HİLÂL-İ AHMER MECMÛʻALARI / CİLT 10

Türkiye Hilâl-i Ahmer Mecmû‘ası Sayı 85 4457 ne yapılacak muʻâvenet derecesinin tesbîti hakkında merkez-i umûmînin teklîfi neden ibâret bulundu- ğu îzâh ve her şeyden mukaddem meclis-i umûmîyi idâre etmek üzere bir reîs intihâbı teklîf olundu. Heyʼet-i umûmiyece gösterilen arzu ve reʼy-i işârî üzerine Doktor Refik Bey fevkalâde meclis-i umûmî riyâsetine intihâb edilerek ber-vech-i âtî beyânâtda bulundu. Doktor Refik Bey: "-Beyefendiler! Konya, Aksaray, Kırşehir, Yozgad, Eskişehir, Afyonkarahisar mıntıkalarında iʻâşe darlığı bu- lunduğu maʻlûmdur. Hükûmet-i Cumhûriye bizzât Dâhiliye vekîli göndererek bu menâtıkda tedkîkât icrâ etdirdi. Dâhiliye vekîli tedkîkâtını bir raporla Heyʼet-i Vekîle'ye bildirdi. Bu rapor Heyʼet-i Vekî- le'de tedkîk ve müzâkere olunarak bu mıntıkalar muhtâclarına yapılacak yardım şekilleri bir karâr- nâme ile tesbît olundu. Bu karârnâme gazetelerle intişâr etmişdir. Karârnâmenin beşinci mâddesini okuyorum: 5'inci Mâdde- Hilâl-i Ahmer'in şefkat ve muʻâvenetine mürâcaʻat olunmuşdur. Hilâl-i Ahmer darlık mıntıkalarında teşkîlâtını faʻâliyete getirecek, fevkalâde muhtâc bulunanlara hem sürʻatle muʻâvenet ve hem sıhhî ihtiyâca göre tertîbât ittihâz edecekdir. Bu karârnâme Başvekâlet-i Celîlesi'nin 19 Temmuz [1]928 târîhli tezkeresiyle merkez-i umûmî- mize teblîğ olundu. Bendeniz karârnâmeye muttaliʻ olur olmaz daha evvel İstanbul'da bulunan mer- kez-i umûmîmiz aʻzâsına telgrafla mürâcaʻat ederek cevâb-ı muvâfakatlarını almışdım. 21 Temmuz [1]928 târîhinde de Ankara'da bulunan aʻzâmızın iştirâkiyle akd [14] etdiğimiz merkez-i umûmî ic- timâʻında şu karârı ittihâz eyledik. Heyʼet-i celîlenize arz ediyorum. (Doktor Refik Bey, burada mer- kez-i umûmî tarafından ittihâz edilen karârı mübeyyin meclis-i umûmîye muʻtî takrîri okudu.) Takrîr Sûreti Meclis-i Umûmî Riyâset-i Celîlesi'ne, Konya, Aksaray, Kırşehir, Yozgad, Eskişehir, Afyonkarahisar vilâyetlerinde kuraklıkdan müte- essir olarak iʻâşe müşkilâtı karşısında kalan ve mikdârları iki yüz bin kadar tahmîn edilen muhtâcîne yapılacak muʻâvenetlerin tarz-ı icrâsı hakkında Hükûmet-i Cumhûriyece ittihâz olunup Başvekâlet-i Celîle'nin 19 Temmuz [1]928 târîh ve 2986/6 numaralı tezkeresiyle teblîğ buyurulan karârnâmede cemʻiyetimizden bazı muʻâvenetlerin îfâsına intizâr olunmakda ve ez-ân cümle bu menâtıkdaki iʻâşe buhrârına karşı muhtâcîne erzâk ve zahîre tevzîʻi ve yollarda çalışmak üzere iş başına gideceklerin yol masraflarının teʼmîni taleb edilmekdedir. Taleb-i vâkiʻ üzere cemʻiyetimizce mümkün olan muʻâ- venetlerin îfâsını teemmül maksadıyla 21 Temmuz [1]928 târîhinde inʻikâd eden merkez-i umûmîmiz bu yardımların îfâsı için lâ-ekal beş yüz bin lira mikdârında sarfiyât icrâsını zarûrî görmüş ise de bu mikdâr masrafın ihtiyârı meclis-i âlîlerinden istihsâl olunacak meʼzûniyete mütevakkıf bulunmasına binâen mevcûd yirmi iki aʻzânın ittifâk-ı ârâsıyla meclis-i âlîlerini ictimâʻa daʻvet etmişdir. Binâena- leyh mârru'z-zikr menâtık ahâlîsi için matlûb muʻâvenetlerin îfâsı tensîb-i âlîlerine iktirân eylediği takdîrde 1928-1929 senesi büdce mevâdd-ı nizâmiyesinin 3'üncü mâddesinde tesbît edilen cemʻiye- tin fevkalâde harb ihtiyât akçesinden 500.000 liraya kadar sarfiyât icrâsı için merkez-i umûmînize salâhiyet iʻtâsı husûsunda ittihâz-ı karâr buyurulmasını hürmet-i mahsûsamıza terdîfen arz eyleriz, efendim hazretleri. 26 Temmuz [1]928 Merkez-i Umûmiye Reîsi Doktor Refik