻALARI / CİLT 10

Türkiye Hilâl-i Ahmer Mecmû‘ası Sayı 84 4387 İNSÂNLARAVE MESKENLERE MUSALLAT OLAN TUFEYLÎ HAYVÂNLAR (Geçen nüshadan mâbaʻd 2 ) Vücûd Biti Kehleye karşı yapılacak mücâdele bir ilim mesʼelesi olmakdan ziyâde bir terbiye mesʼelesi- dir. Bu iʻtibârla [584] evvel emirde mücâdelenin bakteriyolojiye âid olduğu kanâʻatini ızhâr ve bu kanâʻatde ısrâr eden etıbbâ-yı sıhhiyûnun fikirleri muhtâc-ı tashîhdir. Bir de hiç hâiz-i ehemmiyet olmayan baş ve kasık biti mesʼelesini son derece mühlik bir tufeylî olan vücûd kehlesi mesʼelesinden tamâmen tefrîk etmek lâzımdır. Bunlardan mâʻadâ tathîrât ve tebhîrâta mahsûs etüvlere vazʻ ve idhâl edilen elbise ve çamaşır boğçalarının ve yorgan ve emsâlinin hâmil olduğu bitlerin tebhîr ameliyesinden sonra da itlâf edile- medikleri ve istihmâmın emîn ve müessir bir vâsıta olamayacağı husûsları da anlaşılmalıdır. Şahsın bitden tahaffuz ve sıyâneti her gün tekerrür etmesi îcâb eden bir temizlik mesʼelesi oldu- ğuna nazaran sık sık çamaşır değiştirilmesi, çıkarılan çamaşırların dikkat ü ihtimâm ile yıkanması ve yatağa girmezden evvel elbiselerin çıkarılması gibi tedâbîrin de ehemmiyetini halkın nazar-ı idrâkine vazʻ etmek zarûrîdir. Bu taʻdâd etdiğimiz tedâbîr kehlenin intişâr ve âhara sirâyetine mâniʻ olacak tedâbîr-i vâkıye ve ihtiyâtiyedendir. Haşerâtın itlâf ve imhâsı mesʼelesine gelince; bu ancak fenâlık gayr-ı kâbil-i taʻbîr bir hâle gel- dikden sonra nazar-ı ehemmiyete alınacak bir mesʼele-i tâliye mâhiyetinde telâkkî edilebilir. Terbiye-i umûmiyesi oldukça müterakkî memleketlerde nıkrîs vukûʻâtı zuhûr eder etmez, tehli- kenin vehâmeti halka anlayacağı lisânla tefhîm edilir, vesâit-i tahaffuziye ve mâniʻanın meselâ sık sık çamaşır değiştirmenin, çıkarılan çamaşırların kemâl-i ehemmiyetle tathîrinin, elbiseleri açık pencere önüne yaymanın sühûlet ve sâdeliğine dâir muhît îkâz edilir ve bunlar ilk yapılacak en mühim vezâif- den addolunur. Elbiselerin astar cihetine pülverizatörle xylol püskürülmesi de şâyân-ı tavsiyedir. Vücûdlarında pek mebzûl bit taşıyan kimselerin yatakları bu tufeylîlerle bulaşmış olacağından bu gibi kesânın yatak çarşafları, şilteleri etüvden geçirilir ve yatak minderlerinin otları tamâmen ihrâk edilir. Bu sûretle bulaşmış yatak odaları ile sundurmalar hemen işgâl edilmedikleri takdîrde mevcûd haşerâtın açlıkdan imhâsını teʼmînen beş-altı gün boş bırakılır. Mevsim soğuk zamânlara musâdif ise mezkûr mahaller bol bol havâlandırılmak sûretiyle keyfiyet-i imhâ tesrîʻ edilmiş olur. Hulâsa, bite karşı ittihâz ve tatbîki gâyet basît ve lüzûmlu olan tedbîr-i vâkıye ve ihtiyâtiyeyi halk bizzât icrâda taʻallül etdiği takdîrde hükûmetin yapacağı dezenfeksiyonun müessir olamayacağı ve bilhâssa bit mücâdelesinin bir terbiye mesʼelesi olduğu dâimâ tahattur edilmelidir. _______________ Baş Biti Baş kehlesi fakîr sınıfların muʻtâd tufeylîsidir. Bu, erkeklerden ziyâde kadınlara musallat olan bir haşeredir. 2 Bundan evvelki bahisler 69, 70, 71, 72, 73, 74, 75, 76, 81, 83'üncü nüshalardadır.