HİLÂL-İ AHMER MECMÛʻALARI / CİLT 10

Türkiye Hilâl-i Ahmer Mecmû‘ası Sayı 87 4556 Evvelce Hırvat ve Slovenlerin husûsî birer Salîb-i Ahmer Cemʻiyetleri mevcûd değildi. Daha doğrusu sâbık Avusturya İmparatorluğu bu milletlerin kendi kendilerine ayrı birer cemʻiyet teʼsîs et- melerine müsâʻade etmiyor ve bu gibi teşkîlâtı imparatorluk Salîb-i Ahmer teʼsîsâtı içine katıyor idi. Harb-i Umûmî'den sonra 1921 senesi Kânûn-ı Evvel'inin yirmi beşinde kırk yedi senelik mesâʻî- sinden sonra Sırp Salîb-i Ahmer Cemʻiyeti millî Sırp, Hırvat ve Sloven Salîb-i Ahmer Cemʻiyeti'ne istihâle eylemişdir. Bu cemʻiyet krallığın bütün memâliki üzerinde teşkîlât ve mesâʻîsini teşmîle başlamış ve on dört mıntıka komitesi ve 818 mahallî komitesi teʼsîs etmişdir. 1927 senesinde aʻzâ adedi 25.000 iken 1 Teşrîn-i Evvel [1]928 târîhinde bu mikdâr 35.000 adedine bâliğ olmuşdur. Cemʻiyetin vâsıta-i neşr-i efkârı bulunan mecmûʻanın hâlen on beş bin abonesi mevcûddur. Senelik ictimâʻ eden heyʼet-i umûmiye Sırp, Hırvat ve Sloven Salîb-i Ahmer Cemʻiyeti'nin yegâne hâkim ve nâzımıdır. Heyʼet-i umûmiye başlıca merkez komitesi aʻzâlarından, heyʼet-i teftîşiye komitesinden, mıntı- ka komiteleri delegelerinden, fahrî rüesâ ve cemʻiyetin eski reîslerinden, müessislerden ve cemʻiyete hâdim olanlardan terekküb eder. Cemʻiyetin bir de heyʼet-i idâresi vardır. Bu da cemʻiyetin reîsi ve kâtib-i umûmîsi, merkez komitesi, icrâ komitesi, teftîş komitesi aʻzâlarından mürekkebdir. Merkez komitesi ise cemʻiyetin reîsi, kâtib-i umûmîsi ve Belgrad Komitesi'nden yirmi dört aʻzâ ve on dört mıntıka komitelerinin reîslerinden teşekkül eder. Bu komite her dört ayda bir defa Belgrad'da toplanır. İcrâ Komitesi Cemʻiyetin reîsi ve iki reîs vekîli, kâtib-i umûmî ve bütün şuʻ- belerin reîslerinden ve merkez komitesine mensûb aşağıda arz olunan diğer komitelerden mürekkebdir. İcrâ komitesine mensûb şuʻbelere ge- lince; gençlik merkez komitesi -ki Salîb-i Ahmer'e bir şuʻbe şeklinde merbûtdur-, sıhhiye, hastabakıcılık, beynelmilel umûr, mâlî ve eko- nomikî umûr şuʻbeleri ile 1907 senesinde teʼsîs edilen [49] piyango komitesi, Palanga Maʻden Suyu İdâresi Neşriyât Heyʼeti, Belgrad'daki cemʻiyete mensûb hastabakıcılık mektebindeki heyʼetin murahhasları kezâlik cemʻiyetin mâlı bulunan müze, kütübhâne ve diğer şirket ve emvâl-i gayr-ı menkûleyi idâre eden müdüriyetlerden ibâretdir. Salîb-i Ahmer'in kadınlar komitesi de cemʻiyet merkezine, mın- tıka ve mahallî Salîb-i Ahmer komitelerine yardım ile mükellef husûsî bir teşekküldür. Bu teşekkülün reîsesi[nin] Salîb-i Ahmer idâre heyʼeti komitesinde bir mevkiʻi vardır. Heyʼet-i teftîşiye komitesine gelince; on bir aʻzâdan mürekkeb ve salâhiyet-i vâsiʻayı hâiz bir heyʼetdir. Îcâb etdikçe toplanır. Hilâl-i Ahmer Cemʻiyeti fâhir aʻzâsından Kocaeli Hilâl-i Ahmer Merkez Reîsi Hakkı Bey