HİLÂL-İ AHMER MECMÛʻALARI / CİLT 10

Türkiye Hilâl-i Ahmer Mecmû‘ası Sayı 86 4519 Vilâyât Gazetelerinden Trabzon'da münteşir Yeni Yol refikimizin 9 Eylül târîhli 1012 numaralı nüshasında Of Hayrat Nâhiyesi Hilâl-i Ahmer Cemʻiyeti Şuʻbesi Reîsi Muʻallim Necati Bey'in "Hilâl-i Ahmer'i Unutmaya- lım!" nâmı altında güzel bir makâlesini okuduk. Vilâyet gazetelerinde bu gibi neşriyâta tesâdüfümüz yüksek maksadımızın yavaş yavaş lâkin emîn bir sûretde vatanın her bucağında mesʻûd bir aks-i sadâ husûle getirdiğini gösteriyor ki, şâyân-ı şükrândır. Arzu ederiz ki, diğer vilâyâtda münteşir refîklerimiz de maksadımızı bulundukları muhîtlerde neşre delâlet etsinler ve böylelikle pek az bir zamân zarfında vatanımızın her köşesinde bu şefkat ocağını düşüneceklerin ve ona yardım edeceklerin adedi çoğalsın. *** Denizli refikimizin 774'üncü nüshasında "Sıtma Nasıl Çoğalır?" unvânı altında Doktor Tevfik Halil Bey tarafından halk diliyle yazılmış gâyet nâfiʻ bir makâle manzûrumuz oldu. Aynı nüshada Memleket Hastahânesi Emrâz-ı Dâhiliye ve İntâniye Mütehassısı Doktor Fevzi Bey'in şarbon hastalığına müteʻallik kıymetdâr bir makâlesi de münderic. Bu gibi nâfiʻ yazıların halk diliyle memleketimizin her tarafında intişârı şâyân-ı şükrândır. Yeni alfabemiz ile halkımız kendi sıhhatine müteʻallik bu nâfiʻ yazıları okumağa başlar ve îcâbı vechile korunur ise pek az zamânda eski idârelerin ihmâli yüzünden kavrulmağa başlayan neslimiz Türk ismine lâyık ve mutâbık bir tarzda cânlanacağında, gürbüzleneceğinde şübhe etmemelidir. SALÎB-İ AHMERLER HAVÂDİSİ Bulgar Salîb-i Ahmer Cemʻiyeti Reîsinin Nutkundan Bulgar Salîb-i Ahmer Cemʻiyeti 4 Haziran 1928 târîhinde Salîb-i Ahmer bayramını tesʻîd etdi. Bu münâsebetle cemʻiyet-i mezkûre reîsi Mösyö Daneff, Slavianska Salonu'nda bir nutuk îrâd etmiş- dir. Bu nutkun son kısmını aynen derc eyliyoruz. "-Binâenaleyh Salîb-i Ahmer'in uhdesine terettüb eden faʻâliyet ve vezâif cidden ağırdır. [19] Husûsuyla halkımız gibi bir takım takallübâta, acı tecrübelere tevârüs etmiş bir halk için pek ağırdır. Esâsen bu ağır mîrâs ictimâʻî teʻâvünün tekâmülüne de mâniʻdir. Bence mâzînin yaralarını teşfiyeye en müessir çâre teʻâvün-i ictimâʻîyi tenmiye ile kâbildir. Bu yola teveccüh yani yanlış bir telâkkîye dûçâr olmuş olan ferdâniyet fikirleriyle mücâdele ancak Salîb-i Ahmer fikir ve maksadının neşriyle mümkündür. İşte bu fikirle lâ-yenkatıʻ sıralarımızın arası- na girenlerin adedlerinin çoğaldığını görmekle bahtiyârım. Bundan iki sene evvel cemʻiyetimize mensûb şuʻabât 80 ve aʻzâ adedi 8.390 iken şimdi şuʻbe- lerimizin adedi yüze ve aʻzâsı da 13.560'a bâliğ olmuşdur. Salîb-i Ahmer'in gençler teşkîlâtının gayretleri daha ziyâde ümîd-bahşdır. Bugün 60.000 aʻzâlı 576 grupdan mürekkeb olan bu teşkîlât bizim şerâitimizde bulunan bir memleket için iyi bir tekevvündür. Bundan dört sene evvel bu teşkîlât ancak 45.000 aʻzâlı 344 grup- dan müteşekkil idi. 1922 senesinde teʼsîs edilen bu teşkîlât başlangıçda 40 grupdan ibâret idi.