HİLÂL-İ AHMER MECMÛʻALARI / CİLT 2

Türkiye Hilâl-i Ahmer Mecmû‘ası Sayı 19 689 Bir Ricâ: Türkçe gazetelerin muhtelif lisânlarda neşrolunan cerâid-i İslâmiye'nin bu küçük beyânnâmeyi sütûnlarında neşir ve derc eylemelerini hakkımızdaki dâimî lütuf ve teveccühlerinden ricâ ve niyâz ederiz. Hilâl-i Ahmer Mecmûʻası [180] HİLÂL-İ AHMER HAVÂDİSİ Üserâ Mübâdelesi Geçen nüshamızda Türkiye'deki ve Yunanistan'daki bi'l-cümle sivil esîrler ile tekmîl Türk harb üserâsının ve bu harb üserâsı adedince Yunan esîrlerinin mübâdelesi takarrür etdiğini ve bu emri kuv- veden fiʻle çıkarmak için Beynelmilel Salîb-i Ahmer tarafından Atina'ya Mîralây Wildbolz'un taht-ı riyâsetinde bir heyʼet iʻzâm olunduğunu ve bu heyʼet nezdine Yunanistan tarafından Mîralây Cota- kis'in murahhas taʻyîn edildiğini ve Türkiye Büyük Millet Meclisi Hükûmeti tarafından ise Hilâl-i Ahmer Üserâ Şuʻbesi Reîs Vekîli Ali Muzaffer Bey'in taʻyîn ve iʻzâm edildiğini yazmış idik. Ali Muzaffer Bey geçen 14 Şubat'da Amerika'nın Piraeus destroyeriyle şehrimizden hareket etmiş ve Atina'ya muvâsalatı akîbinde alâkadâr devâir ve zevât ile temâsda bulunarak derhâl üserânın nakline mübâşeret edilmesini taleb etmişdir. Yunan Hükûmeti, esâs addedilecek olan sivil üserânın listesi hakkında ihtilâf mevcûd olduğu cihetle, keyfiyetin Lozan Konferansı Kâtib-i Umûmîliği'nden istiʻlâm edileceğini ileri sürmüşdür. Mübâdele-i Üserâ Mukâvelenâmesi'nin birinci mâddesi metnine hiç de tevâfuk etmeyen bu garîb cevâb üzerine Hilâl-i Ahmer, mukâvelenâmenin metni gâyet sarîh olduğunu ve sivil üserâya âid mâddenin hiçbir tereddüde mahal bırakmayacak bir şekilde muharrer bulunduğunu ve Yunan Hükû- meti'nin bu bâbdaki müddeʻayâtını bir dürlü anlayamadığını, Yunan Hükûmeti'ne teblîğ eylemesini Ali Muzaffer Bey'e telgrafla bildirdi. Bu telgrafın teʼsîriyledir ki, Yunan Hükûmeti, Mübâdele Ko- misyonu'na işe mübâşeret meʼzûniyeti verdi. Mübâdelenin bir müddet teehhuruna sebebiyet veren bu müzâkerâtdan sonra Ali Muzaffer Bey'den zîrde münderic telgrafnâme alındı: "-Atina, 28 Şubat 1923 Evvelki gün ve dün Türk sivil esîrleri ve rehîneleri Yunanistan'dan gemilerle İzmir'e ve İstan- bul'a müteveccihen hareket etmişlerdir. Tahmînen 340 zâbit ve 9.700 nefer Türk üserâ-yı harbiyesi o mikdâr Yunan üserâsıyla mübâdele edilmek üzere İzmir'e müteveccihen harekete âmâdedir". Diğer tarafdan aynı târîh ile İzmir Hilâl-i Ahmer Merkezi'nden de âtîdeki telgrafnâme vârid oldu: "-Vürûd edecek üserâmızın tathîrât-ı fenniyeleri için Urla'da tedâbîr-i lâzıme ittihâz edildiği gibi İzmir'de de iʻâşe ve ibâteleri için tarafımızdan bir misâfirhâne teʼsîs ve buna muktezî kâffe-i levâ- zım ihzâr olundu. Askerî ümerâmız için de ayrıca tertîbât-ı lâzıme ikmâl edilmek üzeredir. Üserânın vürûdu sırasında başkaca arz-ı maʻlûmât olunacakdır". Esîrlerimizin İzmir'e ve İstanbul'a muvâsalatına intizâr eder iken Atina'daki Mübâdele Üserâ Heyʼeti Reîsi İsviçreli Mîralây Wildbolz, telgrafla Yunan Hükûmeti tarafından üserâyı hâmil vapurla- rın azîmetine mümânaʻat edildiğini ve hükûmet-i milliyenin keyfiyetden haberdâr edilmesini bildirdi. Murahhasımız, Muzaffer Bey'den de aynı meâlde bir telgraf alındı.