HİLÂL-İ AHMER MECMÛʻALARI / CİLT 10

Türkiye Hilâl-i Ahmer Mecmû‘ası Sayı 87 4536 Senede bir lira… Senede bir lira ile ne yapılabilir diye düşünüldüğü zamân birdenbire ufk-ı tefekkür genişliyor ve o suâle "her şey" cevâbı veriliyor. Senede bir lira… Bu para herkesin, yıllık ihtiyacının değil, fakat yıllık isrâfâtının bilmem kaçda kaçına tekâbül eder? Yani küçük bir hesâbla ayda sekiz buçuk kuruş. Demek ki, günde on para… Geçen 1927 Teşrîn-i Evvel'inde yapılan umûmî tahrîr-i nüfûsda pek sahîh olarak 13,5 milyonu mütecâviz Türk'ün bu vatanda bulunduğu meydâna çıkdı. Bu mikdârın yarısı kadın. Kadınlardan henüz azîm bir ekseriyetin zevcleri tarafından maʻîşetlerinin teʼmîn edildiğine nazaran kadın nüfû- sunu ayırdıkdan sonra 6,5 veya 7 milyon erkek nüfûsundan 4 milyon gibi hiç kimsenin müsâʻade edemeyeceği bir mikdârı da çocuk, ihtiyâr, bu maʻîşete gayr-ı muktedir olanlara bile bıraksak her hâlde bir iş ve kudret sâhibi olarak bugün güzel memleketimizde 3 milyon vatandâş olacağını en müşkil-pesendler bile teslîm etmek mecbûriyetindedirler. Binâenaleyh bir iş ve kudret sâhibi olarak bulduğumuz 3 milyon vatandâşdan ictimâʻî ve medenî vazîfesini idrâk etmeyecek bir ferd tasavvur etmemekliğimize rağmen bunun da yalnız bir sülüsünün Hilâl-i Ahmer'e aʻzâ kaydedilmesiyle Hilâl-i Ahmer Cemʻiyeti'nin yalnız aʻzâsından senevî bir milyon liralık bir vâridâta mâlik olacağı meydâna çıkar. Demek ki, her ferd kendi medenî ve ictimâʻî vazîfesi olarak Hilâl-i Ahmer'e senede vereceği bir liradan bu vatan yaralılarına, bu vatan felâketzedelerine, bu vatan muhtâclarına senede milyonu mütecâviz yardımlar yapılabilecekdir. Bu kudret az değildir. Hilâl-i Ahmer'in terakkî ve inkişâfında, tezyîd-i feyz ve kudretinde çok kıymetdâr mesâʻîlerine şâhid olduğumuz Hilâl-i Ahmer merkez ve şuʻbelerinin bilhâssa bu noktayı göz önünde bulundurarak Hilâl-i Ahmer'e aʻzâ kaydı sûretiyle ibrâz-ı faʻâliyete saʻy eylemeleri cemʻiyete karşı en müsmir ve müfîd hizmeti, en kuvvetli istinâdgâhı teʼmîn eder. Haluk Doğan [29] SİVİLAHÂLÎNİN KİMYEVÎ HARBE KARŞI HİMÂYESİ Mösyö Eysinga'ya Nazaran Kimyâ Harbinin Sûret-i Menʻi Beynelmilel Salîb-i Ahmer Mecmûʻası 'nın yüz on sekizinci nüshasından kimyâ harbinin menʻ ve zecri keyfiyeti her gün daha ziyâde hayâtî bir ehemmiyet iktisâb etmekdedir. Bununla berâber bu husûsda az zamân zarfında şâhid olduğumuz menâzıra, istiʻmâli asr-ı hâzır muhârebelerinde pek dehşetli bir sûretde tecellî ve inkişâf edecek olan işbu kimyevî silâhın menʻi mesʼele-i müşkilesinin halli hakkında şimdiye kadar teklîf olunan muhtelif tarîk-ı hallerin pek de emniyet-bahş olmadıklarını irâʼe etmekdedir. Ve'l-hâsıl her ân u zamân infilâkı muhtemel muhâsamât-ı müselleha-i müstakbelelerde kimyâ harbinin derece-i kudretini ve bu yüzden gayr-ı muhârib ahâlînin maʻrûz bulunacağı mehâliki efkâr-ı umûmiye-i cihâna anlatarak biraz alâkalarını celb etmek için geçen Mayıs ayı zarfında vukûʻ bulup el-ân hâtıra-i müellimesi zâil olmamış olan Hamburg'daki müvellid-i fosfor tüplerinin infilâkının bâʻis olduğu felâket ile Londra üzerine kimyevî ve havâî hücûm ve taʻarruz manevralarının Fransa, Almanya, Japonya ve aksâm-ı sâire-i cihânda îkâʻ etdiği teʼsîrâtın Avrupa matbûʻâtında bâʻis oldu- ğu azîm kîl ü kâl ve vâsiʻ neşriyât ve Brüksel'de sivil ahâlînin muhârebe gazlarına karşı himâye ve