HİLÂL-İ AHMER MECMÛʻALARI / CİLT 10

Türkiye Hilâl-i Ahmer Mecmû‘ası Sayı 85 4446 [2] ÇOCUKLAR VE UYKU Çocukların uyku müddeti yani uykusuna lüzûmu olan sâʻat mikdârı yaşlarına ve biraz da ekâlîm ve mevâsime göre tahavvül eder. Bazı çocuklarda uyumak ihtiyâcı diğerlerinden daha fazla görüldüğünden uyku husûsunda bün- ye ve mizâc farkını da nazar-ı dikkatden dûr tutmamak îcâb eder. Müderris Terman'ın müşâhedelerine nazaran Amerika'nın garbında mekteb çocuklarının uyku müddeti yaşlarına nazaran ber-vech-i âtîdir: Yaş 6 7 8 9 10 11 Uyku Sâʻat ve Dakîkası 11,14 10,41 10,42 10,13 9,56 10 Yaş 12 13 14 15 16 17 18 [Uyku Sâʻat ve Dakîkası] 9,36 9,31 9,6 8,54 8,30 8,46 8,46 Şâyân-ı kayıddır ki, bu erkâm bazı İngiliz ve Alman müderrislerinin tesbît etdikleri sâʻatlerden çok fazla ve nazariyâtı umûmiyetle kabûl ve taʻkîb edilen Doktor Clement Duke'ın taʻyîn etdiği sâʻat- lerden çok noksândır. Sabâhları uykudan uyandırmağa lüzûm gösteren yani uykusu gayr-ı kâfi gelen çocukların yüze nisbetini gösteren aşağıya derc etdiğimiz cedvel tedkîk edildiği zamân Müderris Terman'ın taʻyîn etdiği rakamların pek aşağı düşdüğü anlaşılacakdır. Sin 6 7 8 9 10 11 12 13 14 15 16 17 18 Uykudan uyandırmağa lüzûm gösteren çocukların % nisbeti 21 19 23 19 23 20 24 25 26 32 39 40 48 Yine bu cedvel yatakdan kalkacağı sâʻatde henüz uykusuna kanmayan çocuklar adedinin sinle- riyle mütenâsiben mütezâyid olduğunu da göstermekdedir. Meselâ 6 yaşındaki çocuklarda % 21 olduğu hâlde 18 yaşına vâsıl olmuş delikanlılarda % 48'[e] çıkmakdadır. Bu hâlin tevlîd edeceği netîce şudur: Çocuk geç kalkdığı için ale'l-acele bir şey yiyecek, uyku gözünden akarak sınıf arkadâşlarından sonra dershâneye girmiş bulunacak ve sabâhleyin yatağından vücûdu dinlenmiş, fikri zinde olarak kalkan bir çocuk kadar zihni açık olmayacak ve idrâk ve ihtisâsı daha az serîʻ olacakdır. Pek fakîr âile çocuklarının havâss-ı akliyesi hâl-i refâhda bulunan âile çocuklarınınkinden bir sene teehhurla inkişâf etdiği kanâʻat-bahş olacak bir sûretde isbât edilmişdir. Bu hâlin başlıca sebebi uykusuzlukdur. Odasını ve hattâ bazen yatdığı yatağını başkalarıyla taksîme mecbûr olan bir çocuk odadakilerin ale's-sabâh iş başına giderken yapacakları gürültü ile uyanmış bulunacak ve tahta biti, pire gibi haşerât ve soğuğun teʼsîriyle zâten muhtel olan uykusu büsbütün gayr-ı kâfi gelecekdir. Çocuğa uykudan gâib edilen sâʻatleri sabâhleyin tazmîn etdirmekden ise çocuğun akşâmları erken yatmağa alışmasına ehemmiyet verilmelidir.