HİLÂL-İ AHMER MECMÛʻALARI / CİLT 10

Türkiye Hilâl-i Ahmer Mecmû‘ası Sayı 87 4555 İran Arslan ve Kırmızı Güneş Cemʻiyeti tarafından 3.825 frank gönderilmiş ve bunun 1.137 frank ve elli santimi Bulgar ve 1.137 frank ve elli santimi Yunan Salîb-i Ahmerlerine ve 1.550 frangı da Türk Hilâl-i Ahmeri'ne gönderilmesi tasrîh edilmişdir. Finlandiya Salîb-i Ahmer Cemʻiyeti tarafından Balkan hareketzedelerine yardım için teşkîl edi- len kadınlar hizbi tarafından şimdiye kadar 1.151 frank on üç santim toplanmış ve Beynelmilel Salîb-i Ahmer Komitesi'ne gönderilmişdir. Meksika Salîb-i Ahmer Cemʻiyeti tarafından Beynelmilel Salîb-i Ahmer Ligi'ne aynı maksadla 3.624 frank irsâl edilmiş ve bu meblağ üçe taksîm edilerek müsâvâten her üç cemʻiyete tahsîs edil- mişdir. Felemenk Salîb-i Ahmer Cemʻiyeti tarafından da aynı maksadla Beynelmilel Salîb-i Ahmer Ligi'ne 500 filorin gönderilmiş ve bu meblağdan 234 filorin Bulgar ve 233 filorin Yunan Salîb-i Ah- meri'ne ve 33 filorin de Türk Hilâl-i Ahmeri'ne tahsîs edilmişdir. Danzig Salîb-i Ahmer Cemʻiyeti de her üç memleket Hilâl ve Salîb-i Ahmer Cemʻiyetlerine müsâvâten tahsîs edilmek üzere 1.481 frank elli santim göndermişdir. İngiliz Salîb-i Ahmer Cemʻiyeti, Yunan Salîb-i Ahmeri'ne gönderilmek üzere kendisine tevdîʻ edilmiş olan dört İngiliz lirası, altı şiling bir çeki Beynelmilel Lig'e göndermişdir. İsviçre Salîb-i Ahmer Cemʻiyeti tarafından toplanan iʻâneye gelince; Beynelmilel Salîb-i Ah- mer Komitesi'ne verilen hesâba göre Beynelmilel Çocuklara Yardım İttihâdı Cemʻiyeti tarafından gönderilen on bin frankla ve kuyuların taʻmîrine yirmi bin frank kinin ve dezenfeksiyon malzemesi satın alınmasına ve dokuz bin frank da Türk Hilâl-i Ahmer Cemʻiyeti ile Bulgar ve Yunan Salîb-i Ahmer Cemʻiyetlerine müsâvâten tahsîs edilmesine karâr verilmiş ve bundan mâʻadâ ikinci defa olarak Beynelmilel Çocuklara Yardım İttihâdı Cemʻiyeti tarafından 3.700 frank daha komiteye gön- derilmişdir. Millî Sırp, Hırvat, Sloven Salîb-i Ahmer Cemʻiyeti Millî Sırp, Hırvat, Sloven Salîb-i Ahmer Cemʻiyeti, On Üçüncü Beynelmilel Salîb-i Ahmerler Konferansı münâsebetiyle teşkîlât ve faʻâliyetlerini müşʻir bir nüsha-i fevkalâde tabʻ etdirmiş ve bir nüshasını da cemʻiyetimize ihdâ eylemişdir. [48] Bi'l-umûm Salîb-i Ahmer Cemʻiyetlerinin teşkîlâtı hakkında kârilerimize muhtasar bir fi- kir vermeği fâideli addettiğimizden bu nüshamızda millî Sırp, Hırvat ve Sloven Salîb-i Ahmer Cemʻi- yeti'nin teşkîlâtı hakkında mebhûs nüsha-i fevkalâleden muhtasaran iktibâs etdiğimiz maʻlûmâtı derc eyliyoruz. *** Millî Sırp, Hırvat ve Sloven Salîb-i Ahmer Cemʻiyeti, Cenevre Mukâvelenâmesi'ne tebaʻan Beynelmilel Salîb-i Ahmer Cemʻiyeti'nde aʻzâ olduğu gibi aynı zamânda da Salîb-i Ahmer Ligi'ne de dâhil olmuşdur. Bu cemʻiyet her ne kadar 1918 senesinde teşkîl edilmiş gibi görünür ise de hakîkatde Sırp Salîb-i Ahmeri 1876 senesinde teʼsîs edilmişdir.