HİLÂL-İ AHMER MECMÛʻALARI / CİLT 10

Türkiye Hilâl-i Ahmer Mecmû‘ası Sayı 87 4541 3-Bu husûsda belediyelerin imdâd teşkîlâtı tedârükâtında bulunmasına yardım etmek ve ona şimdilik sivil ahâlîye muʻâvenet edebilecek ücretsiz meʼmûrlar tedârük eylemek [33] 4-Sivil ahâlînin sıyâneti için husûsî cihâzlar ihdâs etmek sûretiyle müsâbakalar küşâd ve ikrâmiyeler tahsîsi ve zehirli gazların teʼsîrâtını izâle edecek mahsûlât-ı muʻaddele taharriyâtını teş- vîk eylemek 5-Birlik aʻzâlarına kendi şahıslarını gazdan muhâfaza edecek cihâzlar tedârük ve bunların hüsn-i muhâfazasını teʼmîn etmek 6-Hîn-i hâcetde sekene-i mahalliyeye tevzîʻ edilmek üzere bu gibi cihâz depoları teʼsîs eylemek 7-Bundan mâʻadâ Sıhhiye Müfettişi General Sieur'ün Her Şeyi Bilirim ( Je Sais Tous ) risâle-i mevkûtesinde aynı maksada müstenid ve propaganda gâyesiyle neşretdiği "Daha Hâl-i Sulhda İken Sivil Ahâlîyi Zehirli Gazlara Karşı Muhâfaza Etmesini Öğretelim" nâmındaki makâlesini zikrederiz ve zannederiz ki, bütün bu ehl-i vukûf ve hüsn-i niyet ashâbının muʻâvenet ve müşâreketinden az zamân zarfında derhâl tatbîkâta geçilebilecek çâre-i haller doğacakdır. Vâkıʻâ sâha-i teşebbüs şümûl- lü ve vâsiʻ fakat havâî tehlike de o nisbetde bedter ve vâkiʻdir. Profesör Demolis _______________ Bulgar Muhtelit Komisyonu 26 Eylül târîhli mektûbuyla Bulgar Salîb-i Ahmer Cemʻiyeti kimyâ harbine karşı sivil ahâlîyi sıyâneten teşekkül eden Bulgar Muhtelit Komisyonu'nun ber-vech-i âtî zevâtdan terekküb etdiğini Beynelmilel Komite'ye iblâğ etmişdir: * Bulgar Salîb-i Ahmer Cemʻiyeti murahhası * Harbiye Nezâreti Erkân-ı Harbiye murahhası * Sofya Merkez Belediye murahhası * Hükûmet dârülfünûnları murahhası * Sofya şehri umûr-ı sıhhiyesi murahhası * Sofya Askerî Kumandanlığı murahhası * Bulgaristan Eczâcılar Birliği murahhası * Tayyâre Müdüriyeti murahhası * Bulgaristan Kimyâger Birliği murahhası * İdâre-i Sıhhiye-i Askeriye murahhası * Sofya Polis Kumandanlığı murahhası Bulgar Muhtelit Komisyonu ahîren ilk ictimâʻını akd ile bir faʻâliyet programı tanzîm etmek üzere dört aʻzâdan mürekkeb tâlî bir komisyon teşkîl eylemişdir. Bu komisyona lüzûmu takdîrinde ehl-i vukûf ve meslekçe mümtâz kimseler iltihâk etdirilecekdir. _______________