HİLÂL-İ AHMER MECMÛʻALARI / CİLT 2

Türkiye Hilâl-i Ahmer Mecmû‘ası Sayı 17 593 Kasaba kazâsından ayrılacağımız vakit, belediye reîsinin zevcesi Beynelmilel Etfâle Muʻâve- net İttihâdı tarafından ibzâl edilen muʻâvenetden dolayı bize hâr ve samîmî bir lisânla teşekkür etmiş- dir. Ne kadar yazık ki, şimdi oralarda erzâk tükenmiş ve ihtiyât anbârları boş kalmışdır. Her millete mensûb müessesât-ı hayriye mümessilleri Rusya'ya ve Yunanistan'a gelerek açlığa karşı mücâdele ediyorlar. Ne maʻkûs tecellîdir ki, Anadolu'da hâl-i hâzırda hiçbir ecnebî murahhası bulunmuyor. İzmir'de çalışan Şark-ı Karîb Muʻâvenet Heyʼeti'nin iki murahhası, yalnız muhâcirlerin iʻzâmıyla meşgûldürler". Mösyö Guénod ve Mösyö Haccius, beyânât-ı sâlifeyi Etfâle Muʻâvenet Beynelmilel Gençlik Hareketi kâtib-i umûmîsinin huzûrunda dahi tekrâr etmişlerdir. Kâtib-i umûmî ise, bu beyânât üzerine âtîdeki taʻmîmi neşretmişdir: "-Hudûd ve mezheb farkı gözetmeksizin ümîdi kesilmiş çocukların imdâdına koşmak vazîfesini uyandıran âlî-cenâb bir bî-taraflık his ve rûhuyla, Anadolu'nun küçük felâketzedeleri lehine bir ha- reket-i semîhâne göstermeleri için Etfâle Muʻâvenet Beynelmilel Gençlik Hareketi Heyʼeti, uhuvvet ve muʻâvenet-i insâniyet-perverâne mefkûre-i necîbesiyle mütehallık bütün gençlere mürâcaʻat eder. Teberruʻât-ı nakdiye Cenevre'de Beynelmilel Etfâle Muʻâvenet İttihâdı'na, teberruʻât-ı ayni- ye ise İstanbul'da Beynelmilel Salîb-i Ahmer Murahhası Mösyö Georges Burnier'ye gönderilebilir. Londra'daki Çocukları Kurtar[ma] Cemʻiyeti, felâketzedegâna tevzîʻ edilmek üzere 20 Kânûn-ı Ev- vel târîhinde İzmir'e 10.000 yorgan gönderdi". Hilâl-i Ahmer, gerek Mösyö Guénod ve Mösyö Haccius cenâblarına gerek Etfâle Muʻâvenet Beynelmilel Gençlik Hareketi Kâtib-i Umûmîliği'yle Çocukları Kurtar[ma] Cemʻiyeti'ne bahtsız Türk çocuklarının sefâletine karşı gösterdikleri samîmî ve insânî alâkadan dolayı teşekkürât-ı samîmesini arz u iblâğa müsâraʻat eder. _______________ Yunanistan'daki Esîrlerimiz Yunanistan'da, Atina civârında Liossa Üserâ Karârgâhı'nda mevkûf iken ahîren bir takrîble firâr ve İstanbul'a avdet eden Sındırgı kazâsının Esendere köyünden sivil Himmet binAli'nin cemʻiyetimiz üserâ şuʻbesine vukûʻ bulan mürâcaʻatından bi'l-istifâde, Yunanistan'daki üserâmızın ahvâl-i umûmi- yesi hakkında kendisinden ber-vech-i âtî maʻlûmât alınmışdır: "-İşbu karârgâhda iki bini mütecâviz esîr bulunmakdadır. Esîrler kısmen kışlada ve kısmen çadırlarda iskân edilmekdedir. Günde dört kişi için bir ekmek veriliyor. Bazen bu mikdâr sekiz kişi için bir ekmeğe tenzîl edilmekdedir. Bir gün çorba, bir gün fasulye [119] haşlaması ve ara sıra pek az mikdârda etle mahlût bir kap yemek veriliyor. Üserânın ahvâl-i sıhhiyesi hiç de iyi değildir. Dizan- teri icrâ-yı hükmetmekde ve musâbîn ve vefeyât yekûnu iyice mühim bir mikdâra bâliğ olmakdadır. Efrâd şimdiye kadar aylık olarak hiçbir şey almamışdır. Hattâ vesâit-i muhâbere mefkûddur. Yalnız karârgâhda vakt ü hâli yerinde olanların muʻâveneti sâyesinde efrâda kâğıd ve kalem tedârük edile- bilmekdedir. Çamaşır, fes, sabun mefkûddur. Efrâdın mühim bir kısmı cidden perîşân bir hâldedir. Amerikalıların teftîşi haber alındığı zamân, bir kısım sabâhleyin Patras'a sevk edilmek bahânesiyle karârgâhdan çıkarılmış ve teftîşin hitâmından sonra yeniden karargâha iʻâde olunmuşdur. Mis Billin- gs esîrler ile görüşürken karârgâh zâbitânı muvâcehesinde kimse hâlinden şikâyete cesâret etmemiş ve yalnız buna teşebbüs eden Polis Nail Efendi misin avdetinden sonra dayak ve işkenceye maʻrûz